WASE 25

Au na Muduka Vakacava na Vakatavevele?

“Au tekivu vakatavevele niu se qai yabaki walu. Dua na gauna au sa qai kila na rai ni Kalou me baleta na ivakarau qo. E ca sara ga na lomaqu ena gauna kece au rawai kina. Au kaya, ‘Na Kalou sa na sega tu ga ni lomani au!’”—Luiz.

NI O yacova na bula vakaitabagone, ena rawa ni kaukaua sara na gagadre ni veiyacovi. Ena rawa ni vakavuna mo dau vakatavevele.a Levu era na kaya ni sega ni dua na kena ca. Era kaya ni “sega ni dua ena rarawa kina.” Ia e tiko na vuna vinaka mo kua ni cakava kina na ivakarau qori. E vola na yapositolo o Paula: “Moni vakamatea gona na gagadre ni veitikiniyagomuni . . . na garogaro vakasisila.” (Kolosa 3:5) Na vakatavevele e sega ni vakamatea na garogaro vakasisila, e vakabulabulataka ga. Qo eso tale na ka mo kila me baleta na vakatavevele:

● Na vakatavevele e uqeta na yalo ni nanumi koya ga. Kena ivakaraitaki, ni dua e vakatavevele e saga tiko ga me vakaceguya nona gagadre.

● O koya e dau vakatavevele ena raici ira eso tale me ivurevure wale ga ni nona vakacegu, me vakacegui kina nona garogaro.

● Ni uqeta na vakatavevele na yalo ni nanumi keda ga, ena sega ni marautaki kina na veiyacovi ena bula vakawati.

Mo kua ni vakaceguya na gagadre ni veiyacovi ena nomu vakatavevele, ia mo saga mo lewai iko vinaka. (1 Cesalonaika 4:4, 5) Ena rawa vakacava? E kaya na iVolatabu mo kua ni biuti iko ena ituvaki ena vakabulabulataka na gagadre ni veiyacovi. (Vosa Vakaibalebale 5:8, 9) Ia vakacava ke o sa bobula tu ena vakatavevele? De dua o saga mo muduka, ia e sega ni rawa. O na rawa sara ga ni nanuma ni o na sega ni veisau rawa, ni na dredre tale ga mo muria na ivakatagedegede ni Kalou. E va sara ga qori nona rai o Pedro, e kaya: “Gauna au sikalutu tale kina, e ca sara ga na lomaqu. Au nanuma niu sa na sega ni vosoti rawa. E dredre sara ga meu masu.”

O sotava tale ga qori? Kua ni yalolailai, e tiko na ka o rawa ni cakava. E levu na itabagone kei na uabula era sa muduka rawa na vakatavevele. O rawa tale ga ni cakava qori!

Ni Ora na Lomamu

Me vaka eda sa raica mai, o ira na vakatavevele e dau ora na lomadra, se ca nodra lewaeloma. Na “rarawa e salavata kei na loma ni Kalou,” ena uqeti iko mo muduka na ivakarau qo. (2 Korinica 7:11) Ia ke ora vakasivia na lomamu ena vaka vu leqa tale. O na rawa sara ga ni yalolailai kina vakasivia mo soro ena nomu sasaga.—Vosa Vakaibalebale 24:10.

Saga gona me donu tiko ga nomu rai. Na vakatavevele e dua na ivalavala dukadukali. E rawa ni vakavuna mo “bobula tu ena veimataqali gagadre kei na lasa,” e rawa tale ga ni uqeta eso tale na itovo ca. (Taito 3:3) Ia na vakatavevele e sega ni okati me veiyacovi tawadodonu, me vaka na veidauci. (Juta 7) Ke o rawai ena vakatavevele, mo kua ni nanuma ni qori na ivalavala ca e sega ni vosoti rawa. E bibi ga mo vorata na gagadre qo qai kua vakadua ni soro ena nomu sasaga!

O rawa sara ga ni yalolailai ke o rawai tale kina. Ke yaco qori, mo nanuma na ka e tukuna na Vosa Vakaibalebale 24:16: “De bale vakavitu na yalododonu ena duri tale, ia o ira na tamata ca era na tarabe ena ka ca.” Ke o sasaga tiko o qai sikalutu, e sega ni kena ibalebale ya ni o tamata ca. Mo kua gona ni soro. Mo vakasamataka ga na ka e vakavuna mo sikalutu, qai saga mo kua ni vakaruataka.

Dau vakasamataka vakatitobu na loloma ni Kalou kei na nona dauveivosoti. E kila vinaka o Tevita ni sega ni rawarawa ni tiko noda malumalumu. E kaya: “Me vaka na nona yalololoma na tama vua na luvena, sa yalololoma o Jiova vei ira na rerevaki koya. Ni kila vinaka o koya na keda ibulibuli, e nanuma tiko nida kuvuniqele.” (Same 103:13, 14) E kila tiko o Jiova nida sega ni uasivi, e ‘tu vakarau gona me veivosoti.’ (Same 86:5) Ia e vinakata meda sasaga vakaukaua meda veisau. Qo eso na ka ena vukei iko mo muduka na vakatavevele:

Digia vinaka na ka ni veivakamarautaki. Vakacava e veivagarogaroi na iyaloyalo, porokaramu ni tivi kei na website o dau raica? E masulaka na daunisame vua na Kalou: “Ni vagolea tani na mataqu meu kua ni raica na ka tawayaga.”b—Same 119:37.

Saga vakaukaua mo vakasamataka e dua tale na ka. E vakatututaka e dua na lotu vaKarisito o William: “Ni bera ni o moce, wilika na iVolatabu se dua na ivola vakaivolatabu. E bibi mo vakasamataka e dua na ka vakayalo ni bera ni o moce ena bogi.”—Filipai 4:8.

Veitalanoataka nomu leqa. O na rairai madua mo tukuna nomu leqa vua e dua. Ia nomu cakava qori ena vukei iko mo muduka! E vakadinadinataka qori o David e dua na lotu vaKarisito. E kaya “Au veitalanoataka kei Ta. Au na sega vakadua ni guilecava na ka e tukuna, e matadredredre qai kaya, ‘Au vakavinavinakataki iko.’ E kila ni sega ni rawarawa noqu lai tukuna vua. E vakayaloqaqataki au sara ga qai uqeti au meu kua ni soro.

“E vakaraitaka o Ta eso na tikinivolatabu meu kila ni ka au cakava e sega ni kena ibalebale niu tamata ca. E wilika tale ga eso na tikinivolatabu meu raica kina na leqa e salavata mai kei na vakatavevele. E kaya meu sasaga tiko ga me keirau qai veitalanoa tale, meu kua ni yalolailai vakasivia keu mani rawai, meu saga mada me dua na gauna balavu meu kua ni sikalutu.” E qai tukuna o David: “E yaga sara ga vakalevu noqu wasea noqu leqa vua e dua, kei na nona vukei au.”c

[iVakamacala e ra]

TIKINIVOLATABU BIBI

“Dro tani gona mai na gagadre vakaitabagone, mo vakasaqara ga na yalododonu, na vakabauta, na loloma, na veiyaloni, kei ira na masuta na Turaga ena loma e savasava.”—2 Timoci 2:22.

VAKATUTU

Masu rawa ni bera ni kaukaua sara na gagadre ca. Kerea vua na Kalou o Jiova me solia vei iko  “na kaukaua e uasivia na kaukaua ni tamata” mo rawa ni vorata kina na veitemaki.—2 Korinica 4:7.

O Bau Kila . . . ?

Ke da sega ni qaqarauni, eda na rawa ni rawai ena gagadre ni veiyacovi. Ia na tagane se yalewa matua ena lewai koya vinaka ke mani tiko taudua mada ga.

KA ME CAKA!

Au na rawa ni vakasamataka tiko ga na ka savasava keu ․․․․․

Meu kua ni rawai ena gagadre ca, ia au na ․․․․․

Qo na ka au na via tarogi rau noqu itubutubu me baleta na ituvaki qo ․․․․․

CAVA O NANUMA?

● Na cava e bibi kina mo kila ni o Jiova e ‘tu vakarau me veivosoti’?—Same 86:5.

● E buli keda o Jiova me tiko vei keda na gagadre ni veiyacovi, ia e kaya meda lewa vinaka na gagadre qori. Na cava gona e nuitaka o Jiova ni o rawa ni cakava?

[Tikina bibi]

“Au sa muduka rawa na vakatavevele. E savasava kina noqu lewaeloma vei Jiova, qori e bibi duadua vei au!”—Sarah

[iYaloyalo]

Ke o lutu ni o cici tiko, e sega ni kena ibalebale mo tekivu tale mai. Koya gona ke o rawai tale ena vakatavevele, e sega ni kena ibalebale ni sa tawayaga nomu sasaga