Veisau Nona Rai o Qasenivuli
◼ Ena vica na yabaki sa sivi, a tukuna vei ira nona gonevuli e dua na qasenivuli e Batumi, e dua na siti mai Georgia, mera tukuna veitaravi na Vunau e Tini. A kurabui na qasenivuli ni cavuta donu na kena veitaravi o Anna, e dua na nona gonevuli. A sauma tale ga vakavinaka eso na taro vakaivolatabu. A tarogi koya nona qasenivuli se kila tu vakacava e levu na ka. Ni tukuna o Anna ni vulica tiko na iVolatabu kei ira na iVakadinadina i Jiova, a tarovi koya vakasauri nona qasenivuli qai tukuna nira lotu yalodredre.
Ena dua na gauna, a tukuna na qasenivuli mera vola na gonevuli na italanoa me baleta na bula e Georgia kei na leqa era dui vakila. A tinia va qo nona italanoa o Anna: “Sa na bau wadrega nodra sasaga na tamata mera veisautaka vakadua na vanua qo baleta ni tukuna na Jeremaia 10:23: ‘Sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.’ Ena walia ga na leqa kece na Matanitu ni Kalou.”
Ena siga tarava a vakacaucautaka na italanoa i Anna na qasenivuli qai tukuna vei ira na kalasi: “Au marautaka dina nona italanoa o Anna, e vola ga ena nona vosa. E vakamacalataka kina ni rawa ni veisau na ituvaki kei vuravura.” A taleitaka tale ga na qasenivuli na itovo i Anna, e vakacaucautaki koya kina ena loma ni kalasi kei na nona dau isulusulu vinaka.
Nira sikovi koya yani e vale na iVakadinadina i Jiova, a tukuna na qasenivuli qo ni dau nanuma tu ga nira lotu yalodredre ia sa veisau nona rai ena vuku i Anna. Ena 2007, a tiko ena iVakananumi ni mate i Jisu Karisito kei ira na iVakadinadina i Jiova, a vakarorogo vinaka sara ena porokaramu.
Ni oti na iVakananumi, a tukuna na qasenivuli nei Anna ni qoroya sara ga na nodra kila vinaka tu na iVolatabu na iVakadinadina i Jiova. Ena gauna qo e sa dau vuli iVolatabu tiko kei ira na iVakadinadina. Sega ni vakabekataki ni o vaka na qasenivuli qo, e rabailevu na nomu rai me baleta na veika era vakabauta eso tale kei na nodra ivakarau. Vakacava mo kerea e dua na iVakadinadina i Jiova me vakavulici iko wale ena iVolatabu?
[iYaloyalo ena tabana e 29]
Vola tiko o Anna na nona italanoa