Ra Taroga na iTabagone
Rawa Niu Marautaka Vakacava na Wili iVolatabu?
E vaka cava na wasoma ni nomu wili iVolatabu? (Toqa e dua)
□ Veisiga
□ Veimacawa
□ So tale․․․․․
Vakaotia na iyatuvosa qo.
Au sega ni dau marautaka na wili iVolatabu ni yaco na veika qo . . . (Toqa kece na ka e dau vakavuna)
□ Vucesa
□ Sega ni matata
□ Kauai ena so tale na ka
□ So tale ․․․․․
O SEGA beka ni dau taleitaka na wili iVolatabu? Ke vaka kina, o na rairai duavata kei na ka e tukuna o Will, e yabaki 18, “E rawa ni vakavucesa na wili iVolatabu.” Ia, e tukuna tale, “Ena va ga qori nomu rai ke o sega ni kila na iwalewale ni kena wiliki.”
Na cava mo kila kina na iwalewale ni wili iVolatabu? Sega li ni o via kila na sala mo
◼ dau vakatulewa vinaka kina?
◼ rawata kina na itokani vinaka?
◼ vosota na lomaocaoca?
E tiko ena iVolatabu na idusidusi ni taro qori kei na vuqa tale, era vaka tiko na vatutalei. Macala ga ni na sega ni rawarawa na kena kunei na vatutalei qori. Ia, na noda sasaga vakaukaua ena vaka ga noda lai qara na vatutalei: Na kena dredre na ilakolako, na kena taleitaki na kunea na vatutalei!—Vosa Vakaibalebale 2:1-6.
O na kunea vakacava na iyau vuni ena iVolatabu? Na kato ena yasana imatau e tu kina eso na vakatutu ena iwalewale mo wilika kina—qai tiko e dakuna—na ituvatuva mo muria. Tovolea tale ga eso na vakatutu o taleitaka ena vica na tabana tarava.
Levu na taro e dau veivosakitaki ena “Young People Ask” e rawa ni kune ena Web site www.watchtower.org/ype
Ke o rawa ni vakayagataka na Internet, o rawa ni wilika na iVolatabu ena www.watchtower.org/fn/bible
ME VAKASAMATAKI
E dau kainaki, ke o via rawata vinaka e dua na sasaga, mo qacoya sara.
◼ E dina vakacava qori ena noda wili iVolatabu?
◼ Na gauna cava o rawa ni wili iVolatabu kina?
[Kato/iYaloyalo ena tabana e 23]
IWALEWALE NI NOMU WILI IVOLATABU
Ni bera ni o tekivu . . .
◼ Vaqara e dua na vanua vakanomodi, mo kua ni kauai ina so tale na ka ni o wiliwili tiko.
◼ Masuta me tiko vei iko na yalomatua.
Ni o wiliwili . . .
◼ Vakayagataka na mape kei na iyaloyalo mo raitayaloyalotaka kina na veika e volai tu ena iVolatabu.
◼ Vakasamataka na ituvaki, qai dikeva vakamatailalai.
◼ Vakawilika na ivakamacala e ra kei na idusi se cross-reference.
◼ Taroga eso na taro qo:
ITUKUTUKU DINA: A yaco qo ena gauna cava? O cei a vosa tiko? A tukuni tiko vei cei?
KENA IBALEBALE: Au na vakamacalataka vakacava qo?
KENA YAGA: Na cava e okata kina na Kalou o Jiova na itukutuku qo ena nona Vosa? Na cava e dusia me baleta na nona itovo kei na ivakarau ni nona dau cakava na ka? Na cava au vulica eke ena yaga ina noqu bula?
Ni o wiliwili oti . . .
◼ Vakekeli tale. Vakawilika eso tale na ivola e tabaka na iVakadinadina i Jiova, me vaka na Insight on the Scriptures kei na “All Scripture Is Inspired of God and Beneficial,” ke tabaki ena nomu vosa.
◼ Masu Tale. Tukuna vei Jiova na ka o vulica kei na sala o sa lalawataka mo na vakayagataka kina. Vakavinavinakataki koya ni vakarautaka nona Vosa, na iVolatabu.
[Kato/iYaloyalo ena tabana e 26]
ITUVATUVA NI WILI IVOLATABU CAVA O NA MURIA?
Digidigi . . .
□ Wilika na iVolatabu me vaka ga na kena veitaravi.
□ Wilika veitaravi na itukutuku me vaka na veitaravi ni kena volai na ivola, se na veitaravi ni gauna a yaco kina.
□ Me duidui na iwasewase ni iVolatabu mo wilika e veisiga.
Moniti: iTukutuku makawa e vakasakiti (Vakatekivu ina Esiteri)
Tusiti: Nona bula o Jisu kei na nona veivakavulici (Maciu ina Joni)
Vukelulu: Lotu vaKarisito taumada (Cakacaka)
Lotulevu: Parofisai kei na idusidusi ni itovo vinaka (Aisea ina Malakai, Vakatakila)
Vakaraubuka: Serekali veivakauqeti kei na sere (Jope, Same, Sere i Solomoni)
Vakarauwai: iVakavuvuli vuku ena ka ni bula ni veisiga (Vosa Vakaibalebale, Dauvunau)
Sigatabu: iVola ina veivavakoso (Roma ina Juta)
Se ituvatuva cava o digia, mo kila vinaka ga na vanua o sa yaco tiko kina! Biuta qo ✔ ni oti nomu wilika e dua na wase, se dua tale na sala mo vola kina na wase o sa wilika oti.
Kotiva qo qai maroroya ena nomu iVolatabu!
[Kato/iTaba ni droini ena tabana e 24]
ME BULABULA NOMU WILIWILI!
Saga me bulabula na nomu wiliwili. Me kena ivakaraitaki:
□ Tuva e dua na yaca ni vuvale qai droinitaka na kena iyatukawa.
□ Droini. Kena ivakaraitaki, ni o wilika na kena italanoa e dua na dauveiqaravi yalodina, sema na nona itovo, na ka e cakava kei na veivakalougatataki a sobuti koya.—Vosa Vakaibalebale 28:20.
[Droini]
iTokani ni Kalou
↑ Talairawarawa
↑ Yalodina
↑ ↑
Eparama
□ Droinitaka na kena italanoa.
□ Droinitaka eso na droini rawarawa ena veitaravi ni ka a yaco. Vakamacalataka na ka e yaco tiko ena droini yadua.
□ Tara na ivakatakarakara, me vaka na waqa i Noa.—Kena ivakaraitaki, raica na Yadra! ni Janueri-Maji 2007, tabana e 20.
□ Wilivola e cake kei ira nomu itokani se lewe ni vuvale. Vakatutu: Lesia e dua me wilika na italanoa. So tale mera cavuta na vosa era tukuna o ira na talanoataki tiko ena dua na iwase ni iVolatabu.
□ Digia e dua na italanoa, qai ripotetaka me vaka e dua na itukutuku ena tivi. Vakamacalataka na itukutuku, okati kina nodra vakatarogi o ira na tukuni ena italanoa kei na so tale era vakadinadinataka na ka a yaco.
□ Digia e dua na italanoa a vakatulewa cala kina e dua, ia mo cakava ga me duidui na kena itinitini! Me kena ivakaraitaki, na nona cakitaki Jisu o Pita. (Marika 14:66-72) A rawa ni vakatulewa vakavinaka vakacava o Pita ena gauna a vakatovolei kina?
□ Sarava se vakarogoca eso na katokatoni ena tepi ni drama vakaivolatabu.
□ Vola ga na nomu drama. Okata kina na ka ni vuli mai na itukutuku qori. (Roma 15:4)
VAKASAMA: Dramataka na drama qori kei na so na nomu itokani.
[Kato/iYaloyalo ena tabana e 27]
ME VEIVAKAUQETI
◼ Me dua nomu isausau! Vola e ra na tikinisiga o na tekivutaka kina nomu wili iVolatabu.
․․․․․
◼ Digia na iwasewase ni iVolatabu o dau taleitaka. (Raica na kato “iTuvatuva ni Wili iVolatabu Cava o na Muria?”) Oti, vola e ra na iwasewase ni iVolatabu o na wilika e liu.
․․․․․
◼ Tekivu vakalalai. Rawa ni 15 ga na miniti nomu wiliwili, e vinaka cake qo mai na nomu sega sara ga ni wiliwili. Vola e ra na balavu ni gauna o na rawa ni tikica mo wiliwili kina.
․․․․․
Vakatutu: Me dua na nomu iVolatabu me ka ga ni vuli, mo volavola kina. Makataka na tikinivolatabu e bibi vei iko.
[Kato/iYaloyalo ena tabana e 27]
KA ERA TUKUNA NOMU ICABA
“Au tovolea meu wilika vakalalai na iVolatabu ena veibogi kece ni bera niu moce. Au rawa ni vakasamataka kina na veika vinaka niu moce lutu.”—Megan.
“Au dau vakasamataka vakabibi e dua na tikinivolatabu me 15 na miniti. Au na wilika na ivakamacala kece e dau toka e ra e tokona na tikina oya, na veitikinivolatabu e tokona, qai vakekeli tale. So na gauna au sega ni vakaotia na vakekeli ena dua na tikinivolatabu, ia e levu cake na ka au vulica niu muria na iwalewale qo!”—Corey.
“Dua na gauna au wilika oti na iVolatabu ena loma ni 10 na vula. Niu cakava qo, au raica rawa kina na veisemati ni iwasewase ni iVolatabu au sega ni bau kila tu eliu.”—John.
[Kato/iYaloyalo ena tabana e 27]
NOMU DIGIDIGI!
□ Digitaka e dua na itukutuku ni ka a yaco. Na iVolatabu e vutucoqa ena itukutuku ni ka a yaco dina. Digitaka e dua o taleitaka qai wilika tasevu.
□ Digitaka e dua na Kosipeli. Wilika na Maciu (na imatai ni Kosipeli a volai), Marika (kilai na ituvaki vakasakiti era yaco kina), Luke (a vakatabakidua ina masu kei ira na marama), se Joni (a volaitukutukutaki kina e levu na ka e sega ni kune ena vo ni Kosipeli).
Vakatutu: Ni bera ni o wiliwili, raica vakalekaleka eso na itukutuku me baleta na ivola qori kei koya e vola mo kila vinaka kina na Kosipeli qori.
□ Digitaka e dua na same. Me kena ivakaraitaki:
Ke o galili qai sega nomu itokani, wilika na Same 142.
Ke o yalolailai ena vuku ni nomu malumalumu, wilika na Same 51.
Ke o lomatarotarotaka na yaga ni ivakatagedegede ni Kalou, wilika na Same 73.
Vakatutu: Mo vola na same era dau uqeti iko.
[Kato ena tabana e 26]
VAKEKELI TALE
◼ Vakasamataka na ituvaki. Dikeva na gauna e tukuni tiko ena tikinivolatabu, na vanua kei na ituvaki e yaco tiko ena ivakamacala ya.
iVakaraitaki: Wilika na Isikeli 14:14. A rairai yabaki vica o Taniela ena gauna a tukuna kina o Jiova ni ivakaraitaki vinaka, me vakataki Noa kei Jope?
iDusidusi: A volai na Isikeli wase 14 ni oti ga e lima na yabaki nona kau vakavesu i Papiloni o Taniela—kena rairai ni se itabagone.
Tikina e yaga: Sa rui gone beka o Taniela me dikeva kina o Jiova nona ivakaraitaki ni yalodina? Na vakatulewa vinaka cava a lai vakavuna nona vakalougatataki? (Taniela 1:8-17) Ena yaga vakacava vei iko na ivakaraitaki i Taniela mo dau vakatulewa vinaka?
◼ Dikeva vakamatailalai. Rawa ni dikeva ga e dua se rua na vosa.
iVakaraitaki: Vakatauvatana na Maciu 28:7 kei na Marika 16:7. Na cava a vola tale ga kina o Marika ni a vakarau rairai o Jisu vei ratou na tisaipeli kei “Pita talega”?
iDusidusi: A sega ni raica o Marika na ka a yaco qori; macala ga ni a rogoca vei Pita.
Tikina e yaga: Na cava a rairai lomavakacegu kina o Pita ni rogoca ni a via raici koya tale o Jisu? (Marika 14:66-72) E vakaraitaka vakacava o Jisu ni itokani dina i Pita? O na vakatotomuri Jisu vakacava mo dua na itokani dina?
◼ Vakekeli tale. Wilika eso tale na ivola vakaivolatabu me ikuri ni ivakamacala.
iVakaraitaki: Wilika na Maciu 2:7-15. Ena gauna cava ratou sikovi Jisu kina na tamata vuku?
iDusidusi: Raica na Vale ni Vakatawa Janueri-Maji 2008, tabana e 31, tabaka na iVakadinadina i Jiova.
Tikina e yaga: A vakarautaka vakacava o Jiova na ka me ratou bula kina na vuvale i Jisu ni ratou tiko e Ijipita? E rawa vakacava ni o vosota na ituvaki dredre ni o nuitaka na Kalou?—Maciu 6:33, 34.