Na Rai ni iVolatabu

Ra Gadreva na Gone Nodra Veikauaitaki na iTubutubu

E TIKO beka na nona gauna na Luve ni Kalou me lai veimaliwai kina kei ira na gone? Era vakabauta e so na nona tisaipeli ni sega. Ena dua mada ga na gauna era saga mera tarovi ira na gonelalai mera lako vei Jisu. Sa qai tukuna vei ira na tisaipeli o Jisu: “Dou laivi ira na gone lalai me ra lako mai vei au, ka mo dou kakua ni tarovi ira.” Sa qai kidavaki ira vakayalololoma na gone qai veivosaki kei ira. (Marika 10:13-16) E vakaraitaka e ke o Jisu ni dau kauaitaki ira na gone. Era na vakatotomuri koya vakacava na itubutubu ena gauna oqo? Era na cakava oqori ena nodra vakavulici luvedra vakavinaka ra qai dau veimaliwai kei ira.

Macala ni o ira na itubutubu nuitaki era na saga mera karoni luvedra ra qai sega ni vakararawataki ira. E rawa ni tukuni ni “kena ivakarau ga” vei ira na itubutubu mera dokai luvedra ra qai kauaitaki ira. Ia e vakarota na iVolatabu, ni levu ena noda gauna oqo “era na caca veiwekani.” (2 Timoci 3:1-3) Vei ira era dau lomani luvedra, e rawa ni levu tale na ka era vulica mera itubutubu nuitaki kina. Na ivakavuvuli vakaivolatabu gona ena vakarau veivosakitaki oqo ena vukei ira na itubutubu era vinakata me vinaka na luvedra.

Veituberi, Kua ni Veivakacudrui

E kaya ena dua na gauna o Robert Coles, e qasenivuli kilai qai vuniwai tale ga ni mona: “Sa tiko rawa vei ira na gone na yalo ni via caka vinaka. Au vakabauta ni soli vakalou, era gadreva gona na veituberi.” O cei ena vakaceguya na gagadre oqori?

E vakauqeta na Efeso 6:4, NW: “Kemuni na tama, ni kua ni vakacudrui ira na luvemuni, ia ni vakavulici ira ena ivakavuvuli kei na ivakarau ni vakasama i Jiova.” O raica rawa beka ni iVolatabu e vakacolati ira na tama mera bucina e loma i luvedra mera lomana na Kalou ra qai muria na nona ivakatagedegede? Ena Efeso wase 6 tikina e 1, e okati rau ruarua o tama kei tina na yapositolo o Paula ena nona tukuna vei ira na gone mera ‘talairawarawa vei ira na nodra qase.’a

Koya gona, ke yali o tama, ena colata o tina na itavi ni veivakavulici. Levu na tina le dua era tuberi luvedra rawa ena ivakavuvuli kei na ivakarau ni vakasama ni Kalou o Jiova. Ia, ke vakawati tale o tina, ena liutaka o watina lotu Vakarisito na veituberi. Ena tu vakarau o tina me muria na veiliutaki i watina ena nodra tuberi kei na nodra vakavulici na gone.

E rawa vakacava mo kua ni “vakacudrui” luvemu ena gauna o vakavulici se tuberi koya kina? E sega ni dua na kena iwalewale tudei, vakauasivi ni gone kece era duidui. O ira gona na itubutubu e dodonu mera vakasamataka vakabibi na ivakarau ni nodra veivakavulici, mera dau lomani luvedra ra qai rokovi ira. E vakavure vakasama toka ni kau cake tale mai ena Kolosa 3:21 na nodra kua ni vakacudrui na gone. Era vakauqeti tale na tama: “Dou kakua ni vakacudrui ira na luvemudou, de ra datuvu kina.”

E so na itubutubu era dau karalaki luvedra. Sega ni vakabekataki ni ka oqo e dau vakacudrui ira na gone. Sa rauta me vakarota na iVolatabu: “Me biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca.” (Efeso 4:31) E kaya tale ga na iVolatabu ni “sa tabu ni veileti nai talatala ni Turaga; ia me yalomalumalumu vei ira kecega na tamata.”​—2 Timoci 2:24.

Dau Veimaliwai kei Ira

Na nomu kauaitaki luvemu e kena ibalebale tale ga ni o na tu vakarau mo vakuai iko mai na veika ni marau kei na ka o dau taleitaka mo cakava, me rawa nira qaravi vinaka kina na luvemu. E kaya na iVolatabu: “Na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”​—Vakarua 6:6, 7.

Ena gauna oqo, na cakacaka saumi e vakavuna na nodra sega ni rawa ni tiko e levu na itubutubu kei na luvedra mai na mataka ina yakavi. Ia, e vakabibitaki ena ivola na iVakarua ni dodonu vei ira na itubutubu mera vagalalataki ira mera veimaliwai kina kei luvedra. Ena rawati oqori kevaka e tiko e dua na ituvatuva matau kei na yalo ni vakuai koya. Oqori sara ga na veika era gadreva na gone.

Vakasamataka mada na macala ni nodra vakatarogi e sivia e 12,000 na gone. Era tinimaka kina na dau vakatataro: “Na nona veivolekati kei nona itubutubu e dua na gone, ena bulabula vinaka kina qai tarovi koya me cakava na itovo ca.” Io, era gadreva dina na gone na nodra veikauaitaki na nodra itubutubu. Dua na gauna e tarogi iratou na luvena e dua na tina, “Ke soli vei kemudou na veika kece dou vinakata, na cava dou na digia?” Eratou sauma kece na le va na luvena, “Na nodrau gauna o Na kei Ta.”

Me dua e vakatokai me itubutubu nuitaki, e dodonu me raica ni vakarautaki na veika e gadreva na luvena, okati kina na nona vakavulici vakayalo kei na nona veivolekati kei rau nona itubutubu. E vauci kina na nodra vakavulici na gone mera tubucake mera tamata nuitaki, mera dau veidokai, mera dau dina, mera dau lomani ira na wekadra ra qai vakalagilagia na Dauveibuli. (1 Samuela 2:26) Io, nira veivakavulici na itubutubu ra qai tuberi luvedra ena sala vakalou, era sa vakayacora tiko na nodra itavi.

[iVakamacala e ra]

[iYaloyalo ena tabana e 15]

Na veikaraci e rawa ni yalolailai kina na gone

[iYaloyalo ena tabana e 15]

Dau veimaliwai kei luvemu