Na Rai ni iVolatabu

Era na Vuki Beka Mera Agilosi na Tamata Era sa Mate?

A LEQA o Argyro, e dua na goneyalewa lailai, ni se qai yabaki vitu. Sa dua na ka na rarawa e bikai rau nona itubutubu ni rau raici koya ni davo koto ena kisinimate, e dara tu na vinivo vulavula. Vinakata sara na italatala me vakacegui rau, a mani kaya: “E vinakata na Kalou e dua tale na agilosi, mani kauti Argyro kina me lai tiko voleka vua. Sa veivukayaki tiko oqo na yalona ena itikotiko vakaturaga ni Kalou.”

E levu era taleitaka na vakasama ni o ira na agilosi era yalo ni tamata mate, dina ga ni vica wale na matalotu era tokona na vakabauta oqori. E vakabulabulataki na vakasama oqo ena iyaloyalo kei na porokaramu ena TV, e dau vakaraitaki kina na nodra vuki mera agilosi na tamata mate baleta nira sa vukei ira na bula.

Ia, e tiko beka na yavu vinaka mo vakabauta kina nira na vuki me agilosi na wekamu lomani era sa takali? Na cava sara mada e kaya na iVolatabu? Meda kila na kena isau, da raica mada na ka e kaya na iVolatabu me baleti ira na agilosi kei na kedra ituvaki dina na mate.

Era iBulibuli ni Kalou na Agilosi

Era dauveiqaravi kaukaua tawarairai ni Kalou na agilosi, era vakaitikotiko mai lomalagi. E duidui na ivakarau ni nodra bula mai na noda bula na tamata. Era kabula vakayalo e buli ira na Kalou. E kaya na iVolatabu: “Me ra ia [na agilosi] na vakavinavinaka ki na yaca i Jiova: ni sa vakarota ko koya, ka ra sa buli mai.”—Same 148:2, 5.

E vakaraitaka na iVolatabu ni vica vata na milioni na kedra iwiliwili na agilosi, ra okati kina na serafimi kei na jerupi, era yalodina ena nodra dui itavi kei na itutu era veiqaravi kina. (Same 103:20, 21; Aisea 6:1-7; Taniela 7:9, 10) A vinakati beka mera mate na tamata me rawa kina vua na Kalou me kauti ira kece mai na agilosi oqo? E macala tu ga ni sega. Na cava na vuna?

E vakaraitaka na iVolatabu nira a buli sara e liu na agilosi ni bera nira buli na tamata. Ena gauna e bulia kina o Jiova na vuravura mera na tawana na tamata, ‘era a sere vata, ka ra kaila ena reki’ o ira na agilosi—era cavuti mera kalokalo ivolasiga. (Jope 38:4-7) Kena ibalebale oqo nira a bula tu mai ena dua na gauna balavu sara ni bera ni buli na tamata e vuravura.

Kena ikuri, erau duidui vakalevu na agilosi kei na tamata ena kedrau ibulibuli kei na nodrau itavi ena inaki i Jiova.a A bulia na tamata na Kalou me “uasivi sobu vakalailai ga vei ira na agilose,” sa rauta me tukuni kina nira uasivi cake na kabula vakayalo oqo, okati kina na nodra vakasama kei na nodra kaukaua. (Iperiu 2:7) E “nodra i tikotiko dodonu” na agilosi o lomalagi. (Juta 6, VV) Ia, a inaki taumada ni Kalou me baleti ira na tamata mera na bula tawamudu e vuravura. (Vakatekivu 1:28; 2:17; Same 37:29) Kevaka rau a talairawarawa na imatai ni veiwatini vua na Kalou, ke rau a bula tu ga. O koya gona, mai na itekitekivu sara, a duidui tu na nodrau itavi na tamata kei na agilosi ena inaki ni Kalou.

Na Cava e Yaco Nida Mate?

E tiko tale e so na taro bibi meda dikeva: Na cava e yacovi ira na tamata nira sa mate? Era bula tiko beka ga ia ena dua tani tale na yago, me vaka na agilosi e lomalagi? E sauma vakamatata na iVolatabu na tikina oqo: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5) Kena ibalebale oqo nida sa sega ni bula tale tiko ena gauna eda mate kina. E sega ni dua tale na ka meda vakasamataka se meda vakila.

E tiko beka na inuinui me baleti ira na mate? Io! E vakaraitaka na iVolatabu ni nodra inuinui e levu era sa mate na veivakaturi. Dua na iwiliwili levu era na vakaturi mera tamata ra qai bula ena vuravura parataisi.—Luke 23:43; Joni 5:28.

E dua ga na iwiliwili lailai ni tamata e nodra inuinui mera na vakaturi mera lai bula i lomalagi—era lewe 144,000. O ira na 144,000 oqo era duidui sara vei ira na kabula vakayalo era vakatokai me agilosi. Me kena ivakaraitaki, o ira na 144,000 era tawamate, era veiliutaki kei Karisito mera tui, era na veiqaravi vakabete, era na lesi tale ga mera dauveilewai. (1 Korinica 6:3; Vakatakila 20:6) Oqo beka o ira na gonedramidrami era sa mate? Sega. O ira oqo na imuri i Karisito era sa vakatovolei ra qai vakadinadinataka nodra yalodina!—Luke 22:28, 29.

Vakasamataka tale ga na kedra ituvaki na tamata mate ni veidutaitaki kei ira na agilosi. E levu na ka era kila na agilosi baleta nira bula tiko, qai tu vei ira na galala ni vakatulewa, ia o ira na tamata mate era “sega ni kila e dua na ka.” (Vakatekivu 6:2, 4; Same 146:4; 2 Pita 2:4) Sa sega na nodra kaukaua, ia o ira na agilosi era sa “uasivi e na kaukauwa.” (Aisea 26:14, NW; Same 103:20) Kena ikuri, era mate na kawa i Atama ena vuku ni ivalavala ca, ia era uasivi na agilosi dau qaravi Kalou ra qai tu ena itutu vakadonui ena mata i Jiova.—Maciu 18:10.

Na vakasama nira vuki na tamata mate mera agilosi e dau usutu ni porokaramu ena TV se ena iyaloyalo, ia e sega ni tokona na iVolatabu. Na ivakavuvuli vakaivolatabu e vakamacalataki ena ulutaga oqo e vukei keda meda kila na ka dina me baleta na ka e yacovi ira na wekada lomani era sa takali. E vakadeitaka tale ga na iVolatabu ni o ira na agilosi yalodina—era a buli mera dauveiqaravi kaukaua ni Kalou—era cecere vei keda na tamata, ra tu vakarau tale ga mera cakava na loma i Jiova. Ka ni marau ni okati ena inaki ni Kalou mera vakayagataki na agilosi mera vakaraici ira, ra tokoni ira tale ga na tamata era rerevaki Jiova qai qaravi koya ena yalodina.—Same 34:7.

[iVakamacala e ra]

O BAU VAQAQA?

◼ Era sa vuki beka na wekamu lomani era sa takali mera agilosi se dauveiqaravi ni Kalou mai lomalagi?—Dauvunau 9:5, 10.

◼ Era mate beka na gone baleta ni vinakata na Kalou e levu tale na agilosi me tiko vata kei koya?—Jope 34:10.

◼ E rawa beka vei ira na mate mera taqomaki ira na bula?—Aisea 26:14.

[Tikina bibi ena tabana e 27]

“Me ra ia [na agilosi] na vakavinavinaka ki na yaca i Jiova: ni sa vakarota ko koya, ka ra sa buli mai.”​—Same 148:2, 5