Na Matanitu e Tutaka na iTovo Vakalou

VAKASAMATAKA mada na vuravura e dua ga na kena matanitu me baleti ira na veimatatamata kei na duivosavosa. Na matanitu oqo e kilai ni tutaka na itovo vinaka qai vakaotia na ivalu, veicati, basulawa, dravudravua, benuci ni vuravura, tauvimate, kei na mate sara mada ga!

‘Sa dua dina na ka vinaka, ia sa na sega tu ga ni rawa,’ o na rairai kaya. Sega, e tiko na vakanuinui. Ena yaco dina. A yalataka o Jisu e dua na matanitu vaka oqo. A vakavulici ira sara mada ga nona imuri mera masulaka: “Mo dou qai masu kina vaka oqo: ‘Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.’”​—Maciu 6:9, 10, VV.

O sa na rairai kila toka na qaqanimasu oya, baleta ni vica vata na milioni na tamata e vuravura era kila se ra sa rogoca oti. Ia o sa bau vakasamataka vakavinaka na ibalebale ni veivosa oya? Dikeva ni matanitu oqo e semai vata tiko kei na vakayacori ni loma ni Kalou e vuravura. Na cava gona na Matanitu ni Kalou? Kei na cava na loma ni Kalou me baleta na noda vuravura?

Na Matanitu ni Kalou

Na Matanitu ni Kalou na sala ena vakaraitaka kina na Kalou o Jiova na dodonu ni nona veiliutaki cecere. E matanitu vakatui e liutaka na Luvena, o Jisu Karisito. E tasereki ena Same 37:10, 11 na loma ni Kalou me baleta na vuravura: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”

Koya gona kevaka o vakila ni o yalolailai ena vuku ni torosobu ni itovo e vuravura, kua ni lomaleqa. Na iVolatabu e yalataka ni sa voleka ni veisautaki vakadua na ituvaki kei na ivakarau kei vuravura. E veivakayaloqaqataki dina na vosa ni yalayala ni Matanitu ni Kalou ena vakarau liutaka na vuravura me tutaka na itovo vakalou.

Na noda vulica meda nuitaka na vosa ni yalayala me baleta na Matanitu ni Kalou ena vakadeitaki keda. Dikeva mada na veika ena vakayacora na veiliutaki ni Matanitu ni Kalou: “Dou mai raica na cakacaka i Jiova, ni sa ia na veivakarusai e loma i vuravura. Sa vakaotia nai valu mai nai yalayala kei vuravura.” (Same 46:8, 9) Sa dua dina na vosa ni yalayala totoka ni sautu kei na tiko vinaka!

Ena parofisai me baleta na Tui ni Matanitu ni Kalou, o Jisu Karisito, e kaya kina na Same 72:12-14: “Ni na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua. Ena vakabula na yalodra mai na lawaki kei nai valavala kaukauwa: ena ka talei talega e matana na kedra dra.”

iTovo e Cavuti ena iVolatabu

Dikeva mada e so na itovo e vakauqeta na iVolatabu: “Era marau o ira era kauaitaka na nodra gagadre vakayalo.” (Maciu 5:3, NW) Dua tale: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.”​—Vosa Vakaibalebale 3:5, 6.

Na iVolatabu tale ga e kaya nida na dui saumitaro ena itovo ni bula eda digitaka. Dikeva mada na Dauvunau 11:9: “Mo reki, ko iko na cauravou, ni ko sa cauravou tiko; ka marau e lomamu e na veisiga ko sa cauravou kina, ka muria na sala sa lomamu kina, kei na ka sa gole kina na matamu: ia mo kila ga, ni na lewai iko na Kalou e na ka kecega oqo.” E vakamacalataki vinaka sara oqo ena Vosa Vakaibalebale 2:21, 22: “Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”

Ena itukutuku veivakauqeti ni matanitu vinaka oqo, e bibi kina meda veiwekani voleka sara kei na Kalou! Na noda veimaliwai kei ira na so era diva tale ga mera liutaki ena Matanitu ni Kalou ena vukei keda meda bulataka na bula eda na vakila kina na veiliutaki ni matanitu lagilagi oqo kei na veika vakasakiti ena kauta mai.

[iYaloyalo ena tabana e 10]

O ira na yalomalumalumu era na “taukena na vanua” ra qai “daumarau tiko e na veivakacegui vakaidina.”​—SAME 37:11.