O Cei o Ira na Agilosi?

NA TUI ni dua na matanitu kaukaua a kidroataka na ka e raica. Oya na nodratou bula mai na bukawaqa na lewe tolu a dodonu me ratou sa kamayavu! O cei a vakabulai ratou? E kaya na tui: “Me vakacaucautaki ko koya na Kalou . . . sa tala mai na nona agilose, ka vakabulai iratou na nona tamata eratou sa vakararavi vua.” (Taniela 3:​28) E cavuti e ke na tui Papiloni a bula ena sivia e 2,000 na yabaki sa oti a raica na agilosi ni vakabulai ratou na lewe tolu oya. Io, ena gauna makawa e lewe vica vata na milioni na tamata era vakabauta nira tu na agilosi. Ia, nikua, era sega wale ga ni vakabauta e vuqa nira tu na agilosi, era vakabauta tale ga ni tara na nodra bula na ka era cakava na agilosi. O cei sara mada o ira na agilosi, era vu mai vakacava?

E kaya na iVolatabu ni o ira na agilosi era kabula vakayalo, me vakataki koya ga na Kalou, e yalo na Kalou. (Same 104:4; Joni 4:​24) Era lewe vica vata na milioni na kedra iwiliwili na agilosi. (Vakatakila 5:​11) Ra qai “uasivi e na kaukauwa.” (Same 103:20) E dui tu na nodra itovo yadua na agilosi me vakataki keda ga na tamata qai soli tale ga vei ira na galala ni digidigi, ia, e sega ni tauvata kei keda na nodra itekitekivu. Na kena dina, nira a buli sara e liu ni bera ni tekivu na noda bula na tamata​​—⁠se na buli mada ga ni vuravura. E kaya na iVolatabu ni gauna a “tauyavutaki vuravura” kina na Kalou, “[e]ra a sere vata na kalokalo i volasiga [agilosi], ka ra kaila e na reki ko ira kecega na luve ni Kalou.” (Jope 38:​4, 7) Na Kalou a buli ira na agilosi, era vakatokai gona kina mera luve ni Kalou.

Na cava a buli ira kina na agilosi na Kalou? Ke tiko na kedra yaga ena noda bula na kawatamata, na cava sara mada era sa cakava? E tara beka na noda bula ena gauna oqo na ka era cakava? Ni tu vei ira na agilosi na galala ni digidigi, e bau so beka vei ira e digitaka mera muri Setani na Tevoro ra qai yaco mera meca ni Kalou? Na isau dodonu ni veitaro oqo ena kune ga ena iVolatabu.