Rai ni iVolatabu

Meda Vakayagataka Vakacava na Noda Galala?

E BULI Atama kei Ivi na Kalou qai solia vei rau na galala me rau lewa ga na ka erau cakava. E solia vei Atama me lewa na were o Iteni. E okati ena itavi i Atama nona vakayacani ira na manumanu. (Vakatekivu 2:15, 19) Koya e bibi sara, e rawa me rau vakatulewataka me rau qarava na Kalou se sega.​—Vakatekivu 2:17, 18.

Me yacova mai oqo, e sega ni wili rawa na levu ni ka e sa vakatulewataka na tamata​—e levu na vakatulewa vinaka, so era sega soti ni vinaka, qai so era vakatulewa ca sara ga. E so na vakatulewa ni tamata e lai tini ena vanua vakaloloma sara. Ia, e se sega vakadua ni kauta laivi na Kalou noda galala ni vakatulewa. Ni Tamada dauloloma, e vakarautaka mai ena iVolatabu e so na idusidusi yaga me vukei keda ena noda vakatulewa. E veivakasalataki tale ga ena leqa e rawa ni yaco kevaka eda digidigi cala. E kaya na iVolatabu nida na tamusuka ga na ka eda kaburaka.​—Kalatia 6:7.

Ka Eda Dui Vakatulewataka

E vakaraitaka sara ga vakamatata o Jiova na lomana ena so na ka, qai dau solia vei keda e so na idusidusi matata ena veika oqori. Ia, vakalevu me sega ni vakalawataka na iVolatabu na ka meda cakava ena noda dui bula. E dau vakarautaka ga e so na ivakasala, qai solia vei keda na galala meda digia na ka eda dui vinakata. Kena ivakaraitaki, raica mada na ka e kaya me baleta na ka ni veivakamarautaki.

E kaya na iVolatabu ni o Jiova e “Kalou mamarau.” (1 Timoci 1:11, NW) E kaya na nona Vosa ni tiko na “siga ni dredre” kei na “siga me ia kina na meke.” (Dauvunau 3:1, 4) Kaya na iVolatabu ni dau qiriqiri o Tui Tevita me veivakacegui kina. (1 Samuela 16:16-18, 23) A tiko o Jisu ena dua na soqo ni vakamau, veivuke tale ga kina ena nona vukica na wai me waini.​—Joni 2:1-10.

Ia, e veivakasalataki na iVolatabu: “Ena vuku mai ko koya sa malele vata kei ira na vuku: Ia ko koya era veitokani vata kei na lialia ena rusa.” (Vosa Vakaibalebale 13:20) E cata na Kalou na “veiwali lialia” kei na itovo vakasisila, e rawa sara ga ni vakaleqa na noda veiwekani kei koya. (Efeso 5:3-5, VV) Ni tekivu na gunu ena dua na soqo, e rawa ni yaco na leqa levu ke sega na lewa matau. (Vosa Vakaibalebale 23:29-35; Aisea 5:11, 12) E cata tale ga na ivalavala kaukaua o Jiova.​—Same 11:5; Vosa Vakaibalebale 3:31.

Era vukei keda na veitikinivolatabu oqo me tiko vei keda na rai ni Kalou me baleta na veivakamarautaki. Ni vakatulewa na lotu Vakarisito, ena kauai me raica se cava e kaya na iVolatabu. Qai sega ni vakabekataki ni o keda kece eda na sotava na vinaka se ca ni noda vakatulewa.​—Kalatia 6:7-10.

Era vakadreti tale ga na lotu Vakarisito mera kauaitaka na ivakavuvuli vakaivolatabu nira vakatulewataka na veika e so me vaka na isulusulu, vakamau, susu gone, kei na veika vakabisinisi. Era okati e ke na veika e sega ni cavuti vakadodonu ena iVolatabu, ia na ivakavuvuli ga era tu ena iVolatabu e rawa nira vukei keda meda tauca na lewa ena vinaka kina noda lewaeloma. (Roma 2:14, 15) Na noda vakatulewa kece na lotu Vakarisito e dodonu me yavutaki ena ivakavuvuli oqo: “O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou.”​—1 Korinica 10:31.

Nida veivosakitaka tiko na ka e baleta noda dui vakatulewa, e bibi tale ga meda nanuma na ivakavuvuli oqo me baleta na noda ‘dui qarava ga na ka e noda yadua.’ (1 Cesalonaika 4:11, VV) E levu na ka e rawa nida digia na lotu Vakarisito e sega ni veisaqasaqa kei na loma ni Kalou. O koya gona, na ka ena digia e dua na lotu Vakarisito e rawa ni duidui mai na ka e digia e dua tale. Ena sega ni taleitaka na Kalou me dua na lotu Vakarisito e via lai lewa na ka e digia e dua tale. (Jemesa 4:11, 12) E veivakasalataki vakadodonu na iVolatabu: “Me kakua ga ni vakararawataki e dua vei kemuni me . . . via lewa nodra ka na tani.”​—1 Pita 4:15, VV.

Noda Vakatulewa Meda Qarava na Kalou

E vakaraitaka na iVolatabu na yaga ni noda talairawarawa vua na Kalou. Ia, e sega ga ni vakasaurarataki keda na Kalou meda qaravi koya, e sureti keda ga. Me kena ivakaraitaki, e kaya na iVolatabu: “Tou mai lotu ka cuva sobu: Tou mai vakatekiduru e na mata i Jiova, o koya ka buli keda.”​—Same 95:6.

A vaka oqo na nodra sureti na Isireli ena gauna makawa. Ena 3,500 vakacaca na yabaki sa oti, a lai tu kina ena mata ni ulunivanua o Saineai na matanitu o Isireli, sa qai vakaraitaka na Kalou na ivakarau ni lotu dina e qai volai ena Lawa a soli vei Mosese. A vakatau sara ga vei ira na ka mera cakava: Era na qarava beka na Kalou se sega? Na cava era qai cakava? Era kaya ena domovata: “A ka kecega sa kaya ko Jiova keimami na cakava, ka talairawarawa.” (Lako Yani 24:7) E nodra digidigi sara ga mera qaravi Jiova.

Ena imatai ni senitiuri, e tekivutaka kina o Jisu na vunautaki ni itukutuku vinaka ni Matanitu ni Kalou. (Maciu 4:17; 24:14) A sega ni vakasaurarataka e dua me tomani koya ena cakacaka oqo. A veisureti ga vakayalololoma ena nona kaya: “Lako mai ka muri au.” (Marika 2:14; 10:21) Levu era ciqoma nona veisureti, era tomani koya sara ena vunau. (Luke 10:1-9) Toso na gauna sa ra lewa e so mera biuti Jisu. A digia o Jutasa me volitaki koya. (Joni 6:66; Cakacaka 1:25) E muri, ena nodra veituberi na yapositolo, era yaco tale kina e so mera tisaipeli, era sega ga ni a vakasaurarataki, e nodra digidigi sara ga. O ira oqo era yaco mera “vakabauta” nira a “vakarau tu me vinakata na bula.” (Cakacaka 13:48; 17:34) O ira tale ga na lotu Vakarisito nikua e nodra digidigi sara ga mera talairawarawa ina Vosa ni Kalou, ra muria tale ga na ivakavuvuli i Jisu.

E macala vakasigalevu ni vinakata na Kalou meda vakatulewa sara ga vakataki keda. E vakarautaka tale ga na idusidusi ena iVolatabu me vukei keda meda vakatulewa vinaka. (Same 25:12) Ia, ni dui vakatulewa na lotu Vakarisito, me kua sara ni guilecava na ivakavuvuli vakalou. Ena sala ga oqo sa na qai rawa kina nida vagolea vua na Kalou na ‘veiqaravi tabu eda sa vakasama kina vakatitobu.’​—Roma 12:1, NW.