Ra Taroga na iTabagone . . .

Me Vakacava na Voleka ni Veitokani e Koronivuli?

“Era na veitalanoataka na noqu icaba e koronivuli na levu ni nodra lasa ena muanimacawa. Au vakila niu sega ni okati kina.”​—Michelle.a

“So na gauna niu raica e dua na ilala gone au qai vakasamataka, ‘Sabu, era itokani vinaka oqo. Au vinakata sara ga meu dua vei ira.’”​—Joe.

“E sega ni dredre meu kunea e so noqu itokani e koronivuli. E dau rawarawa sara. Oqori e vu ni noqu leqa.”​—Maria.

ENA loma ni dua na siga, e levu na gauna o veimaliwai voli kina kei ira na nomu icaba e koronivuli. E tautauvata na levu ni veika dredre kei na rarawa oni sotava, vakatale ga kina na veika oni saga mo ni rawata. Ena so na sala o rairai vakila ni levu na ka o tautauvata kina kei ira, ni vakatauvatani kei rau na nomu itubutubu, o iratou na tacimu, se o ira nomu itokani lotu Vakarisito. Sa macala tu ga ni o na rairai malele mo veitokani kei ira. E cala beka oya? E tiko beka na leqa e rawa ni na basika? Me vakacava na nomu veivolekati kei ira nomu itokani e koronivuli? O na kila vakacava o koya me na nomu itokani?

O Gadreva na Veitokani

Eda gadreva kece na veitokani​—o ira eda na marau vata ena gauna vinaka da qai nuitaki ira ena gauna eda sotava kina na rarawa. O Jisu mada ga era a tu na nona itokani, qai dau marau ni veimaliwai kei ira. (Joni 15:15) Na gauna e mate kina ena kaunirarawa o Jisu a duri voleka tu na nona itokani voleka, o Joni “na tisaipeli ka dau lomana [vakalevu].” (Joni 19:25-27, VV; 21:20) O na gadreva na itokani era vakataki Joni​—o ira era na volekati iko tiko ena gauna vinaka kei na gauna ca. E dua na vosa vakaibalebale ena iVolatabu e kaya: “Sa loloma tiko e na veigauna kece na wekana [“nona itokani,” NW] na tamata, ka sa vaka na tacina e na gauna ni rarawa.”​—Vosa Vakaibalebale 17:17.

Rairai o nanuma ni o sa kunea e dua na itokani vaka oqori e koronivuli, e dua nomu lewenikalasi drau veiyaloni vinaka sara ga. E tautauvata e so na ka drau taleitaka, drau dau marautaka mo drau veivosaki. Dina ni sega ni drau vakabauta vata, ia ena nomu rai, e sega sara ni vaka me ‘itokani ca’ o koya. (1 Korinica 15:33, VV) E macala ni so na itabagone oni sega ni vakabauta vata era vakaitovo. (Roma 2:14, 15) Ia kena ibalebale beka oya mo sa na veitokani vakavoleka sara kei ira?

Ra Taleitaka na Lotu Vakarisito na Veitokani

O ira na lotu Vakarisito dina era sega ni cati ira na tamata tawavakabauta. Nira vakayacora na nodra ilesilesi mera ‘qisi ira na lewe ni veivanua kece ga mera tisaipeli,’ era na veivosaki gona kei ira na tagane, na yalewa era duikaikai, duidui lotu, qai duidui nodrai itovo vakavanua. (Maciu 28:19, VV) Era na dau veitaratara kei ira era tiko veitikivi, na itokani vakacakacaka, se o ira era vuli vata. Ra na dau vukei ira sara mada ga. O ira na lotu Vakarisito era dau vakaraitaka nodra kauaitaki ira dina na tani.

Ena tikina oqo e ivakaraitaki vinaka kina na yapositolo o Paula. E kila o koya na sala me veitaratara kina kei “ira na tamata kecega,” dina nira sega ni vakabauta vata. A sega ni nona inaki me vakailala kei ira. Ia, e kaya: “Ka’u sa cakava na ka kecega e na vuku ni tukutuku-vinaka, me’u rawata vata kina kei kemudou na kenai sau.”​—1 Korinica 9:22, 23.

Rawa ni o muria na ivakaraitaki i Paula, ena nomu dau yalovinaka vei ira nomu icaba. Vulica na iwalewale mo veivosaki vinaka kina kei ira. De dua e so na nomu icaba era vaqara voli na inuinui o sa kila tu e yavutaki ena iVolatabu. Dikeva mada na ivakaraitaki i Janet e dua na goneyalewa lotu Vakarisito. A tukuni vei ira na lewe ni nona kalasi mera vola vakalekaleka e so na ka me baleti ira na lewenikalasi yadua, oti mera qai wilika na gonevuli yadua na veika sara ga e dui volai me baleti koya. E vola kina e dua me baleti Janet: “E vaka mo dau mamarau tu ga ena veigauna. Au kerea mo tukuna vei keimami na vuna!”

E laurai ena vakasavuirogorogo oqo ni so vei ira na nomu icaba era na vinakata mera kila na nomu vakabauta. Macala ni na yaga sara ke o dau yalovinaka vei ira oqori. Sega ni vakabekataki ni oqo e dua na sala vinaka mo na vakamacalataka kina nomu vakabauta. Laiva mera vakamacalataka tale ga na nodra nanuma qai vakarogoca vinaka na ka era tukuna. Na veika o sotava ni o dau veivosaki kei ira nomu icaba ena yaga sara vakalevu ena gauna o sa na kunea kina e dua na nomu cakacaka saumi, o qai sotava na ituvaki vaka oya. Nomu dau veikauaitaki e koronivuli kei na vanua ni cakacaka ena “vakarogovinakataka nai vakavuvuli ni Kalou na nodai Vakabula e na ka kecega.”​—Taito 2:10.

“Kakua ni Veitokani Vata Vakatani”

E macala ni nomu dau vinaka vua e dua na nomu lewenikalasi ena duidui mai na nomu veitokani vakavoleka kei koya. A vola o Paula: “Dou kakua ni veitokani vata vakatani kei ira era sa sega ni vakabauta.” (2 Korinica 6:14) Mo nona itokani voleka e dua, e kena ibalebale ni na tautauvata na ka drau vakamareqeta vaka kina na nomudrau isausau. Ena dredre oqori vua e dua e sega ni muria na nomu vakabauta vakaivolatabu kei na kena ivakatagedegede. Na nomu veitokani vakatani kei na dua na nomu lewenikalasi e sega ni vakabauta ena rawa ni coriti iko mo vakayacora na itovo ca se vakacaraka na nomu ivalavala vinaka.

A vakadinadinataka na tikina oqo ena sala mosimosi o Maria. Nona dau yalorawarawa era galeleti koya kina na nona icaba, ia a sega ga ni kila se o cei me nona itokani. E kaya: “Au dau vinakata mera taleitaki au na gonetagane kei na goneyalewa. Ia, au lai tini lomoci ena ituvaki drakidrakita ni vuravura oqo qai dredre meu drotani mai kina.”

Me vakataki Maria, rairai o na sega ni vakila nomu sa lai veitokani voleka sara kei na dua drau sega ni vakabauta vata. Ia e rawa mo taqomaki mai na veika mosimosi e rawa ni yaco ke matata tiko vei iko o koya e nomu veikilai kei koya me nomu itokani voleka. O na cakava vakacava?

Sala Mo Digia Kina na iTokani Vinaka

Me vaka sa cavuti oti, ena gauna a bula voli kina e vuravura o Jisu era a tu na nona itokani voleka. A cakava oqo ena nona dau dina kei na nona dau veivosakitaka na veika vakayalo. Ke ra ciqoma na tamata na nona ivakavuvuli vaka kina na ivakarau ni nona bula era na toro volekati koya. (Joni 15:14) Kena ivakaraitaki, e le va na turaga a uqeti iratou sara ga na veika a tukuna o Jisu, eratou mani “biuta na ka kecega, ka muri koya.” O ratou na turaga oqo​—o Pita, Adriu, Jemesa, kei Joni​—ratou qai yaco me itokani voleka i Jisu.​—Luke 5:1-11; Maciu 4:18-22.

Na vosa i Jisu kei na nona itovo e dusia vakamatata ni dei e lomana na nona vakabauta qai sega ni veisau na nona inaki. O ira era sega ni ciqomi Jisu kei na nona ivakavuvuli era biuti koya, a sega ni tarovi ira.​—Joni 6:60-66.

Me kena ivakaraitaki, e tarai Jisu sara ga na nona lomadina e dua na cauravou. Na iVolatabu e kaya: “Sa vakaraici koya ko Jisu, a sa lomana.” Ni sa kila na cauravou oqo na ka e namaka o Jisu vei ira na nona itokani a sa “lako tani” yani. De dua e tamata vinaka na cauravou oya​—ni a ‘lomani koya’ o Jisu. Ia, e gadreva o Jisu e levu tale na ka vei ira na nona itokani. (Marika 10:17-22; Maciu 19:16-22) Vakacava o iko?

De dua o veitokani vinaka sara kei na dua na nomu icaba e koronivuli. Ia, tarogi iko mada: ‘Ena via cakava beka na noqu itokani oqo na veika e vakarota o Jisu? Ena taleitaka beka me kilai Jiova, na Kalou a tukuna o Jisu meda qarava?’ (Maciu 4:​10) Na isaunitaro oqori ena macala vinaka ni o veivosaki kei ira nomu lewenikalasi vaka kina ena nomu bulataka na ivakatagedegede vakaivolatabu.

E veiganiti gona mo dau kauaitaki ira na nomu lewenikalasi, me vakataki Jisu ga ena nona dau kauaitaki ira na tamata kece ga. Ia e vakadeitaka o Jisu ni o ira e digia mera nona itokani era lomani Jiova na Tamana vakalomalagi. Rawa ni o cakava tale ga oqori. O koya gona ni o vakamacalataka na nomu vakabauta vei ira tale e so e koronivuli, me matau na nomu ivosavosa qai ‘vinaka tiko ga na nomu ivakarau.’ Kena ilutua, vakadeitaka ni o na digi ira na itokani vinaka.​—1 Pita 2:12, VV.

[iVakamacala e ra]

VAKASAMATAKA MADA

◼ Na leqa cava ena rawa ni basika ke drau dau gade vata kei na dua nomu lewenikalasi tawavakabauta ni suka na vuli? E ka vakayalomatua beka oqo?

◼ Ni o wilika oti na ulutaga oqo, o kidava beka ni sa rui voleka na nomu veitokani kei na dua na nomu lewenikalasi? Ke vaka kina, na cava o rawa ni cakava?

[Kato/​iYaloyalo ena tabana e 18]

AU NA KUNEA VAKACAVA NA ITOKANI DINA?

Na vidio, How Can I Make Real Friends? (Au na Kunea Vakacava na iTokani Dina?) e vakarautaka na iVakadinadina i Jiova, era vakatarogi kina na itabagone mai Mereke, Itali, Varanise, kei Sipeni. Sa tu na vidio oqo ena 36 na vosa.

[iYaloyalo ena tabana e 18]

E so na nomu lewenikalasi era na lomatarotarotaka na nomu vakabauta