Na Rai ni iVolatabu

Sa Lewai Oti Tu Beka Nomu Bula?

E levu era vakabauta ni dua na igu kaukaua cake sa lewa oti tu nodra bula kei na ka ena yacovi ira. Era nanuma ni sa lewa oti tu na Kalou na veika me baleti ira ena gauna era kunekunetaki kina me yacova nodra mate. Era dau kaya tale ga, ‘E kaukaua duadua na Kalou qai kila na ka kece, se vuku duadua, ena kila vinaka na veika sa yaco oti, kena e yaco tiko kei na veigauna se bera mai.’

NA CAVA nomu rai me baleta na vakasama qo? Sa lewa oti tu na Kalou na ivakarau ni nomu bula kei na ka ena yacovi iko? E lai basika kina na taro: E tiko dina vei keda na galala ni vakatulewa se ka ga ni tatadra? Na cava e tukuna na iVolatabu?

Kila Kece se Digia me Kila Eso na Ka?

E vakamatatataka na iVolatabu ni kila tu na veika e se bera ni yaco na Kalou. E tukuna na Aisea 46:10, ni sa kila “na kenai vakataotioti mai na kenai vakatekivu.” A bau vakayagataka eso mera vunivola mera vola e levu na parofisai. (2 Pita 1:21) Ra qai yaco dina na parofisai kece qori baleta ni tu vua na Kalou na vuku kei na kaukaua me cakava. Koya gona, e sega wale ga ni kila na ka e rawa ni yaco, ia ke vinakata ena lewa tale ga na ka me yaco. Ia, e lewa beka na Kalou na ka ena yacova na tamata yadua, se na iwiliwili mera vakabulai? E sega ni tukuna qori na iVolatabu.

E vakatavulica na iVolatabu ni digia na Kalou me lewa ga eso na ka e se bera ni yaco. Kena ivakaraitaki, a parofisaitaka na Kalou ni na bula e “dua nai soqosoqo levu” era tamata yalododonu, ena gauna ena vakarusai kina na veika vakavuravura. (Vakatakila 7:9, 14) Ia, dikeva ni a sega ni tukuna na kedra iwiliwili. Na vuna? E sega ni lewa rawa tu na ka ena yaco ena bula ni tamata yadua. Na Kalou e vaka e dua na tama dauloloma ena dua na vuvale levu. E kila ni so na luvena era na lomani koya, ia e sega ni lewa rawa tu na kedra iwiliwili.

Vakatauvatana mada na sala e vakayagataka kina o Jiova na nona kaukaua kei na nona lewa na ka e se bera ni yaco. E Kalou Kaukaua Duadua. (Same 91:1; Aisea 40:26, 28) Ia e lewa beka vakamatau nona kaukaua? Io. Kena ivakaraitaki, a digia me kua ni vakarusai Papiloni na meca ni matanitu makawa o Isireli me yacova na kena gauna donu. A kaya na Kalou, ‘Au a tiko ga qai tarovi au.’ (Aisea 42:14) E va tale ga qori nona vakayagataka na ka sa kila rawa tu kei na nona lewa na ka me yaco. E lewa matau o Jiova ni doka na galala ni vakatulewa e solia vei keda.

Na nona lewa vinaka na Kalou na nona kaukaua, e sega ni vakaraitaka ya ni yalani na ka e rawa ni cakava se me sega ni uasivi. Ia e vakalagilagi ga kina na nona cecere, eda taleitaki koya, e vakaraitaka ni sega wale ga ni veiliutaki ena kaukaua kei na vuku, ia ena loloma tale ga kei na nona doka na galala ni nodra vakatulewa na nona ibulibuli vuku.

Ena yasana adua, ke sa lewa oti tu na Kalou na ka kece ena yaco, okati kina na vakacalaka vakadomobula kei na ivalavala torosobu kece, ena sega beka nida beitaki koya ni vakavuna na ca kei na rarawa kece e yaco tu e vuravura? O koya gona, nida dikeva sara vakavinaka, ena sega ni dokai na Kalou ena ivakavuvuli ni kena sa lewai oti tu mai na noda bula, ia e beci ga kina. E dusia ni Kalou voravora, tawadodonu, qai tawaloloma​—veibasai sara ga kei na ka e tukuna na iVolatabu me baleti koya.​—Vakarua 32:4.

Nomu na Vakatulewa

A kaya o Jiova vei ira na Isireli ena vuku i nona dauveiqaravi o Mosese: “Ni’u sa tauca e matamuni na bula kei na mate, . . . ia mo ni digitaka mada na bula . . . mo ni lomani Jiova na nomuni Kalou, mo ni vakarorogo ki na nona vosa, mo ni kabiti koya talega: ni sa nomuni vu-ni-bula ko koya, kei koya sa vakabalavutaka na nomuni bula.” (Vakarua 30:19, 20) Ke sa lewa oti tu na Kalou na nodra bula na Isireli yadua, oya mera na bula nira talairawarawa vua se mera na mate nira talaidredre vua, ena tawayaga qai veivakaisini nona vosa. E “vinakata na ka dodonu [“lewadodonu,” NW]” na Kalou qai nona itovo sara ga na loloma. O vakabauta ni na tawadodonu na ka e cakava?​—Same 37:28; 1 Joni 4:8.

Na nona uqeti ira nona tamata na Kalou mera digitaka na bula e vauci tale ga kina o keda nikua, vakauasivi na kena sa yaco tiko na parofisai vakaivolatabu. E vakatakila ni sa toso totolo mai na gauna me cava kina na ituvaki ca ni vuravura nikua. (Maciu 24:3-9; 2 Timoci 3:1-5) Eda na digitaka vakacava na bula? Meda muria na ka ra cakava na Isireli ena gauna makawa.

O na “Digitaka” Vakacava “na Bula”?

Eda digia na bula ena noda “lomani Jiova,” “vakarorogo ki na nona vosa,” kei na noda “kabiti koya talega.” Ena rawa ga nida cakava qori nida kila vakavinaka na Kalou da qai kila na veika e vinakata vei keda. A kaya o Jisu Karisito ena nona masu vua na Kalou: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

E kune na kilaka talei qo ena iVolatabu, e kilai ni Vosa ni Kalou. (Joni 17:17; 2 Timoci 3:16) Na isolisoli vakayalo qo e ivakadinadina ni sega ni lewa oti tu na Kalou na noda bula, ia e vinakata meda yavutaka noda vakatulewa ena itukutuku e vakarautaka.​—Aisea 48:17, 18.

Ena nona vakayagataka na iVolatabu, e vaka e tukuna tiko vei keda na Kalou: ‘Qo na noqu inaki me baleta na vuravura kei na kawatamata, kei na ka mo cakava mo bula tawamudu kina. Mo vakatulewataka ga mo vakarorogo vei au se sega.’ Io, e veiraurautaka o Jiova nona lewa na ka e se bera ni yaco kei na nona doka na galala ni noda vakatulewa! O na digitaka beka na bula ena nomu ‘vakarorogo ina vosa [ni Kalou], mo kabiti koya tale ga’?

BAU VAKASAMATAKA?

◼ E yalana vakacava o Jiova nona kila na veika e se bera ni yaco? ​—Vakarua 30:19, 20; Aisea 46:10.

◼ Na cava ena sega ni lewa kina na Kalou na ka kece ena yaco, okati kina na veika ca?​—Vakarua 32:4.

◼ Na cava na yavu ni noda bula ena veisiga mai liu?​—Joni 17:3.

[Tikina bibi ena tabana e 15]

E vakavuvulitaka na iVolatabu ni digia na Kalou me lewa ga eso na ka e se bera ni yaco