Kua ni Coko ina Veimauilavo

“E sega ni vakatauvimatetaki au na veimauilavo, au dau lewa vinaka tale ga na levu ni ilavo au vakayagataka kina. Ia e dua na ka meu vakatusa, ni veigauna ni noqu qito sa tiko ga na naba au na digitaka, niu vakila ni dau mana.”​—Linda.

ERA bucina e levu na dauveimauilavo na vakabauta ni mana e so na naba, se so na iyaya lalai. De ra na taura tu beka ga vakamamada na nodra dau vakamanamana, ia oqo sara ga na ka e dau lewa na nodra qito.

E so mada ga na dauveimauilavo era tini masuta na Kalou me vukei ira mera na winitaka na nodra qito. Ia e tukuna na iVolatabu ni Kalou e cati ira na kaya era qaravi koya ra qai “vakarautaka na teveli ni kana vua na kalou ni Kalougata.” (Aisea 65:11, NW) Io, e cata na Kalou dina na noda cakava e so na ka ena vakabulabulataka na kena vakabauti ni noda sotava na ka vinaka e vakatau ga ina noda kalougata. Ia, oya sara ga na uto ni vakasama e tiko ena veimauilavo, ni na nomu ga na kalougata ke donui iko na kena madigi.

Na veimauilavo e vakabulabulataka tale ga na kocova na ilavo. Nida bula tu li ena vuravura e vakanadakuya na veika vakayalo, sa okati me kalou na ilavo, na veimauilavo gona e dua na sala levu e sokaloutaki kina. E rawa ni tukuni ni tiko tale ga na kena valenilotu, oya, na vale lelevu ni veimauilavo, bau kina na kena yavu ni ivakavuvuli, ni sega ni ca na kocokoco. Era vakadeitaka na dauvakadidike, ni vuqa era dau sikova na valeniveimauilavo era kaya, ni kena usutu levu na nodra via lai “rawata kina na ilavo vakaitamera,” e sega ni baleta na nodra taleitaka na veika e caka e lomanivale oya se mera vaqara marau. Ia e veivakasalataki kina na iVolatabu: “Ni sa vu ni ka ca kecega na daulomana nai lavo: era sa daukocova eso, a ra sa vakacalai kina e na vakabauta, a ra sa cokai ira sara vakai ira e na yaluma vakavuqa.”​—1 Timoci 6:10.

Matata vinaka tale ga na ka e kaya na iVolatabu ena 1 Korinica 6:9, 10 (VV): “Ni kakua ni vakacalai; era na sega ni rawata na matanitu ni Kalou . . . na dau qarava na matakau . . . na daukocokoco.” E sega ni malumalumu ga vakayago na kocokoco; e dusia na tauvimate vakayalo e rawa ni vakavuleqa​—ia e rawa ni valuti.

Eratou Kunea na Kaukaua me Ratou Veisau

O Kazushige, e cavuti ena imatai ni ulutaga, e vakananuma lesu: “Au tovolea vakavica meu muduka na noqu veimauilavo. Niu vakila ni sa vakacaraka na noqu bula vakavuvale na veimauilavo au dau cakava kei ira na noqu itokani e rara ni veitauose. Keu rawailavo mada ga, ena cawadru kece niu na qitotaka tale. Na ilavo mada ga a bau maroroya tu na noqu lewenivale me baleta na sucu ni ikarua ni luve i keirau, au veimauilavotaka tale. Sa bau lai yaco niu sa tekivu veimauilavotaka na ilavo ni kabani au cakacaka tiko kina. E vakavuna meu sa beci au ga vakataki au. Dau tagi vakavuqa na watiqu ena nona vakamamasu meu tinia na noqu veimauilavo, ia sa sega ni rawa niu tarovi au.”

Sa qai tekivu vuli iVolatabu o Kazushige kei ira na iVakadinadina i Jiova. E kaya: “Na levu ga ni noqu wilika na iVolatabu au vakadeitaka rawa kina ni bula tiko na Kalou, ena yaga vei au keu vakarorogo vua. Au nuidei ke solia vei au na Kalou na kaukaua, au na muduka rawa na noqu veimauilavo. Au druka niu sega wale ga ni muduka rawa, au sa cata sara tale ga. Niu vakananuma lesu na rarawa e sotava na noqu vuvale ena vuku ni noqu veimauilavo, e tagi na yaloqu. Au vakavinavinaka vakalevu gona vua na Kalou o Jiova ni vukei au meu sereki mai na veivakabobulataki ni veimauilavo, qai vukei au ni dusimaka me vakainaki na noqu bula!”​—Iperiu 4:12.

O John, e cavuti tale ga ena imatai ni ulutaga, a tekivu vuli iVolatabu tale ga. Ni vakanananu lesu, e kaya: “A vukei au na noqu vuli iVolatabu meu vakalewa rawa kina na ituvaki au tu kina. Au qai vakila vakadua ni tadola na mataqu meu raica na leqa e kauta mai na noqu veimauilavo vei keitou vakavuvale. Au kidava rawa tale ga kina ni veimauilavo e vakabulabulataka na tawaveinanumi kei na kocokoco​—na ivakarau ni yalo e cata o Jiova. Ni toso na noqu vuli, na noqu lomani Jiova e solia vei au na kaukaua meu muduka na veimauilavo. Na vu ni noqu a tekivu veimauilavo, niu vatavatairalagotaka e dua na bula e vinaka cake. Ia niu sa sega ni veimauilavo, au qai marautaka na noqu qaravi Jiova, sa vakavatukana na ka au a gadreva oya.”

O Linda, na lewenivale i John, a nakita tale ga me sa kua ni veimauilavo. “E dredre,” e kaya. “Ia ni keirau sa tekivu vuli iVolatabu vakaveiwatini kei ira na iVakadinadina i Jiova, au vulica meu vakaliuca ga na veika e bibi ena noqu bula. Au vulica meu kua ni lomana ga na veika e lomana na Kalou, ia meu cata tale ga na ka e cata o koya, e okati e ke na veibasoga kece ni yalokocokoco. Sa vakainaki kina na noqu bula, qai kuria oya, ni bau tawa tale ga kina na noqu bausi!”​—Same 97:10.

Ke o bucina na veiwekani kei koya na Kalou o  Jiova, o na kunea na kaukaua kei na yalomatua e gadrevi mo kua ni coko kina ina veimauilavo. Ena vakavinakataka tale ga na nomu ituvaki vakailavo, na yalomu kei na nomu bula vakayalo. O na qai vakila na dina ni veivosa e volai ena Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”

[Tikina bibi ena tabana e 11]

E sega ni malumalumu ga vakayago na kocokoco; e dusia na tauvimate vakayalo e rawa ni vakavuleqa

[Kato/iYaloyalo ena tabana e 9]

Veimauilavo kei na Kaukaua Tani

Ena dua na itukutuku era vakauta na dauvakadidike ena Duke University ina National Gambling Impact Study Commission, era kaya ni tiko na kedrau isema na sala e kacivaki kina na veimauilavo kei na vakabauti ni kaukaua tani. E kaya na itukutuku oqo: “E sega tale ni qai vunitaki na domodomoiyau e laurai ena kena kaburaki na [lottery] . . . Ia e sega ni rawati na iyau oqo mai na buno kei na sasaga, e rawati mai na mana qai yavutaki ena tatadra, vakamanamana, kei na vatavatairalago. Macala vinaka tale tu ga vei ira na vakacici lottery, nira biuta na nodra beti na kenadau ni qito oqo, era na yavutaka ena ka era vakamanamanataka, ina nodra horoscope, na ka e kaya na daukilakila, se na ‘ivola ni tadra’ era vakamareqeta. E tuvai ena ivola oqo na yaca, tikinisiga, kei na tadra, qai toka tarava na kena naba. Era sega tale ga ni via tukuna vakamatata na vakacici lottery vei ira na dauveimauilavo ni naba kece e rawa ni digitaki, se, ke ra digitaka na naba e dau digitaki vakalevu, sa macala ni na vakalailaitaka na ka era na rawata, vakauasivi ena beti e rara ni veitauose. Ia era lewa na vakacici lottery mera uqeti ira na dauveimauilavo mera dui digia na naba e vakaibalebale vei ira (ra qai vakayagataka) ga oya.”

[iYaloyalo ena tabana e 10]

“Na noqu lomani Jiova e solia vei au na kaukaua meu muduka na veimauilavo.”​—John

“Sa vakainaki kina na noqu bula, qai kuria oya, ni bau tawa tale ga kina na noqu bausi!”​—Linda

[iYaloyalo ena tabana e 10]

“Au druka niu sega wale ga ni muduka rawa, au sa cata sara tale ga.”​—Kazushige