Dei Tiko ga na Veitokani ena Vuravura Tawayalololoma

“A veika oqo ka’u sa vakarota vei kemudou, mo dou veilomani.”​—JONI 15:17.

1. Na cava a bibi kina mera veitokani voleka na lotu vaKarisito ena imatai ni senitiuri?

ENA iotioti ni nona bogi e vuravura o Jisu, a uqeti ratou nona tisaipeli yalodina me dei tiko ga na nodratou veitokani. A tukuna taumada ena yakavi ya ni ratou na kilai tani ni ratou nona imuri ke ratou dau veilomani. (Joni 13:35) Bibi dina me ratou veitokani voleka sara na yapositolo me ratou vosota kina na veitusaqati e se bera mai, me ratou qarava vinaka tale ga na itavi ena lesia o Jisu. Era qai kilai na lotu vaKarisito ena imatai ni senitiuri ni dei nodra yalodina vua na Kalou, vaka kina vei ira na tacidra vakayalo.

2. (a) Na cava eda nakita dei meda cakava, na vuna? (b) Na taro cava eda na veivosakitaka?

² Eda marau ena gauna qo nida lewena e dua na isoqosoqo e qaravi Jiova e vuravura raraba, era vakatotomuri ira na lotu vaKarisito ena imatai ni senitiuri! Eda nakita dei meda talairawarawa ina ivakaro i Jisu meda dau veilomani dina. Ia ena iotioti ni veisiga qo, e levu era tawayalodina qai sega ni dau loloma. (2 Tim. 3:1-3) E vovodea nodra veitokani, ra qai nanumi ira ga. E bibi meda vorata na ivakarau va qori meda kilai tani kina nida lotu vaKarisito. Meda veivosakitaka mada e vica na tikina: E yavutaki ena cava na veitokani vinaka? Na cava meda cakava meda dua na itokani vinaka? Na gauna cava ena vinakati kina me muduki na veitokani? Na cava meda cakava me dei tiko ga kina na veitokani vinaka?

E Yavutaki ena Cava na Veitokani Vinaka?

3, 4. Na cava na yavu ni veitokani vinaka, na vuna?

³ Na veitokani vinaka e yavutaki ena noda lomani Jiova. E vola o Tui Solomoni: “Kevaka e dua na tamata sa gumatua vua e dua tani, ke rau sa lewe rua erau na vorata rawa; ia na dali e turai-tolu ena sega ni cavuka rawarawa.” (Dauv. 4:12) Ke ikatolu tiko ni itokani o Jiova, ena dei na noda veitokani.

⁴ O ira mada ga era sega ni lomani Jiova, era dau marautaka na vakaitokani. Ia ena dredre me tagutuvi na nodrau veitokani e rua erau lomana na Kalou. Ke basika na duidui ena kedrau maliwa, na itokani dina ena cakava na ka e vakamarautaki Jiova. Ke ra saga na meca ni Kalou mera veisei na lotu vaKarisito dina, era na raica na meca qori nira dei tiko ga nodra veitokani na lotu vaKarisito dina. Ena veitabagauna sa sivi, era bolemate na dauveiqaravi i Jiova mera yalodina tiko ga vei ira na tacidra vakayalo.​—Wilika 1 Joni 3:16.

5. Na cava e dei kina nodrau veitokani o Ruci kei Neomai?

⁵ E sega ni vakabekataki, ni vinaka duadua na noda veitokani kei ira na lomani Jiova. Vakasamataka mada na ivakaraitaki i Ruci kei Neomai. E dua vei ira na veitokani vakasakiti e volaitukutukutaki ena iVolatabu na nodrau veitokani na marama qo. Na cava a dei kina na nodrau veitokani? E vakamacalataka o Ruci na vuna ena nona kaya vei Neomai: “Na kai nomu era na kai noqu, na nomu Kalou talega ena noqu Kalou: . . . me cakacaka vakaoqo vei au ko Jiova, ka vakaikuritaka talega, kevaka sa tawasei kedaru e dua na ka tani, na mate duaduaga.” (Ruci 1:16, 17) E macala ni rau lomana ruarua na Kalou, qai uqeti rau na loloma qo ena nodrau veimaliwai. A vakalougatataki rau kina o Jiova.

Na Ka mo Cakava mo Dua Kina na iTokani Vinaka

6-8. (a) Na cava e vinakati me dei kina na veitokani? (b) Na cava mo cakava mo vakaliuliu kina mo dua na itokani?

⁶ Na ivakaraitaki i Ruci kei Neomai e vakaraitaka ni sega ni yaco vakacalaka na veitokani vinaka. E yavutaki ena nodrau lomani Jiova ruarua. Ia na veitokani e dei, ena vinakati kina na cakacaka vakaukaua kei na vakuai keda. O ira mada ga na veitacini ena loma ni vuvale vaKarisito era qaravi Jiova ena vinakati mera sasaga vakaukaua mera veitokani voleka kina. O na tekivuna gona vakacava na veitokani vinaka?

⁷ Vakaliuliu. E uqeti ira nona itokani ena ivavakoso e Roma na yapositolo o Paula mera “dauvakacegui ira na vulagi.” (Roma 12:13) Meda rawa ni dua na itokani vinaka, e bibi meda vakayagataka vinaka na ituvaki veiganiti meda veikauaitaki kina. E sega tale ni dua e rawa ni veikauaitaki ena vukuda. (Wilika Vosa Vakaibalebale 3:27.) Dua na sala o veikauaitaki kina oya nomu sureti ira ena ivavakoso moni mai kanavata. E sega ni tukuni me dua na kakana levu sara. O rawa beka ni okata ena nomu ituvatuva mo dau kauaitaki ira va qo na lewe ni ivavakoso?

⁸ E dua tale na sala meda vakaliuliu kina meda dua na itokani, oya noda sureta e dua meda cakacaka vata vakavunau. Ni o rogoci koya ni vunau tiko qai vakamacalataka mai vu ni lomana na nona lomani Jiova, ena uqeti iko mo volekati koya sara ga.

9, 10. Na ivakaraitaki cava e kotora o Paula, eda na vakatotomuri koya vakacava?

⁹ Dau lomasavu. (Wilika 2 Korinica 6:12, 13.a) O nanuma beka ni sega sara ga ni dua ena ivavakoso mo drau veitokani? Ke vaka kina, de dua e qiqo nomu rai me baleti koya e veiganiti me nomu itokani. E ivakaraitaki vinaka na yapositolo o Paula ena nona dau lomasavu. Ena dua na gauna, a sega ni bau tadra me veitokani kei ira na kai veimatanitu. Ia a qai lesi me “nodrai apositolo na veimatanitu tani.”​—Roma 11:13.

¹⁰ A sega tale ga ni yalana o Paula nona veitokani kei ira e tabavata. Me kena ivakaraitaki, a veitokani voleka sara kei Timoci, dina ni veisivi na nodrau yabaki ni bula, e duidui tale ga na nodrau isususu. Nikua, e levu na itabagone era vakamareqeta nodra veitokani kei ira na itabaqase ena ivavakoso. “E dua noqu itokani voleka e yabaki 50 vakacaca,” e kaya o Vanessa, e yabaki 20 vakacaca. “Au rawa ni tukuna vua na ka au na tukuna vei ira noqu itokani keimami tabavata. E dau kauaitaki au.” E tekivutaki vakacava na veitokani va qo? E kaya o Vanessa: “Au vakaliuliu meu tekivuna neirau veitokani, au saga vakaukaua.” O tu vakarau mo vakaitokani kei ira o sega ni tabavata? Ena vakalougatataka dina o Jiova nomu cakava qori.

11. Na cava eda vulica ena ivakaraitaki i Jonacani kei Tevita?

¹¹ Mo yalodina. “Sa loloma tiko e na veigauna kece na wekana na tamata, ka sa vaka na tacina e na gauna ni rarawa,” e vola o Solomoni. (Vkai. 17:17) Ni vola tiko na vosa qori o Solomoni, a rairai vakasamataka nodrau veitokani na tamana o Tevita kei Jonacani. (1 Sam. 18:1) A vinakata o Tui Saula me tui kei Isireli na luvena o Jonacani. Ia e ciqoma o Jonacani na vakatulewa i Jiova, oya me tui o Tevita. E sega ni vakataki Saula o Jonacani, ni a sega ni vuvutaki Tevita. A sega ni cudru ni vakacaucautaki o Tevita, a sega tale ga ni vakabauta na lasu e tukuna o Saula me baleti Tevita. (1 Sam. 20:24-34) Eda vakataki Jonacani beka? Nira lesi ena so na itavi ena ivavakoso na noda itokani, eda marautaka beka? Nira sotava na ituvaki dredre, eda vakacegui ira beka da qai tokoni ira? Nida rogoca eso na itukutuku ca me baleta e dua na noda itokani, eda na vakabauta totolo? Se, me vakataki Jonacani, eda na totaki koya ena yalodina?

Na Gauna me Muduki Kina

12-14. Na ka ni bolebole cava era sotava o ira na vulica tiko na iVolatabu, eda na vukei ira vakacava?

¹² Ni tekivu veisau nona ivakarau ni bula e dua e vulica tiko na iVolatabu, ena ka ni bolebole toka vua na veika e vauca na veitokani. Ena rairai vakailala kei ira e taleitaka, ia era sega ni vakamuria na itovo savasava ni iVolatabu. Ena veigauna sa oti, a rairai dau veimaliwai vakalevu kei ira qori. Ia sa raica o koya ni veika era vakaitavi kina nona ilala ena rawa ni vakamuai koya ina ca, e liaca ni dodonu me kua ni veimaliwai vakalevu kei ira. (1 Kor. 15:33) Ia ena rairai nanuma tale ga ni sa na tawayalodina tiko ke sega ni veimaliwai kei ira.

¹³ Ke o vulica tiko na iVolatabu o qai tiko ena ituvaki qo, nanuma ni o koya na itokani dina ena marautaka nomu saga mo vakavinakataka nomu bula. Ena rairai vinakata tale ga me tomani iko ena nona vulica na veika e baleti Jiova. Ia o ira na itokani vakailasu era na ‘vosavakacacataki iko’ baleta ni o sega ni tokoni ira ena ‘ivalavala velavela uasivi.’ (1 Pita 4:3, 4) O ira sara ga na itokani va qo era tawayalodina, sega ni o iko.

¹⁴ Nira vakanadakui koya e vuli iVolatabu tiko na nona itokani era sega ni lomana na Kalou, era tu eso na lewe ni ivavakoso mera nona itokani. (Kala. 6:10) O kilai ira vinaka na vuli iVolatabu era tiko ena soqoni? O dau vakauqeti ira ena gauna oni veimaliwai kina?

15, 16. (a) Meda raica vakacava na noda itokani sa sega ni via qaravi Jiova? (b) Eda na vakadinadinataka vakacava nida lomana na Kalou?

¹⁵ Vakacava ke dua nomu itokani ena ivavakoso e vakanadakui Jiova, de dua e vakasivoi sara? E ituvaki rarawataki dina qori. E kaya e dua na tacida yalewa ena gauna a vakanadakui Jiova kina e dua nona itokani voleka: “Dua na ka na rarawa ni yaloqu. Au nanuma sara ga ni sa dei tu ena ka dina na noqu itokani, ia a sega. Au vakasamataka de a qaravi Jiova tiko ga me vakamarautaki ratou nona vuvale. Au mani vakadikevi au tale. E donu tiko beka na inaki ni noqu qaravi Jiova?” A vosota vakacava na tacida qo? “Au biuta vei Jiova noqu icolacola,” e kaya. “Au via vakaraitaka sara ga vei Jiova niu lomani koya dina, niu sega ni lomani koya ga baleta ni vakarautaka mai na noqu itokani ena nona isoqosoqo.”

¹⁶ Meda kua ni namaka meda itokani tiko ga ni Kalou ke da tokoni ira tiko era digia mera itokani ni vuravura. E vola na tisaipeli o Jemesa: “Dou sa sega beka ni kila, ni sa veicati kei na Kalou na veivinakati kei vuravura? ia sa veimecaki kei na Kalou ko koya sa viaveiwekani kei vuravura.” (Jeme. 4:4) Eda na vakaraitaka noda lomana na Kalou nida nuitaka ni na vukei keda meda vosota nona yali e dua noda itokani ke da yalodina tiko ga vua. (Wilika Same 18:25.) E tinia va qo na tacida e tukuni taumada: “Au vulica nida sega ni rawa ni vakaukauataka e dua me lomani Jiova se me lomani keda. E nona digidigi sara ga.” Ia na cava meda cakava me veivakauqeti kina na noda veitokani kei ira na dei tiko ena ivavakoso?

Vaqaqacotaka Tiko ga na Veitokani Vinaka

17. Erau na veivosaki vakacava e rua na veitokani vinaka?

¹⁷ Na veivosaki vinaka e vaqaqacotaka na veitokani. Ni o wilika na itukutuku ena iVolatabu me baleti Ruci kei Neomai, o Tevita kei Jonacani, o Paula kei Timoci, o na raica ni rawarawa nodra veivosaki na veitokani vinaka ra qai veirokorokovi. E vola o Paula me baleta na iwalewale ni noda veivosaki: “Me ia tikoga na nomudou vosa e na yalovinaka, ka vakatuituinataki e na masima.” A vakaibalebaletaka tiko o Paula na ivakarau ni noda veivosaki “vei ira etaudaku,” qo o ira na sega ni tacida lotu vaKarisito. (Kolo. 4:5, 6) Ke da vosa ena veidokai vei ira eda sega ni vakabauta vata, sa qai wacava noda vosa vei ira noda itokani ena ivavakoso!

18, 19. Meda raica vakacava na ivakasala ni dua na itokani lotu vaKarisito? Na cava eda vulica ena nodra ivakaraitaki na qase ni ivavakoso e Efeso?

¹⁸ Na itokani vinaka ena raica vakabibi na rai ni nona itokani, e bibi gona me rau veivosaki ena yalovinaka qai vakadodonu. A vola na tui vuku o Solomoni: “Ai lumu kei nai saluaki sa vakamarautaka na loma ni tamata; sa vakakina na kena kamikamica na wekana ni sa bose vata kaya mai na vu ni yalona.” (Vkai. 27:9) O dau raica va qori nona ivakasala nomu itokani? (Wilika Same 141:5.) Na cava o na cakava ke tukuna vei iko e dua nomu itokani ni leqataka e dua na ka o cakava tiko? O raica qori me ivakaraitaki ni nona yalololoma, se o na cudru kina?

¹⁹ A marautaka o Paula nona veivolekati kei ira na qase ni ivavakoso e Efeso. A rairai kilai ira eso qori ena gauna era mai kila kina na ka dina. Ia ena iotioti ni nona bose kei ira, a vakasalataki ira vakadodonu. Era raica vakacava na ivakasala? Era sega ni cudru na itokani i Paula. Era vakavinavinakataka nona kauaitaki ira, era tagi sara ga nira vakasamataka ni qori na iotioti ni gauna era na raici koya kina.​—Caka. 20:17, 29, 30, 36-38.

20. Na cava ena cakava na itokani dau loloma?

²⁰ Era sega wale ga ni ciqoma na ivakasala vuku na itokani vinaka, era veivakasalataki tale ga. Ia e bibi meda kila tiko na gauna meda ‘kua kina ni siova na ka e sega ni noda.’ (1 Ces. 4:11, NW) Meda kila tale tiko ga nida na “dui vakatusai keda kecega vua na Kalou.” (Roma 14:12) Ia ena gauna veiganiti, na itokani dau loloma ena tukuna vakayalololoma vua na nona itokani na ivakatagedegede i Jiova. (1 Kor. 7:39) Me kena ivakaraitaki, na cava o na cakava ke dua nomu itokani e se bera ni vakawati e veimaliwai vakavoleka kei na dua e sega ni vakabauta? Ni o leqataka ni na vakaleqa nomudrau veitokani, o nanuma mo sa kua ga ni tukuna vua na ka o kauai kina? Se, ni sega ni muria nomu ivakasala, na cava o na cakava? Na itokani vinaka ena kere veivuke vei ira na ivakatawa dauloloma me vukei kina na nona itokani e mua cala tiko. Ena vinakati kina na yaloqaqa. Ia ena sega ni vakaleqai vakaca na veitokani e yavutaki ena noda lomani Jiova.

21. Na cava eda dau cakava ena so na gauna, ia na cava e bibi kina meda vaqaqacotaka noda veitokani ena ivavakoso?

²¹ Wilika Kolosa 3:13, 14. Ena so na gauna, eda na ‘vakararawataki’ ira na noda itokani, o ira tale ga era na cakava se tukuna eso na ka ena vakacudrui keda. “Ni da sa cala kecega e na ka e vuqa,” a vola o Jemesa. (Jeme. 3:2) Ia na veitokani dina e sega ni vakatau ena levu ni gauna eda cala kina, e vakatau ga ena noda vosota na cala qori. E bibi kina meda vaqaqacotaka noda veitokani ena noda veivosaki vakadodonu, da qai tu vakarau ni veivosoti! Nida vakaraitaka na loloma va qo, ena ‘vauci keda vinaka sara.’

[iVakamacala e ra]

O na Sauma Vakacava?

• Eda na itokani vinaka vakacava?

• Na gauna cava me muduki kina na veitokani?

• Na cava meda cakava me qaqaco tiko ga kina na veitokani?

[iYaloyalo ena tabana e 18]

Na cava a dei tu ga kina nodrau veitokani o Ruci kei Neomai?

[iYaloyalo ena tabana e 19]

O dau veikauaitaki?