E Vakasakiti Nomu Red Blood Cell

DAUVOLAVOLA NI YADRA! MAI SAUCA AFERIKA

Na sela e kune vakalevu ena nomu salanidra e vakadamudamutaka na dra e vakatokai na red blood cell. E tiko e drau vakamilioni na red blood cell ena dua wale ga na turu ni dra. Nida raica na sela oqo ena iloilo ni vakalevutaki ni ka, e mokimokiti na kena ibulibuli qai sababa tu e lomadonu. Na sela yadua ni red blood cell e tiko kina e vica vata na drau na milioni na hemoglobin molecule. E mokimokiti na kena ibulibuli, e dua gona vei ira na molecule oqo e tiko kina e rauta ni 10,000 na hydrogen, carbon, nitrogen, oxygen, kei na sulfur atom, vaka kina e va na iron atom bibi, era solia vua na dra na kaukaua me dau vakauta na oxygen. Na hemoglobin e vakarawarawataka na kena kau tani na cagi ca na carbon dioxide e kaburaki tu ena vuruvuru ni yago ena yatevuso.

Dua tale na tiki bibi ni red blood cell oya na kulina mamare, e vakatokai na membrane. Na kuli mamare oqo e vukea na sela me tadre me rawa ni curu ina salanidra lailai me bula tiko kina na veitiki ni yagomu.

E buli na red blood cell ena nomu uto ni sui. Ni sa curuma nomu salanidra e dua na sela vou, e rawa ni yavoki vaka100,000 ena nomu uto kei na yagomu. E duidui na red blood cell mai na sela tale e so, baleta ni sega ni vakalomana. Oqo e galala qai mamada me kauta na oxygen, me vukea tale ga na nomu uto me pamutaka e vica vata na milioni na red blood cell ina yagomu taucoko. Ia ni sega ni vakalomana na red blood cell ena sega kina ni rawa ni vakavoutaka na veitikina eloma. Ni oti e rauta e 120 na siga, sa na sega soti ni vinaka na nomu red blood cell sa na sega tale ni wadredrega me vaka e liu. Na white blood cell lelevu e vakatokai na phagocyte ena kania na sela sa vuca oqo qai buraka mai na iron atom. Na molecule sa qai vakauta na iron atom ina nomu uto ni sui me buli tale mai kina na red blood cell vovou. Ena veisekodi kece e solia na nomu uto ni sui e 2 ina 3 na milioni na red blood cell vovou ina nomu salanidra!

Ke vakasauri ga na kena sega ni cakacaka e rauta e vica vata na milioni na nomu red blood cell, o na mate ga ena loma ni vica na miniti. Meda vakavinavinakataka gona na Kalou o Jiova ena vakasakiti ni nona ibulibuli oqo, e rawa kina nida bula da qai marau tiko! Sega ni vakabekataki ni o na duavata kei koya na daunisame ni kaya: “I Jiova, ko ni sa dikevi au, ka kilai au. Au na vakavinavinaka vei kemuni; ni sa ka rerevaki ka vakurabui na noqui bulibuli: a ka veivakurabuitaki na nomuni cakacaka: a ka oqo sa kila vakavinaka na yaloqu.”​—Same 139:1, 14.

[Diagram ena tabana e 24]

(Raica tale na ivola)

Red blood cell

Membrane

Hemoglobin (e vakalevutaki)

Oxygen