Ena Vakadonui na Lotu Kece?

DUA na ka na levu ni lotu era tu nikua. E laurai ena dua na vakadidike wale ga qo, ni sa 19 na isoqosoqo lotu lelevu, e rauta na 10,000 na isoqosoqo lotu lalai. E levu gona na lotu nikua me digidigi kina e dua ni vakatauvatani e liu. Ia e bibi beka na lotu o digia?

Era kaya eso, na duidui lotu nikua era vaka na duidui gaunisala ina dua na ulunivanua. Se mani gaunisala cava era muria, ena basika kece ina dua na vanua. Era nanuma ni dua ga na Kalou Cecere, ena vakadonuya tale ga na lotu kece.

Ena Vakadonuya na Kalou na Lotu Kece?

Na cava a kaya o Jisu Karisito na qasenivuli vinaka duadua ni veika vakalotu? A tukuna vei ratou na nona tisaipeli, ‘curu ina matamata qiqo.’ Na vuna? “Ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina; ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.”​—Maciu 7:13, 14.

A tukuna dina o Jisu ni so na lotu ena “vakarusai”? Se a vakavuvulitaka ni o ira ga na sega ni vakabauta era muria tiko na sala rabailevu, ia o ira na vakabauta na Kalou se mani lotu cava era lewena era muria tiko na sala qiqo ina bula.

Ni tukuna oti ni rua ga na sala, a tomana o Jisu: “Qarauni ira na parofita vakailasu. Era rairai malua me vaka na sipi, ia era rerevaki me vaka na olifa.” (Maciu 7:15, New Century Version) Oti, a kaya tale: “Sega ni o ira kece era kaya vei yau ‘Turaga, Turaga’ era na curu ina Matanitu ni Kalou, o ira ga era cakava na lomai Tamaqu mai lomalagi.” (Maciu 7:21, Today’s English Version) Ke vakatokai e dua me parofita se kaya ni nona “Turaga” o Jisu, e sega ni kena ibalebale ni tawavakabauta, e rawa ga ni tukuni ni daulotu. A tukuna tiko gona o Jisu ena sega ni vakadonui na lotu kece, me kua tale ga nira vakabauti na qasenivuli kece ni lotu.

Rawa Beka ni Kilai na Lotu Dina?

Ena sega ni vakadonuya na Kalou na lotu kece. O na kila gona vakacava na lotu dina mai na udolu vakacaca na lotu era tu nikua? Qo e dua na kena ivakatautauvata: Kaya mada ni o sese ena dua na siti levu. O vakataroga se gaunisala cava mo muria. E dua e tukuna mo muri ena tokalau. Dua tale e dusia na ra, dua tale e tukuna mo digia ga na gaunisala o via muria. Ia e gole mai e dua tale, cereka na mape ni vanua ya, qai dusia vei iko na gaunisala dina mo muria. E solia tale ga vei iko na mape me nomu idusidusi. Sega li ni o na yalodei ni o na yaco ina vanua o gole tiko kina?

Ni o digidigi tale ga ena lotu mo lewena, ena vinakati e dua na mape se idusidusi nuitaki. E tiko beka e dua? Io, na iVolatabu. E tukuni kina: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu.”​—2 Timoci 3:16.

De sa tiko vei iko e dua na iVolatabu me dusimaki iko ina lotu dina. Era vakarautaka na iVakadinadina i Jiova era tabaka na mekesini qo, e dua na vakadewa nuitaki ni iVolatabu e vakatokai na New World Translation of the Holy Scriptures. Ke o sega ni iVakadinadina i Jiova, o na rairai vakayagataka eso tale na vakadewa mo kila kina na lotu dina kei na lotu lasu. E vakayagataki gona ena vica na ulutaga veitaravi qo, na vakadewa ni iVolatabu era kila vinaka e levu na lotu.

Ni o wiliwili, veidutaitaka na ka o kila kei na ka e kaya na iVolatabu. Vakasamataka na ka e tukuna o Jisu me baleta na kilai ni lotu dina kei na lotu lasu. E kaya: “Na kau vinaka ena vuataka na vua vinaka, na kau ca ena vuataka na vua ca. Na kau vinaka e sega ni rawa ni vuataka na vua ca, na kau ca e sega ni rawa ni vuataka na vua vinaka.” (Maciu 7:17, 18, Contemporary English Version) Meda raica mada e tolu na vua vinaka e tukuna na iVolatabu ni ivakatakilakila ni “kau vinaka.”

[Tikina bibi ena tabana e 10]

Na iVolatabu e vaka na mape, e idusidusi nuitaki me kilai kina na lotu dina