Na Rai ni iVolatabu
Vakaevei na Lotu Kece, Era Duidui Sala ga me Torovi Kina na Kalou?
“AU DRUKATAKA dina ni dua ga na lotu e digitaka na Kalou cecere ni lomalagi kei vuravura me vakatakilai koya kina vei keda,” e kaya e dua na dauvolaivola, o Marcus Borg. E kaya o Desmond Tutu, e dua e rawata na icovi vakairogorogo na Nobel Prize: “Sega ni dua na lotu e rawa ni kaya ni sa kila taucoko na veika tawakilai” me baleta na vakabauta. Dua na vakabauta kilai levu ni lotu Idu e vaka oqo, “Jotto moth, totto poth,” eda rawa ni kaya ni kena ibalebale ni lotu kece era duidui sala era basika yani ina dua vata ga na vanua. Oqo tale ga na nodra vakabauta na lotu Buddha. Io, era vakabauta e vica vata na milioni ni lotu kece era duidui sala ga me torovi kina na Kalou.
E kaya na daunitukutuku makawa o Geoffrey Parrinder: “So na gauna e dau tukuni ni lotu kece e dua vata ga na nodra isausau, se ra gaunisala vata ga me kilai kina na ka dina, se tautauvata na nodra ivakavuvuli.” Io, era via tautauvata tu ga na nodra ivakavuvuli, ivalavala ni sokalou, kei na nodra veikalou na veilotu. Levu na lotu era vakatavuvulitaka na bibi ni veilomani, kei na ca ni laba, lasu, kei na butako. Laurai tale ga ni so ena levu na lotu era dau saga dina mai vu ni yalodra mera vukea e so tale. O koya gona, e dina beka ni dau tukuni ni sega ni bibi se lotu cava eda lewena, ia e bibi ga meda dina tiko ena ka eda vakabauta da qai saga meda dau cakava na ka vinaka? E dina beka ni lotu kece era duidui sala ga me torovi kina na Kalou?
Sa Rauta Beka ga na Yalodina?
Vakasamataki koya mada na Jiu a bula ena imatai ni senitiuri, na yacana o Saula, a qai kilai e muri me o Paula, na yapositolo lotu Vakarisito. A duru kaukaua ni lotu Vakajiu o koya, qai gu me vakawabokotaka na nodra sokalou na imuri i Karisito, ni nanuma ni cala tiko na nodra sokalou. (Cakacaka 8:1-3; 9:1, 2) Ia ena loloma ga ni Kalou, e mai liaca kina o Saula ni dina era dau lotu ra qai gumatua ena nodra qarava na Kalou na tamata vakataki koya, ia e se rawa ga nira cala baleta ni lecavi e so na ka. (Roma 10:2) Ni sa vulica o Saula e levu tale na ka me baleta na loma ni Kalou kei na ka e dau vakayacora, a veisau sara qai tekivu sokalou kei ira a dau vakacacani ira e liu—o ira na imuri i Jisu Karisito.—1 Timoci 1:12-16.
E kaya beka na iVolatabu ni rawa nida digidigi mai na vica vata na drau na lotu, ia o koya ga eda digitaka, sa na donu vua na Kalou oqori? Na kena veibasai e rogoca na yapositolo o Paula ni vosa kina vua o Jisu Karisito ni sa vakaturi oti. A talai koya o Jisu vei ira na lewe ni veimatanitu kece me “dolava na matadra, me ra saumaki mai na butobuto ki na rarama, mai na kaukauwa i Setani ki vua na Kalou.” (Cakacaka 26:17, 18, VV) Macala vinaka e ke ni rui bibi dina na lotu eda digia meda lewena. Sa ra lotu rawa tu e levu a talai o Paula me lai vunau vei ira. Ia era se tu ga ena “butobuto.” Io, kevaka me dina ni veilotu era dui sala era basika vata ga ina bula tawamudu qai vakadonui ira kece na Kalou, ke a sega ni gadrevi me vakavulici ira na nona imuri o Jisu ena cakacaka a lesi ira kina, oya mera vukea e so tale mera tisaipeli.—Maciu 28:19, 20.
Ena nona iVunau rogo ena Ulunivanua, a kaya o Jisu: “Dou curu ki na matamata-ni-koro qiqo: ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina; ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.” (Maciu 7:13, 14) E tukuna vakadodonu na iVolatabu ni “sa dua bauga na vakabauta.” (Efeso 4:5) Macala e ke ni levu era muria tiko na sala “rabailevu” e tiko na nodra lotu. Ia era sega ni se lewena na “dua bauga na vakabauta.” E dua ga na ivalavala ni sokalou dina, o koya gona, ena bibi mera vakasaqara oya o ira e lomadra mera kunea na vakabauta dina.
Vakasaqarai Koya na Kalou Dina
Mai na ivakatekivu sara, sa dau tukuna vei ira na tamata na Kalou na ka e vinakata mera cakava. (Vakatekivu 1:28; 2:15-17; 4:3-5) Nikua, e vakamatatataki tu ena iVolatabu na lomana vei keda. Oqo ena vakarawarawataka vei keda meda kila na kedrau duidui na sokalou e vakadonui kei na kena e cala. (Maciu 15:3-9) E so era lotu ga ena lotu i tukadra, ia e so tale era veimurimuritaka na nodra lotu. E levu era lotu ga ena lotu ni vanua era sucu kina. Ia, e dodonu beka me vakatau ena veika oya na lotu mo lotu kina, ena vanua o sucu kina se mera lewa vei iko e so tale?
Na lotu o digia e dodonu me vakatau ena ka o kila mai na nomu dikeva vinaka na iVolatabu. Ena imatai ni senitiuri, era sega ni ciqoma wale tu ga na vosa i Paula na yapositolo e so na tamata vuli era rogoci koya. Era “dauvakasaqaqara e nai Vola Tabu e na veisiga, se sa vakakina na ka oqori, se segai.” (Cakacaka 17:11; 1 Joni 4:1) Vakacava mo cakava tale ga oqori?
E dusia na iVolatabu ni o koya na Kalou ni lomalagi kei vuravura e dau vakasaqarai ira na tamata mera qaravi koya ena ivakavuvuli dina. Ena Joni 4:23, 24, e vakamacalataka kina o Jisu oqo: “Ia ena lako mai na gauna, a sa qai yaco mai, era na lotu vakayalo ka vakaidina vei Tamada ko ira sa lotu dina; ni sa qara ko Tamada me vakaoqo ko ira sa lotu vua. A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” Ena vakadonui wale ga “na lotu savasava ka sega ni cala e mata ni Kalou ko Tamada.” (Jemesa 1:27) Sa vakalougatataka na Kalou na nodra vakasaqaqara e vica na milioni mera qara na sala qiqo e basika ina bula. Ena sega ni solia na bula tawamudu vei ira na sega ni kauai, vei ira ga era sasaga dina mera qara ra qai muria dei na sala qiqo sa vakarautaka oti o koya.—Malakai 3:18.