Na Rai ni iVolatabu

Sa Tawayaga Beka na Lotu Vakarisito?

RAUTA ni dua na ikatolu ni lewe i vuravura era kaya nira lotu Vakarisito. Ia nikua e sa qai tatawasewase ga vakapolitiki o vuravura, sega tale ga ni taqei rawa na itovo voravora. Kena ibalebale beka oqo ni leqa tiko na lotu Vakarisito a mai tauyavutaka o Jisu? Se cala ga nodra tautauri o ira na kaya voli nira lotu Vakarisito.

Ena dikevi tiko ena ulutaga oqo na ka a vakatavuvulitaka o Karisito kei na nona ivakaraitaki mera na vakatotomuria nona imuri. Ena dikevi tale ga e dua na rai sa dau matau tu vei ira na kaya nira lotu Vakarisito, ia e veicalati sara ga kei na ibalebale dina ni lotu Vakarisito.

Sa Veicalati na Lotu Vakarisito

Sivi e vica vata na drau na yabaki mai na mate i Karisito, sa buli me lotu ni Matanitu Vakaroma na lotu Vakarisito e veicalati kei na kena a tauyavutaka o Jisu. Sega ni dede, era sa lai dabeca na idabedabe cecere ni bula vakapolitiki kei na nodra bula na vetaicake kei Roma na lewenilotu oqo. Era sa lai vakaitaukeitaki ira sara ga. Sa wewenigusudra mai na iliuliu ni lotu me vakataki Augustine ni sa yaco mai na Matanitu ni Kalou a waraki tu. Era vakatavuvulitaka na iliuliu vaka oya ni nodra itutu era se qai mai taura ga ena buturara ni politiki, kei na lotu ena vakarawarawataka na kena cuqeni na loma ni Kalou e vuravura. Mai vakabibitaki kina na yaga ni sasaga vakatamata me tutaki kina na veika e vuravura.

Levu era sa mai vakabauta ni tiko na itavi ni lotu Vakarisito ena politiki. Era nanuma kina e so ni na vinakati ena so na gauna vua na lotu Vakarisito me guilecava mada na ka e vakabauta me rawa kina vua me colata nona itavi oya. Me kena ivakaraitaki, levu era dau cibitaka na ivakavuvuli i Jisu me baleta na veilomani kei na veisaututaki, ia ena gauna vata oqori era tokona na veivaluvaluti. Era dau uqeti ira nodra lewenilotu na veilotu mera masulaka me yaco mai na Matanitu ni Kalou, ia era tokoni ira tale na veiliutaki dau veivakasaurarataki.

Sa veicalati na lotu Vakarisito oqo kei na kena a tauyavutaka o Jisu. E bulia ga na tamata, qai levu era sa mai muria. Na lotu Vakarisito oqo e sa tawayaga sara ga. E vakadinadinataki oqori nida raica ga na kena sa sega tu ni dokai na ivakavuvuli vakaivolatabu ena lotu ni Veivanua Vakarisito.

Na Cava Sara Mada a Vakatavulica o Jisu?

De ra na kurabuitaka e so ni a kaya sara ga o Jisu nira na “sega ni vakavuravura” na nona imuri me vakataki koya ga. (Joni 17:15, 16) Na cava a kaya kina oya vei ira nona tisaipeli o Karisito? E vakamacalataka na vuna o Joni, na yapositolo erau dau veivolekati sara kei Jisu. E vola: “Sa tu na vuravura taucoko e na kaukauwa ni Vunica.”​—1 Joni 5:19, VV.

E uqeti keda na ivakavuvuli i Karisito meda nuitaka na Matanitu ni Kalou, sega ni sasaga vakatamata, me na kauta mai na lewadodonu kei na lewa vinaka ena vuravura. (Maciu 6:10) O Jisu mada ga a sega ni via veisautaka na ivakarau ni bula sa tu rawa ena gauna oya. Bau cata sara ga me ciqoma na itutu vakapolitiki. (Joni 6:15) Sega tale ga ni vakadonuya me wali na veileti ena itovo kaukaua. (Maciu 26:50-53; Joni 18:36) A sega ni vola o Jisu e dua na yavu ni vakavulewa se ivola matailalai ni lawa e vauca e dua na matanitu. A sega ni veitotaki ena veika vakapolitiki a dau veiletitaki ena nona gauna. Me kena ivakaraitaki, a sega ni saga me valataka nodra dodonu na tamata bobula, se liutaka nodra sasaga na Jiu me vorati o Roma.

Ia, e sega ni kena ibalebale oqo ni a sega ni kauaitaki ira na lewenivanua o Jisu, se na nodra leqa. Levu sara na ka e vakatavulica e vakauqeta kina na yalo ni veikauaitaki. Dau vakadreti ira nona imuri mera dina ena kena saumi na ivakacavacava, mera dau vakamalumalumu tale ga vei ira e nodra dina na veiliutaki. (Maciu 22:17-21) Nona ivakavuvuli e uqeta na kena kauaitaki na veika era leqa kina e so, mera qai vukei. E uqeta tale ga na veidokai, veinanumi, veivosoti, kei na dau yalololoma. (Maciu, wase 5-7) E kilai levu ni dau vakabibitaka o Karisito me lomani na Kalou kei ira na tamata kece ga.​—Marika 12:30, 31.

Lotu Vakarisito Dina Nikua

Ena vakacava gona na ivalavala i koya e muri Karisito dina? Ena vakatotomuri Jisu. Oqori ena nona talairawarawa ina lawa ni matanitu e tiko kina, ia ena tawaveitovaki ena veika vakapolitiki. (Joni 12:47, 48) Ke mani dredre vakacava na ituvaki e sotava, ena dei tu ga ena ivakavuvuli vakarisito, ena sega ni soro. (1 Pita 2:21-23) Sega ni kena ibalebale oqo ni na sega ni kauai ena veika e yaco yavokiti koya. Na lotu Vakarisito dina ena kauaitaka sara ga na nodra bula e so tale me vakataki Jisu. (Marika 6:34) Ena vakaogai koya tale ga ena nodra vukei e so tale mera kila ra qai bulataka na ivakavuvuli i Karisito, mera na vakila kina na bula marau.​—Joni 13:17.

O ira na iVakadinadina i Jiova nikua era saga mera vakatotomuri Karisito ena nodra bula e veisiga. Era tovolea mera lewenivanua vinaka era dau doka na lawa, ia era na sega ga ni vakavuravura. Era muri Jisu tale ga ena nodra sega ni vakaitavi ena veisei vakapolitiki se itovo kaukaua e sa ivakarau tu ni bula edaidai. Era nuitaka ga na Matanitu ni Kalou me na mai walia na leqa kei vuravura. Na lotu Vakarisito dina e kauta mai na bula marau kei na bula veiyaloni vei ira na lewena. (Joni 13:34, 35) E sega vakadua ni tawayaga.

O BAU VAQAQA BEKA?

◼ Mera vakaitavi beka ena veika vakapolitiki na lotu Vakarisito?​—Joni 6:15.

◼ A vakatura beka na Karisito me wali na veileti ena itovo kaukaua? ​—Maciu 26:50-53.

◼ Na cava na ka era kilaitani kina na lotu Vakarisito dina?​—Joni 13:34, 35.

[iTaba ni Credit Line ena tabana e 18]

EL COMERCIO, Quito, Ecuador