Cava e Kaya na iVolatabu me Baleta na Galala ni Vakatulewa? Sa Lewa Oti tu na Kalou na Noda Veisiga Nimataka?
Kena iSau Vakaivolatabu
E dokai keda na Kalou ni solia na galala meda vakatulewa vakataki keda, ia e sega ni sa lewai oti se lewa na Kalou na ka meda cakava. Raica mada na ka e tukuni ena iVolatabu.
E buli keda na Kalou meda ucui koya. (Vakatekivu 1:26) Eda ucuya na Kalou nida vakaraitaka na itovo me vaka na loloma kei na lewadodonu, eda sega ni vakataki ira na manumanu nira cakava na ka ena vuku era sucu kaya mai. Me vaka ga na Dauveibuli, e tiko vei keda na galala ni vakatulewa.
Eda rawa sara ga ni kila na noda veisiga nimataka. E uqeti keda na iVolatabu meda ‘digia na bula nida rogoca na domo ni Kalou,’ oya nida digia meda talairawarawa ena nona ivakaro. (Vakarua 30:19, 20) Ena qai vakaibalebale ga na tikina qori ke tiko vei keda na galala ni vakatulewa. E sega gona ni vakasaurarataki keda na Kalou meda cakava na ka e kaya, e vakamasuti keda ga: “Kevaka wale ga o rogoca na noqu ivakaro! Ena vaka na uciwai na nomu vakacegu.”—Aisea 48:18.
Sega ni sa lewai oti tu na veika vinaka se ca eda na sotava. Ke da sasagataka tiko e dua na ka, ena vinakati meda cakacaka vakaukaua. E kaya na iVolatabu, “Na ka kece e cakava na ligamu mo qarava ena nomu igu.” (Dauvunau 9:10) E kaya tale: “Na lalawa ni tamata gumatua ena tini vinaka ga.”—Vosa Vakaibalebale 21:5.
Na galala ni vakatulewa e dua na isolisoli ni Kalou e uqeti keda meda lomani koya ena ‘lomada taucoko,’ qori na ka eda vinakata.—Maciu 22:37.
E lewa na Kalou na ka kece?
E cavuti ena iVolatabu ni Kaukaua Duadua na Kalou. Ena sega ni dua e yalana na nona kaukaua. (Jope 37:23; Aisea 40:26) Ia e sega ni vakayagataka nona kaukaua me lewa na ka kece. Me kena ivakaraitaki, e kaya na iVolatabu ni “tarovi” koya na Kalou vei Papiloni makawa, na kedra meca na nona tamata. (Aisea 42:14) E vaka kina ena gauna qo, e digia me vosoti ira na vakayagataka cala nodra galala ni vakatulewa mera vakaleqai kina e levu. Ia na Kalou ena sega ni vosoti ira tiko ga.—Same 37:10, 11.