iTukutuku Mai na Daukacivaka na Matanitu

Ra Ciqoma na iTukutuku Vinaka o Ira Mai Latvia

NA IVOLATABU e vakamatatataka ni vinakata na Kalou “me bula na tamata kecega, ka mai kila sara nai vakavuvuli dina.” (1 Timoci 2:⁠4) Era sa mai rogoca na itukutuku vinaka o ira era a sega ni bau rogoca rawa ena veiyabaki sa oti! Mai Latvia, vaka ga ena yasa i vuravura tale e so, era ciqoma na itukutuku o ira e duidui na yabaki ni nodra bula qai duidui tale ga na vanua era cavutu mai kina, me vaka era vakaraitaka na vakasavuirogorogo e ra.

• Rau a taro ivakasala e dua na veitinaniyalewa vua e dua na marama e Rēzekne, na tauni ena tokalau kei Latvia, ena vanua rau via lako tiko kina. Ni vakamacala oti vei rau na marama oya, e dua o koya na iVakadinadina i Jiova, a sureti rau sara ina nodra soqoni na iVakadinadina.

Me vaka ni rau daulotu na veitinani oqo, rau mani vakadonuya me rau na tiko ena soqoni. Ni rau sa lako tiko ina soqoni, erau duavata ni rau na biubiu mai na vanua ni soqoni ena gauna totolo duadua kevaka erau raica e dua na ka e malewa vei rau. Ia, erau mani sega ni biubiu baleta ni rau sa rui taleitaka vakalevu na soqoni. Rau ciqoma na veisureti me rau vuli iVolatabu, qai rau tiko tale ga vakawasoma ena soqoni. Ena loma ni tolu ga na vula, e sa lomadrau me rau vakaitavi ena cakacaka vakavunau kei na nodrau vakanamata tu me rau na papitaiso.

• Ena dua na korolevu mai na ra kei Latvia, a sotavi Ana kina e dua na iVakadinadina. E sa yabaki 85 o Ana, a taleitaka sara na ka e rogoca mani vakadonuya me vuli iVolatabu. E tusaqati koya sara vakaukaua na luvena yalewa kei ira na wekana. Ia, a sega ni vakalaiva o Ana na nona tusaqati, nona tauvimate se na ituvaki qase e tu kina me tarova na nona vuli iVolatabu tiko ga.

Ena dua na siga, a tukuna o Ana vei luvena yalewa ni sa na vakarau papitaiso. “Kevaka o na papitaiso, o na kau mo lai qaravi ena valenimalumalumu,” e kaya na luvena yalewa. Na vosa ni veivakarerei oqo a sega ni bau veisautaka na loma i Ana. A mani papitaiso ga ena nona vale baleta ni sa qase sara qai malumalumu.

E raica vakacava o luve i Ana na ka sa mai yaco oqo vei tinana? E veisautaka sara ga na lomana, ni a qai vakarautaka e dua na kakana vinaka sara me vakayagataka o tinana ni papitaiso oti mai. Oti oya a tarogi tinana o goneyalewa, “O sa papitaiso oti oqo, na veisau cava o vakila ena nomu bula?” A sauma vakacava o Ana? “E vaka sara ga na sucuvou!”

• Ena Tiseba 1998, erau a sotava e dua na turaganivalu vakacegu ni koro makawa o Rusia e rua na iVakadinadina. E vakabauta o koya ni tiko na Dauveibuli, mani vinakata sara me vuli iVolatabu, e muri sa qai tomani koya o watina. Dua na ka na nodrau toso, sega ni dede rau sa dautukutuku bera ni papitaiso. Ena vulaikatakata e tarava a papitaiso kina na turaganivalu vakacegu oya. E vakayaloqaqataki ira kece ena loma ni ivavakoso na veiwatini oqo ena nodrau lomana vakalevu na veika vakayalo. Me kena ikuri, erau vakarabailevutaka na nodrau veiqaravi ena nodrau vakaitavi ena kena veisautaki na itaratara ni dua na vale vakaitaukei ina dua na Kingdom Hall totoka.