Vakatulewa Vakavuku ni o se iTabagone

1. Na cava era marautaka tu qo e levu na itabagone?

EDA bula tu qo ena dua na gauna vakairogorogo. Era sa tabili mai ina sokalou dina e milioni na tamata mai na veimatanitu ni vakatauvatani kei na veigauna sa oti. (Vkta. 7:​9, 10) E levu na itabagone era sa marautaka tiko nodra vukei ira na tamata mera mai kila na ka dina vakaivolatabu. (Vkta. 22:17) Eso na itabagone era sa veivakavulici tiko ena iVolatabu, era sa vukei ira tiko na tamata me vinaka na ivakarau ni nodra bula. Eso tale era gumatua ni vunautaka na itukutuku vinaka ina yalava e duatani na kena vosa. (Same 110:3; Aisea 52:7) Na cava mo cakava mo vakaitavi ena cakacaka marautaki era sa vakaitavi tiko kina na tamata i Jiova?

2. E laurai vakacava ena ivakaraitaki i Timoci ni vinakata o Jiova me lesia vei ira na itabagone na itavi ni veiqaravi? (Raica na imatai ni yaloyalo.)

² Ni o se itabagone, na vakatulewa o cakava e rawa ni dolava eso tale na katuba ni veiqaravi o na marautaka. Kena ivakaraitaki, na vakatulewa vinaka a cakava o Timoci mai Lisitira a lesi kina me daukaulotu ni sa rairai volekata na yabaki 20 se sivia. (Caka. 16:​1-3) Kena irairai ni oti e vica na vula tarava, a biubiu na yapositolo o Paula mai na ivavakoso vou o Cesalonaika ni kaukaua na veivakacacani, ia a lesia na cauravou o Timoci me lesu i Cesalonaika me vakaukauataki ira na mataveitacini ekea. (Caka. 17:​5-15; 1 Ces. 3:​1, 2, 6) Vakasamataka mada se tarai Timoci vakacava nona lesi ena itavi qori!

NA VAKATULEWA BIBI DUADUA

3. Na cava na vakatulewa bibi duadua o rawa ni cakava ena nomu bula, gauna cava o rawa ni cakava kina?

³ Na gauna vakaitabagone e gauna me vakayacori kina na vakatulewa bibi. Ia vei ira kece na vakatulewa o cakava, e bibi duadua na nomu vakatulewataka mo qaravi Jiova. Na gauna cava me vakayacori kina na vakatulewa qori? E tukuna o Jiova: ‘Mo nanumi koya e Buli iko ena nomu gauna vakaitabagone.’ (Dauv. 12:1) Na sala duadua ga mo ‘nanumi’ Jiova kina, oya mo qaravi koya mai vu ni lomamu. (Vkru. 10:12) Qori e vakatulewa bibi duadua. Ena tara sara ga nomu bula taucoko.​—Same 71:5.

4. Na cava eso tale na vakatulewa bibi ena tara na nomu qaravi Kalou?

⁴ Ena sega wale ga ni na tara na nomu bula taucoko na nomu vakatulewataka mo qaravi Jiova. Kena ivakaraitaki, o na rairai vakasamataka mo vakawati, o cei mo vakawatitaka, kei na ka mo cakava mo rawa ni qaravi iko kina. Qo era vakatulewa bibi kece, ia e ka vakayalomatua mo vakatulewataka mada e liu mo qaravi Jiova mai vu ni lomamu. (Vkru. 30:​19, 20) Na vuna? Baleta era veisemati na vakatulewa kece o cakava. Na vakatulewa o cakava me baleta na vakawati kei na cakacaka ena tara na nomu qaravi Kalou. (Vakatauvatana Luke 14:​16-20.) Ena yasana adua, na nomu vinakata mo qarava na Kalou ena tara na nomu vakatulewa me baleta na vakawati kei na cakacaka. Koya gona, vakatulewataka mada e liu na veika e bibi cake.​—Fpai. 1:10.

NA CAVA O NA CAKAVA ENA GAUNA VAKAITABAGONE?

5, 6. Vakamacalataka se yaga vakacava ina noda bula ena gauna se bera mai na vakatulewa vinaka eda cakava. (Raica tale ga na ulutaga “Noqu Vakatulewa Niu se Gone” ena itabataba qo.)

⁵ Ni o sa vakatulewataka mo qarava na Kalou, saga mo kila na veika e vinakata o koya, qai vakatulewataka na sala mo qaravi koya kina. E vola e dua na tacida tagane mai Japani: “Niu se yabaki 14, keirau veitomani kei na dua na qase ni ivavakoso ena cakacaka vakavunau, a raica o koya niu sega ni marautaka tiko na noqu cakacaka vakaitalatala. A mani kaya vakamalua vei au: ‘Yuichiro, lako mada i vale lai vakasamataka vinaka na veika sa cakava vei iko o Jiova.’ Au mani vakayacora na ka e tukuna. E vica na siga noqu masu kei na noqu vakasamataka tiko na tikina qori. Toso na gauna, sa veisau na ivakarau ni noqu rai, au sa qai marautaka noqu qaravi Jiova. Au dau taleitaka meu vakawilika na veika e baleti ira na daukaulotu, au sa qai vakasamataka meu qaravi Jiova mai vu ni lomaqu.”

⁶ E tomana o Yuichiro, “Au mani vakasamataka meu sa tekivu vakayacora eso na vakatulewa, ena rawa niu qaravi Jiova kina e vanuatani. Kena ivakaraitaki, au vakatulewataka meu vulica na vosa vakavalagi. Ena gauna au sa biu vuli kina, au vakatulewataka meu cakacaka vagauna meu veivakavulici ena vosa vakavalagi me rawa niu painia tiko kina. Ena gauna au sa yabaki 20 kina, au tekivu vulica na vosa vakaMongolia, au sikova tale ga e dua na iwasewase lailai era vosataka na vosa qori. Ni oti e rua na yabaki, qori ena 2007, au sikovi Mongolia. Niu gole ena cakacaka vakavunau kei so na painia, au raica ni levu na tamata era via kila tu na ka dina, au vinakata sara ga meu toki ekea meu veivuke. Au mani lesu i Japani meu lai vakavakarau. Au se tekivu painia tiko mai Mongolia ena Epereli 2008. E sega ni rawarawa na bula eke. Ia e levu era sa ciqoma na itukutuku vinaka, au sa vukei ira tale ga mera toro voleka vei Jiova. Au kila ni vakatulewa au cakava e ivakarau ni bula vinaka duadua.”

7. Na vakatulewa cava meda cakava yadudua, kei na cava eda vulica ena ivakaraitaki i Mosese?

⁷ Nida iVakadinadina i Jiova eda na dui vakatulewataka na sala eda na vakayagataka kina noda bula. (Josua 24:15) Ena sega ni dua ena tukuna vei iko mo vakawati se sega, o cei mo vakawatitaka, se na cakacaka mo digitaka. Vakacava o na digia na cakacaka ena lailai ga na gauna mo vulica kina? Eso vei kemuni na itabagone lotu vaKarisito oni tiko ena vanua era sega ni rawati ira; eso era tiko ena vanua vutuniyau. E veiyasa i vuravura, e duidui na nomuni ivakarau ni rai, na veika oni rawa ni cakava, na kilaka, veika oni taleitaka kei na nomuni vakabauta. De dua na duidui ni kemuni ituvaki e tautauvata vinaka kei na duidui e laurai vei ira na itabagone Iperiu e Ijipita makawa kei na cauravou o Mosese. O Mosese a vakavulici ena ka me baleti ira na vuvale vakatui, ia o ira na vo ni Iperiu era bobula. (Lako 1:​13, 14; Caka. 7:​21, 22) Me vakataki iko ga, era bula tu ena dua na gauna vakairogorogo. (Lako 19:​4-6) A vinakati mera dui vakatulewataka na ka era na cakava ena nodra bula. Ia a donu na vakatulewa a cakava o Mosese.​—Wilika Iperiu 11:​24-27.

8. Na cava ena vukei ira na itabagone era vakasamataka tiko na vakatulewa mera cakava ena nodra bula?

⁸ E rawa ni vukei iko o Jiova mo vakatulewa vinaka ni o se itabagone. E veivakasalataki ena nona vakarautaka na ivakavuvuli mo muria ena dui ituvaki o sotava. (Same 32:8) E rawa ni vukei iko tale ga o rau nomu itubutubu kei ira na qase ni ivavakoso ena sala mo muria kina na ivakavuvuli qori. (Vkai. 1:​8, 9) Meda dikeva mada e tolu na ivakavuvuli vakaivolatabu e rawa ni vukei iko mo vakatulewa vakayalomatua me vinaka kina nomu bula ena gauna se bera mai.

TOLU NA IVAKAVUVULI VAKAIVOLATABU ME DUSIMAKI IKO

9. (a) E dokai keda vakacava o Jiova ena nona solia na galala ni vakatulewa? (b) Na cava ena yaco ke o ‘vakaliuca taumada na veika me baleta na Matanitu ni Kalou’?

⁹ Vakaliuca taumada na Matanitu ni Kalou kei na nona yalododonu. (Wilika Maciu 6:​19-21, 24-26, 31-34.) E dokai keda o Jiova ena nona solia na galala ni vakatulewa. E sega ni tukuna o koya na levu ni gauna mo vakayagataka ena nomu bula vakaitabagone ena kena vunautaki na itukutuku ni nona matanitu. Ia e vakarautaka o Jisu na ivakavuvuli meda rawa kina ni vakaliuca na Matanitu ni Kalou. Ni o muria na veika e tukuna, ena levu na sala o na vakaraitaka kina ni o lomana na Kalou, kauaitaki ira na tiko tikivi iko, kei na nomu vakavinavinakataka na inuinui ni bula tawamudu. Ni o vakasamataka tiko na vakawati kei na cakacaka, dikeva mada se vakatulewa qori ena vakavuna mo lomaocaocataka na veika vakayago se ena uqeti iko mo gumatuataka na veika me baleta na Matanitu ni Kalou kei na nona yalododonu.

10. Na cava e vakamarautaki Jisu, na vakatulewa cava ena vakamarautaki iko?

¹⁰ Marautaka nomu qaravi ira na so tale. (Wilika Cakacaka 20:​20, 21, 24, 35.) Qori na ivakavuvuli bibi a vakavulici keda o Jisu me baleta na bula. E dau marau vakalevu o Jisu ni vakaliuca na loma i Tamana, sega ni lomana. E vakamarautaki Jisu nodra ciqoma na itukutuku vinaka na yalomalumalumu. (Luke 10:21; Joni 4:34) De dua o sa vakila na marau e vu mai nomu vukei ira na so tale. Ke o yavutaka na vakatulewa bibi o dau vakayacora ena nomu bula ena ivakavuvuli a vakavulica o Jisu, o na mamarau, ena marau tale ga o Jiova.​—Vkai. 27:11.

11. Na cava e sega ni marau kina o Peruki, na cava e vakasalataki koya kina o Jiova?

¹¹ Eda na marau vakalevu nida qaravi Jiova. (Vkai. 16:20) A lecava na tikina qori o Peruki, na vunivola i Jeremaia. A yaco e dua na gauna me sega ni marautaka nona qaravi Jiova. A mani tukuna vua o Jiova: “Ko sa dauqara beka eso na ka levu me nomu? Mo kakua ni dauqara: raica, au na vakayacora na ca vei ira na tamata kecega, . . . ka’u na solia vei iko na nomu bula me nomui toki ni valu e na veiyasana kecega ko sa lako voli kina.” (Jere. 45:​3, 5) Na cava o nanuma ena vakamarautaki Peruki​—nona qara na veika lelevu se me vakabulai ni vakarusai o Jerusalemi me vaka ni dua na dauveiqaravi yalodina ni Kalou?​—Jeme. 1:12.

12. Na vakatulewa cava e vakamarautaki Ramiro?

¹² Kena ivakaraitaki o Ramiro, e dua na tacida tagane e marautaka nona dau vukei ira eso tale. E kaya: “Au susu ena vuvale dravudravua ena dua na koro ena veiulunivanua na Andes. E vinakata o tuakaqu me sauma na noqu icurucuru meu vuli ena univesiti, au kalougata sara ga ni dau yaco vakavudua qori. Ia au sa qai papitaiso ga meu dua na iVakadinadina i Jiova, e sureti au tale tu ga e dua na painia me keirau lai cakacaka vakavunau ena dua na taoni lailai. Au mani gole ekea, vulica na veikoti, dua sara noqu sitoa ni koti ulu me rawa ni tokoni au vakailavo. E levu era ciqoma na neirau veisureti ena kena vulici na iVolatabu. Ni toso na gauna au lewena e dua na ivavakoso sa qai tauyavu vou, era vosataka na vosa ni vanua ya. E sa tini na yabaki noqu veiqaravi tiko qo vakatabakidua. E sega tale ni dua na cakacaka e rawa ni vakamarautaki au me vaka noqu vukei ira na tamata mera vulica na iVolatabu ena nodra vosanisucu.”

13. Na cava e tukuni kina ni gauna vinaka mo qaravi Jiova mai vu ni lomamu ni o se itabagone?

¹³ Marautaka nomu qaravi Jiova ni o se itabagone. (Wilika Dauvunau 12:1.) E sega ni vinakati mo lai nanuma ni bibi me dua mada nomu cakacaka vinaka mo qai qaravi Jiova e muri. Na bula vakaitabagone e gauna vinaka mo tekivu qaravi Jiova kina mai vu ni lomamu. E levu na itabagone e sega ni levu na nodra icolacola vakavuvale, era bulabula vinaka qai tu vei ira na igu mera qarava kina na itavi dredre. O na qaravi Jiova vakacava ena nomu bula vakaitabagone? De dua o na via painia se cakacaka ena yalava e duatani na kena vosa. Se o via vakarabailevutaka nomu veiqaravi ena ivavakoso o lewena. Se mani isausau cava o via tadolova ena nomu veiqaravi vua na Kalou, e bibi me tiko e dua nomu ivurevure ni ilavo. Na cakacaka cava o na digia, ena vakacava na levu ni vuli ena vinakati kina?

MURIA NA IVAKAVUVULI VAKAIVOLATABU MO VAKATULEWA KINA VAKAYALOMATUA

14. Na cava me qarauna e dua ni vakasamataka tiko nona veigauna se bera mai?

¹⁴ Na tolu na ivakavuvuli vakaivolatabu eda sa veivosakitaka mai ena uqeti iko mo dikeva na cakacaka o na vinakata. O ira na dauveivakasalataki e koronivuli era kila vinaka na cakacaka e tiko ena nomu vanua. Se tiko eso na tabana vakamatanitu era rawa ni tukuna vei iko na cakacaka e gadrevi vakalevu ena nomu vanua se ena vanua o via veiqaravi kina. E rawa ni yaga na itukutuku qori, ia e bibi na qaqarauni. O ira na sega ni lomani Jiova era na rairai uqeti iko mo lomani vuravura. (1 Joni 2:​15-17) Ni o raica na veika e dulaka tu o vuravura, ena rawarawa sara me vakaisini iko na lomamu.​—Wilika Vosa Vakaibalebale 14:15; Jere. 17:9.

15, 16. O cei ena dusimaki iko vinaka ena veika me baleta na cakacaka?

¹⁵ Ni o sa kila na cakacaka e ganiti iko, mo qara ivakasala sara. (Vkai. 1:5) Ia o cei era rawa ni vakayagataka na ivakavuvuli vakaivolatabu mera vukei iko mo vakalewa vinaka na cakacaka o digia? Rogoca na veika era tukuna o ira era lomani Jiova, era lomani iko, era kilai iko vinaka kei na kemu ituvaki. Era na tukuna vei iko na ka dina o rawa ni cakava kei na ka o sega ni rawa ni cakava. De dua na ka era na tukuna ena uqeti iko mo vakasamataka tale na nomu isausau. Ena yaga sara ke rau lomani Jiova na nomu itubutubu! Era rawa ni vukei iko tale ga na qase ni ivavakoso nira matua vakayalo. Kena ikuri, veitalanoa kei ira na painia kei ira na ivakatawa dauveilakoyaki. Na cava era vakatulewataka kina mera qarava vakatabakidua na Kalou? Era tekivu painia vakacava, na cava era cakava mera tokoni ira kina vakailavo? Na veivakalougatataki cava era sotava ena cakacaka vakaitalatala?​—Vkai. 15:22.

¹⁶ O ira era kilai iko vinaka era na vakasalataki iko vakayalomatua. Kena ivakaraitaki, de dua o sa vinakata mo sa biu vuli mo tekivu painia ni o sega ni taleitaka na cakacaka levu e vinakati mai koronivuli. De dua o koya e lomani iko ena kila na nomu inaki, ena uqeti iko mo kila ni rawa ni vukei iko na vuli mo kua ni dau soro, qori na itovo e vinakati mo qaravi Jiova kina mai vu ni lomamu.​—Same 141:5; Vkai. 6:​6-10.

17. Na vakatulewa cava meda qarauna?

¹⁷ O ira kece era qaravi Jiova era dau sotava na ituvaki e rawa nira vakaleqai kina vakayalo, qori na veika ena rairai vakavuna mera yawaki Jiova. (1 Kor. 15:33; Kolo. 2:8) Ia e tiko eso na cakacaka e rawa ni veivakaleqai vakayalo ni vakatauvatani kei na so tale. Vakacava o bau kila e dua e ‘voca nona vakabauta’ ena cakacaka e digia? (1 Tim. 1:19) Ena ka vakavuku dina mo qarauna na vakatulewa ena vakaleqa na nomu veiwekani kei Jiova.​—Vkai. 22:3.

MARAUTAKA NI O DUA NA LOTU VAKARISITO GONE

18, 19. Ke dua e se sega ni vu mai lomana me vakarabailevutaka nona qaravi Jiova, na cava me cakava?

¹⁸ Ke o sa bucina na yalo ni via qaravi Jiova, marautaka sara na itavi ni veiqaravi kece e soli vei iko ni o se gone. Mo vakayacora mada ga na vakatulewa ena vukei iko mo marautaka nomu qaravi Jiova ena gauna vakairogorogo qo.​—Same 148:​12, 13.

¹⁹ Ena yasana adua, na cava mo cakava ke se sega ni vu mai lomamu mo vakarabailevutaka nomu qaravi Jiova? Sasagataka tiko ga me kaukaua nomu vakabauti Jiova. A sasagataka na yapositolo o Paula me muria na ivakarau ni bula ena vakalougatataki koya kina na Kalou, oti sa qai vola: “Ke mani duatani kina nomuni rai, na Kalou ena vakatakila vei kemuni na rai donu. Ia se mani toso cava eda sa cakava, meda toso tiko ga i liu ena ivakarau vata ga qori.” (Fpai. 3:​15, 16) Mo dau vakananuma na loloma i Jiova kei na nona ivakasala vuku. O Jiova duadua ga e rawa ni vakarautaka na veivuke vinaka duadua mo vakatulewa vinaka kina ena nomu bula vakaitabagone.