Ra Taroga na iTabagone . . .

Au na Muduka Vakacava na Malumalumu Oqo?

“Au tekivu vakatavevele niu se qai yabaki walu. E muri, au sa qai vulica na rai ni Kalou me baleta na malumalumu oqo. Veigauna kece niu sikalutu, e dau ca na yaloqu. Au dau veinanuyaka, ‘Ena lomani au tiko beka ga na Kalou?’ Au sa kila tu ga niu na sega ni bula yani ina vuravura vou ni Kalou.”—Lui.a

DE DUA, o vesuki tu ena ivalavala ni vakatavevele, me vakataki Lui. O kila ni na marau o Jiova ke o vorata na gagadre mo vakayacora na ivalavala oqo, mo qai dau lewai iko vinaka, ni oqo e dua na vua ni yalo tabu ni Kalou. (Kalatia 5:22, 23, VV; 2 Pita 1:5, 6) Ia so na gauna o dau rawai tale kina. Ni yaco oqori, o na rairai tinimaka ni o sa na sega ga ni veisau rawa, ni sa rui dredre mo bulataka na ivakatagedegede savasava ni Kalou.

A vaka sara oqo na nona rai o Petero, e dua na itabagone. E kaya: “Ena gauna au dau sikalutu kina, e dau mosi na yaloqu. Au nanuma ni sa sega tale ni dua na ka au rawa ni cakava meu vosoti kina. Dau dredre meu masu. Au dau tekivuna noqu masu vaka oqo: ‘I Jiova, au sega ni kila se oni na rogoca na masu oqo se sega, ia . . . ’” Tautauvata tale ga na ka e nanuma o Anare, e dua tale na gonetagane. E kaya: “Vaka vei au niu dau veivakaisini. Ka ni sasaga gona meu duri ena veimataka, meu cakava na cakacaka ena siga oya. Dau dredre sara ga meu tiko ena soqoni vakarisito se meu vakaitavi ena cakacaka vakavunau.”

Ke tautauvata na ka o vakila me vakataki ratou o Lui, o Petero, se o Anare, kua ni yalolailai. Sega ni o iko taudua e nomu malumalumu oqo, o rawa gona ni cakava kina e dua na ka! E levu na itabagone—kei na itabaqase—a nodra malumalumu tale ga oqo, ia sa ra muduka rawa. O na rawa tale ga ni muduka na ivalavala oqo.b

Na Ka Mo Cakava ni Cokai Iko Nomu Lewaeloma

Me vaka eda raica ni dau cokai ira na dau vakatavevele na nodra lewaeloma. E sega gona ni vakabekataki ni nomu ‘rarawataka’ na ka e sega ni taleitaka na Kalou ena uqeti iko mo muduka na ivalavala oqo. (2 Korinica 7:11) Ia, ke o rarawa tale vakasivia ena sega ni yaga vei iko. Rawa ni vakavuna mo yalolailai sara ga, o nanuma kina mo soro koso.—Vosa Vakaibalebale 24:10.

O koya gona, tovolea me tiko vei iko na rai dodonu. Io, na vakatavevele e dua na ivalavala tawasavasava. Ni rawa ni “vakabobulataki” iko ena “gagadre kei na veimataqali marau e vuqa,” qai bucina na itovo ni rai e rawa ni vakadukadukalitaka na nomu vakasama. (Taito 3:3, VV) Ia ena yasana kadua, na vakatavevele e sega ni okati vata kei na ivalavala dukadukali me vaka na veidauci. (Efeso 4:19) Ke nomu leqa gona na vakatavevele, kua ni nanuma ni o sa vakayacora na ivalavala ca ena sega ni bokoci rawa. Na ka bibi, oya, mo saga me kua ni rawai iko na gagadre ca oqo qai kua ni soro koso ni o vorata tiko!

So na gauna e dau rawarawa sara mo yalolailai ni o sikalutu. Ni yaco oqori, vakasamataka vinaka na ka e kaya na Vosa Vakaibalebale 24:16: “Ni sa bale vakavitu na tamata yalododonu, ia sa na tu cake tale: ia ko ira na tamata ca era na vukici sara e na ka ca.” Nomu rawai vakalekaleka e sega ni kena ibalebale ni o sa tamata ca. Kua gona ni soro. Vakadeuca na ituvaki a lai vakavuna na nomu sikalutu, qai saga ena nomu igu mo levea.

Kua ni beitaki iko tiko ga, vakayagataka na gauna oqori mo vakasamataka kina vakabibi na loloma ni Kalou kei na nona yalololoma. Kaya na daunisame o Tevita, e dua a rawai tale ga ina ivalavala ca ena so na gauna: “Me vaka sa lomana na luvena e dua na tamata, sa lomani ira vakakina ko Jiova era sa rerevaki koya. Ni sa kila ko koya na nodai bulibuli; sa nanuma ga ni da sa kuvu-ni-soso.” (Same 103:13, 14) Io, o Jiova e kila nida sega ni tamata uasivi qai “tu vakarau me veivosoti” ena gauna eda cala kina. (Same 86:5, NW) Ia ena yasana adua, e vinakata meda sasaga vakaukaua meda vorata na noda malumalumu.

Na cava soti o rawa ni cakava mo muduka kina na malumalumu oqo, mo kua tale ga ni dau sikalutu tiko?

E Yaga ke o Talaucaka na Lomamu

Dina ni ulutaga ni veivosaki e matanalevu ena vuqa na vanua na veiyacovi, ia e levu e se dredre tiko ga mera veivosakitaka vakasavasava, ena sala e rakorako. De dua, na nomu madua e vakadredretaka mo veivosaki kei na dua o dau talaucaka kina na lomamu. E kaya e dua na lotu Vakarisito e nona leqa ena vica vata na yabaki na vakatavevele: “Dua na ka noqu diva me a tu vei au na kaukaua me rawa niu veivosaki kina kei na dua me baleta noqu leqa ena gauna au se itabagone kina! E cokai au tu na noqu lewaeloma me vica vata na yabaki ena vuku ni noqu malumalumu, a tara sara vakaca na noqu veimaliwai, vakauasivi noqu veimaliwai kei Jiova.”

O cei mo talaucaka vua na lomamu? Ena veiganiti me dua e matua vakayalo, ena vinaka sara ke dua vei rau nomu itubutubu. O rawa ni tekivuna vaka oqo: “Au kerekere, daru rawa ni veitalanoataka mada e dua na ka e tawa tiko e lomaqu?”

A vakatulewataka o Mario me vosa vei tamana, e raica o koya ni kauai sara o tamana qai vakila tale ga na nona leqa. A vakatutusa sara mada ga o tamana ni a sotava tale ga na leqa oya ni se cauravou. Kaya o Mario: “Na nona vosa vakadodonu o Tamaqu kei na nona sega ni vunitaka na ka a cakava, e uqeti au sara ga vakalevu. Au nanuma kina ni kevaka sa rawa ni muduka, ena rawa tale ga vei au. E tarai au vakalevu na kauai nei Tamaqu, niu a tagi sara ga kina.”

A doudou o Anare me lai vosa vei dua na qase ni ivavakoso, a lomavakacegu sara ga ni rawa vua me cakava oya.c E kaya o Anare: “Ena gauna au vosa tiko kina vua na qase ni ivavakoso, au raica ni sa tonawanawa na matana. Niu vosa oti, e vakadeitaka vei au o koya ni o Jiova e lomani au. E kaya niu sega ni sotava duadua tiko na leqa oqo. Yalataka o koya ni na vukei au tiko, ena kauta tale ga mai e levu na ivakamacala mai na ivolavukevuke ni vuli iVolatabu. Na noqu vosa vua e uqeti au meu kua ni soro—kevaka mada ga au sikalutu tale.”

Me vakataki Mario kei Anare, o rawa ni vukei ena nomu saga mo muduka na vakatavevele. Muria na ivakasala ena kato, “Saga Vakaukaua Mo Valuta!” Io, o rawa ni muduka na malumalumu oqo!

[iVakamacala e ra]

VAKASAMATAKA MADA

◼ Na cava e bibi kina mo nanuma ni o Jiova e “tu vakarau me veivosoti”?​—Same 86:5, NW.

◼ Na cava soti o rawa ni cakava mo muduka kina na vakatavevele?

◼ Na cava mo kua ni madua kina na kere veivuke?

◼ Sala cava o rawa ni vakasamataka tiko ga kina na ka savasava?

[Kato/​iYaloyalo ena tabana e 19]

Nomu Sikalutu e Sega ni Kena iBalebale Mo Guce Kina!

E rawarawa sara mo vakasamataka: ‘Au se baci sikalutu, sa tawayaga na noqu sasaga.’ Vorata na vakasama oqo. Kua ni vakalaiva nomu sikalutu, se mani vakavica vata, me vakayalolailaitaki iko.

Dikeva e dua na kena ivakatautauvata: O cabeta tiko e dua na ikabakaba balavu. O mani tacaqe o butusiri sara, o qai bale vakalailai e muri. Vakacava, o na kaya beka, ‘Sa na vinaka ga meu siro sara i ra meu lai tekivu cabe tale mai’? Sega! Na cava gona mo yalolailai kina ena nomu saga tiko mo vorata na malumalumu e so?

Ena gauna o sikalutu kina, e dau salamuria na kena cokai iko nomu lewaeloma. E rawa ni o datuvu kina ena nomu vakasamataka ni sega na kemu yaga, ni o sega ni kaukaua qai sega ni yaga me caka vei iko e dua na ka vinaka. Mo kua ni lomoci ena vakasama vaka oqo. Ni rawa ni oti sara ga kina na kaukaua o gadreva mo rawa ni vosota tiko ga. Nanuma tiko: Na tamata rogo duadua me bau bula e vuravura, o Jisu Karisito, a gole mai me vakabulai ira na ivalavala ca, sega ni o ira na tamata uasivi. O koya gona, e sega ni dua vei keda ena vinaka vakaoti na ka e cakava ena gauna oqo.​—Mai na Awake! 8 Epereli, 1991, tabana e 15.

[Kato/​iYaloyalo ena tabana e 20]

Saga Vakaukaua Mo Valuta!

◼ Vakamua tani nomu vakasama ina so na ka yaga.​—Filipai 4:8.

◼ Kua ni dau vakasarava na ka e rawa ni vakavurea na gagadre ca.​—Same 119:37.

◼ Masulaka me soli vei iko na “kaukauwa mana levu.” ​—2 Korinica 4:7.

◼ Vakaogai iko ena cakacaka vakarisito.​—1 Korinica 15:58.

[Kato/​iYaloyalo ena tabana e 20]

iKuri ni Veivuke

Ena so tale na ivakamacala me baleta na kena muduki na vakatavevele, raica na wase 25 kei na 26 ena ivola Questions Young People Ask . . . Answers That Work, tabaka na iVakadinadina i Jiova.