Vakadomobula Dina, Tiko na Vakanuinui

“ERA SAKURE NA VALE RA QAI KAMA. NIU CICI TIKO, TAMATA KECE GA AU RAICA ERA TABALAKA TOKA NA TAGI, RA MASU RA QAI VAQARA BULA. AU NANUMA GA NI SA SIGA NI LEWA.”​—G. R., BULA MAI NA UNEUNE.

VEI yabaki vica vata na milioni na uneune era yavalata na noda vuravura. Levu vei ira era sega ni vakilai.a Ia, ena kena ivakatautauvata, voleka ni 140 na uneune era vakacaca e veiyabaki, era vakatokai kina mera “levu,” “levu sara,” se “vakaitamera.” Ena veitabagauna sa oti, na mataqali uneune vaka oqo sa ra mate kina e vica vata na milioni qai sega ni tukuni rawa na levu ni vakacaca.

Na uneune tale ga e vakavurea na lomabibi vei ira na bula mai kina. Kena i vakaraitaki, ena itekivu ni 2001 ni kurei El Salvador oti e rua na uneune, e kaya na iliuliu ni komiti e dau veivakasalataki me baleta na mate ni vakasama ena tabana ni bula ni vanua oya: “Sa ra vakila na tamata na leqa ni vakasama, e laurai oqo ena rarawa, yalolailai kei na cudru.” Sa rauta mera ripotetaka mai na cakacaka ena tabana ni bula mai El Salvador ni tubu ena 73 na pasede na kedra iwiliwili era lomabibi ra qai veilecayaki. E vakaraitaka na vakatataro ena keba ni veivuke ni gadrevi vakalevu duadua kina na wai, tarava yani nodra vukei o ira e tauvi ira na mate ni vakasama.

Ia na uneune e sega ni vauci wale ga kina na mate, vakacaca, kei na rarawa. Levu na gauna, na leqa vaka oqo e uqeta na lomadra e so mera lomasoli ra qai yalovinaka vakalevu. So era cakacaka vagumatua mera vakavinakataka na vale era vakacacani kei na nodra vukei o ira e tarai ira vakaca na leqa. Na vakanuinui vaka oqo e laurai ena gauna vakadomobula sara mada ga, me vaka eda na qai raica.

[iVakamacala e ra]

[iYaloyalo ena tabana e 3]

Taqana e 2 kei na 3: E Aceni, mai Kirisi, e tagi e dua na goneyalewa ni kila ni tao tu o tinana ena dua na lomanivale e sa kasura. Ena gauna vata oya, e marau e dua na tama ni vuetaki mai na luvena yalewa yabaki lima

[Credit Line]

AP Photos/Dimitri Messinis