Au Marau Meu “Lakova e Dua Tale na Maile”
TALANOATAKA O CLAIRE VAVY
NA YANUYANU o Madagascar, e levu na kena ulunivanua qai robota na veikauloa, e ciri koto ena rauta ni 400 na kilomita mai Mozambique, ena tokalau kei Aferika. Au a sucu ena korolailai o Betoko II, ena tokalau ni yanuyanu. Ena 1987, niu se qai yabaki 15, au lai vakaitikotiko e Mahanoro, e dua na tauni e toka ena baravi, meu lai vuli kina.
Au lai tiko vei ganequ qase o Celestin, a sa tekivu vulica na iVolatabu kei ira na iVakadinadina i Jiova. Ni oti tale e rua na yabaki, au sa iVakadinadina. Au vakadeitaka e lomaqu meu na qarava na Kalou o Jiova ena kena levu au rawata.
Au Saga Meu Sauva na Noqu iSausau
Dua vei ira na noqu isausau, oya meu vukei iratou noqu vuvale e Betoko II, au qai masulaka vakawasoma vei Jiova. Ia, a rawa ga niu lesu ina koro ni sereki na vuli. E dua na ilakolako dredre toka na 100 na kilomita oya. E rawa ni lakova na lori na imatai ni 40 na kilomita, ia ena taubaletaki ga na vo ni 60 na kilomita ni gaunisala rabailailai.
Au cabeta e levu na delana, qai so na vanua e qiqo sara na sala. Keu tekivu ena noqu ilakolako ni kaca na rarama, au qai taubale me yacova na yakavi, e rawa niu lakova e 40 na kilomita. Rawa ni sivia e 15 na kilokaramu na noqu ikaukau—so au na taqara e uluqu, so au dreketa, na kena vo au na roqota. Au dau kauta ga vakalevu na ivola vakaivolatabu meu lai wasea vei ira na wekaqu kei ira era tataleitaki. Ra dau kilai au tu ena gaunisala oya me “o koya e levu na nona ikaukau.”
Niu se qai tekivuna na noqu dau lai sikovi ratou i vale, e dina niu gugumatua sara, ia eratou sega ga ni via rogoca na noqu vakabauta vou. Ia, vakalailai ga oya, ratou sa veisau, ratou dau taro vakalevu, so na gauna keitou qai lai moce ga ena rua na kaloko ena matakalailai.
Dua na Veisiko Tawaguilecavi
Ena 24 Tiseba, 1990, au lai sereki ina koro, e Betoko II. Eratou marautaki au na noqu vuvale, ratou nanuma niu mai solevutaka kei iratou na Kirisimasi. Ia eratou rarawa ena gauna au vakamacalataka kina niu na sega ni tokona na nodratou solevutaka na Kirisimasi. Eratou madua na lai vakamacalataka na tikina oqo vei ira na vo ni lewenikoro, me vaka nira dau veivolekati sara. Au mani nanuma meu sa na vakaliuliu ga na cakava oqo. Ia, meu na cakava vakacava?
Au a lomalomarua toka me vaka niu se gone ga. Au vakasamataka de na veiganiti meu vakamacalataka na noqu vakabauta ena gauna ni nodra lotu vata na lewenikoro ena siga e tarava. Bau dua toka na gauna au masuti Jiova kina ena noqu kerea nona veidusimaki. Oti oya au tarogi ganequ qase, o Paul, e dua na ivakavuvuli e valenilotu, “O nanuma ni na kilikili kevaka au vakamacalataka e valenilotu nimataka na vuna au sega kina ni solevutaka na Kirisimasi?” A lai bosea na tikina oqo kei na so tale, ra qai vakadonuya.
Ena siga e tarava ni sa tini na lotu, au sa kacivi sara yani. Au cabora tale vakadua na noqu masu vei Jiova, au sa qai kauta toka e so na ivola vakaivolatabu. Ni oti na veikidavaki, au vakavinavinakataki ira kece ena veibasoga e so era a vukei au kina meu taura vakabibi na iVolatabu. Au vakamacalataka niu a lai tomana na noqu vulica na iVolatabu ena gauna au toki kina e tauni. Au kaya niu a qai vulica e levu tale na ka dina mai na iVolatabu, na veika keimami a sega tu ni bau vulica e liu.
Au vakayagataka gona na gauna oya meu vakamacalataka kina na inuinui e tukuni tu ena iVolatabu me baleta na bula tawamudu ena parataisi e vuravura (Same 37:29; Vakatakila 21:3, 4), na vuna era lewe vica ga na tamata yalodina mai vuravura era lako e lomalagi (Joni 14:2, 3; Vakatakila 5:9, 10; 14:1, 3), kei na ivakavuvuli ni iVolatabu nira sega ni vakila e dua na ka na mate, e vaka ga nira moce tu, era sega gona ni vakararawataki tiko (Dauvunau 9:5, 10; Joni 11:11-14, 38-44). Au vakaraitaka tale ga ni o ira na lotu Vakarisito ena imatai ni senitiuri era sega ni dau solevutaka na Kirisimasi ni vu mai na lotu butobuto.
Ni sa mai cava na noqu vosa, e levu vei ira na vakarorogo era duavata ni dina na ka au vakamacalataka. So era taroga e so tale na taro. Oti oya, au vakaraitaka vei ira na ivola au kauta tu yani, au qai vakamacalataka nira ivukevuke vakaivolatabu era tabaka na iVakadinadina i Jiova. Au kaya niu tu vakarau meu vukei ira na via vulica na iVolatabu. E levu era ciqoma na ivola vakaivolatabu.
Au Kurabui ni Keitou Lai Sota
E dua na marama au se sega ni bau sotava, a torovi au mai qai kaya, “Drau lotu vata kei tuakaqu, e tiko ena dua tale na koro.” Au kurabui qai tarogi koya, “E vei?”
“Mai Andranomafana,” e sauma. E voleka ni 30 na kilomita na kedrau veiyawaki na koro oqo kei Betoko II.
Au kaya vua na marama oqo ni rairai dua tani tale na lotu e lewena o tuakana, me vaka nira veikilai vinaka na iVakadinadina e kea. Ia, a tukuna na marama oqo ni a vakavulici koya o tuakana ena ka vata ga au a vakamacalataka e valenilotu. Au kerea sara na yaca i tuakana vaka kina na nona itikotiko, au na via lako totolo sara ga ina koro oya. Ia, a kerei au o tinaqu meu wawa tale mada me dua se rua na siga, me vaka ni na dredre na ilakolako oya, qai taubaletaki tale ga. Ni oti e rua na siga, keirau sa sasaga i Andranomafana kei ganequ, o Charles.
Ena gauna keirau yaco yani kina, keirau taroga sara e so na lewenikoro, “Ra vakaitikotiko beka e ke na iVakadinadina i Jiova?” Au yalolailai nira kaya, “Era tiko ga ena koro oqo na lotu Katolika, lotu Penitiko, kei na lotu Cokovata.”
A qai tukuna cake mai e dua na marama, “Kevaka o vaqarai ira tiko na iVakadinadina i Jiova, qori beka o Marceline kei na nona vuvale.” Oqo sara ga na yaca a soli vei au!
A lai kacivi Marceline sara mai e dua. Vakalailai ga oya sa yaco mai, ia e vaka me rere toka vakalailai. Era kumuni kece mai na lewenikoro nira nanuma ni keirau dua beka vei ira na vakailesilesi, keirau mai vakatarogi Marceline. Au qai kila e muri ni ratou vakacacani ena koro na vuvale oya baleta ni ‘duatani na nodratou lotu.’
E kauti keitou vakatikitiki o Marceline me keitou rawa kina ni veivosaki. Au tarogi koya se iVakadinadina i Jiova, e sauma ni vaka kina. A lako sara o koya qai kauta mai na ivola Na Ka Dina sa Basika ki na Bula Tawamudu, era vakayagataka e liu na iVakadinadina i Jiova mera vulica kina na iVolatabu, kei na so na ilavelave makawa ni Vale ni Vakatawa. Era sa makawa kece qai kakadresudresu tu. “Na ilavelave cava dou a vulica ena Sigatabu sa oti?” au taroga.
“Oqo ga na ilavelave e tu vei keitou,” e sauma, “keitou sa taleva vakavica.” Oti oya au sa qai tukuna vei Marceline niu dua tale ga na iVakadinadina. Dua na ka nona marau! Niu kaya niu vinakata meu sotava na turaga e dau taura tiko na vuli, e sauma ni vakaitikotiko ena duatani tale na vanua, e yawa toka.
Au se Baci Kurabui Tale
Ena siga e tarava keirau lako sara kei Marceline me lai sikovi koya na turaga oqo. A kurabui na turaga oqo ni keirau yaco yani qai marau tale ga ni raici keirau. E dua dina na iVakadinadina o koya, a gole mai Toamasina, na tauni e voleka ena baravi, e sivia toka na 200 na kilomita ina vuaicake. Ratou sa mai vakaitikotiko e ke vakavuvale ena vica na yabaki yani e liu ni a vakacegui vakasauri mai na nona cakacaka. Ena gauna ga e tokatu mai kina, a tekivu vunau sara, caka vuli iVolatabu, e vakayaco soqoni tale ga.
Ratou taleitaka dina na vuvale na ilavelave ni Vale ni Vakatawa vovou au a kauta toka yani. Au vakaraitaka tale ga vei ratou na ivola E Rawa Mo Bula Tawamudu ena Parataisi e Vuravura, a sa vakayagataki tiko ena gauna oya me vulici kina na iVolatabu, se qai imatai ni gauna me ratou raica kina. Na Sigatabu e tarava, au lesu tale i Andranomafana meu soqoni vata kei ratou. Au uqeti ratou me ratou veitaratara kei na valenivolavola ni tabana ena koroturaga o Antananarivo, me vaka ni sega tu ni kila na valenivolavola na iwasewase lailai oqo.
Me tekivu ena Janueri 1991, e voleka ni veivula kece na noqu biuti Mahanoro meu lako i Andranomafana, meu dau kauta na ilavelave vovou ni Vale ni Vakatawa kei na so tale na ivola vakaivolatabu. Oqo e dua na ilakolako e rauta ni 130 mada ga na kilomita na kena lakovi yani, e sega ni okati kina na noqu lesu mai. E sivia e 88 na kilomita au na taubaletaka—au cabeta qai sirova na veidelana sukusukura, curuma na veikauloa, koya li ni tau na uca, au na sasaga meu lakova rawa na vanua lolobo qai sisisi.
Sa qai bibi tiko ga na noqu iyaya ena veigauna kece au siko kina e kea, me vaka ni sa levu toka era vinakata na ivola kei na ivoladraudrau. Ia, ni sa cava e dua na noqu ilakolako, au dau vakila na noqu lomavakacegu kei na marau, e ka wale kina na momosi ni yagoqu kei na oca. Au dau marau niu raica na nodra taleitaka na ilawalawa lailai oqo na taura na ivola vovou kei na noqu raica na sala era ciqoma kina na ka dina ena iVolatabu!
Tekivu Cakacaka Vakaitalatala Vakatabakidua
Ena 1 Sepiteba, 1992, au a lesi meu painia, na yaca era vakatoka na iVakadinadina vua e dua e cakacaka vakaitalatala vakatabakidua. Au a painia e Mahanoro, ia ena gauna vata oqori au veitaratara tiko ena ivola kei ratou na wekaqu mai Betoko II. Ni toso na gauna, au vuli iVolatabu kei ratou ena neitou veivolavolai, ratou qai taroga ke rawa niu lesu yani i nakoro meu lai vukei ratou. Au tu vakarau meu cakava, ia au vinakata meu vakadeitaka mada e liu ni ratou via vulica dina na iVolatabu, ratou via toso tale ga vakayalo. Koya gona, au mani painia tale tiko vakalailai e Mahanoro.
Ena icavacava ni 1993, au marautaka na lai tiko ena vuli ni painia a caka mai Antananarivo me rua na macawa. Oti oya, au sureti sara meu vakalewe fomu meu kerea meu painia lavotaki, e kena ibalebale niu na lesi ina dua rawa ga na vanua ena yanuyanu oqo. Ia, au sega ni mani ciqoma baleta niu via vukei ratou ga na wekaqu e Betoko II, ratou qai yawa sara mai na ivavakoso voleka duadua. Au mani lesu tale e Mahanoro, na vanua au painia tiko kina.
Yaco na gauna me veisiko mai na ivakatawa dauveilakoyaki, au tarogi koya sara keu rawa ni lai vukei ratou na wekaqu. Ena gauna oya sa dua tiko kina na ivavakoso e Andranomafana, qai vakatura o koya meu lako ena ivavakoso oya, ia meu cakacakataka na yalava ni Betoko II. Au tekivu ena ilesilesi oqo ena 1 Sepiteba, 1994. Ena vula tiko ga oya au lakova kina e dua na soqo ni tikina kei ganequ o Paul, a ivakavuvuli tu ni lotu. Vakalailai ga oya, era sa tekivu vakaitavi e le 30 ena cakacaka vakavunau e Andranomafana, qai rauta toka e 65 era tiko ena soqoni ena Sigatabu.
Sega ni Cegu na Taubale
Sega ni dede na noqu lesu i Betoko II, ratou sa vakadonui sara e va na ganequ kei na taciqu me ratou cakacaka vakavunau, me ratou iVakadinadina i Jiova. Oti ga vakalailai, ratou sa papitaiso sara. Niu sa tiko i Betoko II, au dau lako vakalevu i Anosibe An’ala meu lai kauta mai na ivola kei na ivoladraudrau, oya e rauta ni 100 taucoko na kilomita na yawa ni vanua meu na taubaletaka, au qai lesuva tale mai. Dina niu dau wawale, ia e sega ni dua na ka vei au oya, vakauasivi niu raica na tubu vakayalo e kea, au marau kina vakalevu.
Nikua, sa dua tiko na ivavakoso bulabula e Betoko II, qai rauta ni 45 era dau tiko ena soqoni ena Sigatabu. Era sa tiko kece ena dina na wekaqu voleka, e levu vei ratou sa painia tudei. E dua na ganequ sa painia lavotaki tiko. Ena 1 Noveba, 2001, au a lesi tale ga kina meu painia lavotaki, au qai lesi ena koro o Antanambao-Manampotsy. Ia, au biuti Betoko II ena yalomarau.
Ena gauna au tekivu vulica kina na ka dina ena iVolatabu ena 1987, e sega mada ga ni 3,000 na iVakadinadina era tu e Madagascar. Ena gauna oqo sa sivia na 14,000. Me vaka e levu vei ira oqo, au vakavinavinaka niu vakayagataka na noqu kaukaua meu “lakova e dua tale na maile” meu vukei ira kina e so. Au vakavinavinakataki Jiova ni vakalougatataka na noqu sasaga ena tikina oqo.
[iYaloyalo ena tabana e 24]
Au dau kauta i nakoro e sivia na 15 na kilokaramu na iyaya, au qai taubaletaka e 60 na kilomita
[iYaloyalo ena tabana e 25]
O Paul, na ganequ qase
[iYaloyalo ena tabana e 26]
Na ganequ o Charles
[iYaloyalo ena tabana e 26]
O yau kei na so vei ira na wekaqu. Era sa iVakadinadina i Jiova kece ena gauna oqo