Na Uneune, Parofisai ena iVolatabu, Kei Iko

NI BERA ni mate, a tukuna taumada o Jisu na veika ena yaco ena vakaraitaka ni sa donuya tu na vuravura na “ivakataotioti ni ivakarau ni veika.” Na gauna oya ena vakatakilakilataki ena mate ca, na dausiga, kei na veivaluvaluti ena levu na vanua. E cavuta tale ga na “uneune lelevu e na veivanua e vuqa.” (Maciu 24:3, 7, NW; Luke 21:10, 11, VV) A dusia tiko beka o Jisu na noda gauna?

Levu era kaya ni sega ni vaka kina. Era kaya ni iwiliwili ni uneune e sega ni se bau tubu ena drau na yabaki sa oti. Ia na U.S. National Earthquake Information Center e kaya ni uneune e 7.0 na kena kaukaua e “dua tu ga” mai na kena ivakarau ena loma ni ika20 ni senitiuri.a

Ia dikeva, na vakayacori ni parofisai i Jisu e sega ni tukuni kina me tubu na iwiliwili se me kaukaua na uneune. A kaya ga o Jisu ni yaco na uneune lelevu ena vuqa na vanua. Kuria, a kaya ni veika oqo ena vakatakilakilataki kina na “[i]vakatekivu ni ka rarawa.” (Maciu 24:8) Na rarawa e sega ni vakarautaki ena iwiliwili ni uneune se kena ivakarau ena Richter scale, ia na vakacaca e cakava vei ira na lewenivanua.

Na uneune sa bau vakavuna dina na rarawa nikua. Ena ika20 ni senitiuri, vica vata na milioni era mate qai sega na nodra vale ena leqa vaka oqo. Era kaya na vuku ni rawa ni levei e so na mate. “Ena vanua era se qai vakatorocaketaki tiko,” e kaya na itukutuku mai na BBC, “sa sega ni bibi na lawa ni taravale, sa kauaitaki ga vakalevu me tara vakatotolo na vale isau lalai me vakacegui kina nodra gagadre na iwiliwili levu era toki tiko ina tauni.” Ni vakamacala tiko ena rua na vakacalaka wale ga oqo, e kaya kina o Ben Wisner, e dua e kila vinaka na leqa e dau yaco ena tauni: “E sega ni vakamatei ira na tamata oqo na uneune. E vu ga mai na cala ni tamata, e okati kina na tawaveikauaitaki, veidabui, kei na kocokoco.”

Io, so na gauna na kocokoco kei na sega ni veikauaitaki e dau vakavuna vakalevu duadua na leqa donuya na uneune. E vakavure vakasama ni kau cake mai na itovo oqo ena dua tale na parofisai ena iVolatabu me baleta na “veisiga maimuri” ni ituvaki oqo. Ena gauna oya, e kaya na iVolatabu, era na “daulomani ira walega na tamata, era na dauvinakata nai lavo,” ra qai “caca veiwekani.” (2 Timoci 3:1-5) Salavata kei na vosa i Jisu ni icavacava ni ivakarau ni veika, na parofisai oqo e vakaraitaka vakamatata nida sa volekata na gauna ena vakaceguya kina na Kalou na kawatamata era lomaleqataka tu mai na veika kece e vakavuna na mosi kei na rarawa​—okati kina na uneune lelevu.​—Same 37:11.

Oni via kila e levu tale na ka baleta na inuinui oqo e yavutaki ena iVolatabu? Veitaratara kei ira na iVakadinadina i Jiova ena nomuni yasayasa, se volavola ina itikotiko veiganiti era koto ena taqana e 5.

[iVakamacala e ra]