Nona Dodonu o Koya e Qaravi Vakavuniwai

DAUVOLAVOLA NI YADRA! MAI ITALI

◼ Era sega ni dau tauri dra na iVakadinadina i Jiova. E yavutaki qo ena ivakaro vakaivolatabu, a tukuni mai na ivakatekivu: “Na lewena ga sa tiko kina na vu ni bula, io, na kena dra, mo dou kakua ni kania.” Era vakaroti tale ga na lotu vaKarisito ena imatai ni senitiuri: “Me tabu vei kemudou . . . na dra.”​—Vakatekivu 9:4; Cakacaka 15:29; Vunau ni Soro 17:14.

Ena vanua o Monterenzio, mai Itali, a tukuni vei ira na gonevuli ena sekeneri mera vola na bibi ni kena soli na dra. Dua vei ira na gonevuli qori o Benedetta, e dua na iVakadinadina i Jiova, e vola:

“E kilai vinaka nira sega ni taura na dra na iVakadinadina i Jiova ena vuku ni nodra vakabauta vakaivolatabu, ia sega ni kena ibalebale nira sega ni vakadonuya eso tale na veiqaravi vakavuniwai. Na kena dina ni o ira na iVakadinadina i Jiova era kauaitaka nodra bula. Era na sasagataka gona na veiqaravi vakavuniwai e vinaka duadua mera qaravi kina kei na luvedra. Era na yalorawarawa na tokoni ira na vuniwai ke dokai nodra vakabauta.”

E tomana o Benedetta: “O ira kece era qaravi vakavuniwai e tu vei ira na dodonu mera digia na veiqaravi era vakabauta ena vinaka vei ira. E tu tale ga vei ira na dodonu mera dokai, kei na dodonu mera kila vakailiu na leqa kei na ka ena rawati ena veiqaravi era digia.”

A solia na tabana ni soli dra e Monterenzio e vakatokai na Association of Italian Blood Donors (iSoqosoqo ni Dausoli Dra e Itali) na icovi vei ira era vakamacalataka vinaka nodra rai me baleta na ulutaga qo. E volai gona ena mekesini na Monterenzio Vivace: “E vakavinavinakataki o Benedetta Barbi ena nona ivola ni a duidui nona rai me baleta na ulutaga​—na lewenivola e sega ni tokona na tabana ni dra e Monterenzio​—ia e talaucaka na lomana me baleta nona vakabauta ena veinanumi kei na veidokai.”

Dina ni ‘duidui nodra rai’ na iVakadinadina i Jiova me baleta na dra, ia e levu na vuniwai era sa vakadinata na yaga ni kena sega ni tauri na dra. Nodra tutaka gona na iVakadinadina nodra vakabauta e sa lai vakayacori kina e levu na veiqaravi vakavuniwai vovou e sega ni vakayali kina vakalevu na dra ena veisele lelevu. Era vakila kina na kena yaga na iVakadinadina kei ira na sega ni iVakadinadina. Ia, na vuna bibi duadua era sega ni tauri dra kina na iVakadinadina i Jiova baleta ni yavutaki vakaivolatabu, me vaka e vakamacalataki ena itekitekivu ni ulutaga qo.

Nira veisiko yani ena nomuni itikotiko na iVakadinadina i Jiova, qai tarogi ira ena nona rai na Dauveibuli me baleta na dra. Era na marau mera vakamacalataka vei kemuni ena “veidokai dina.”​—1 Pita 3:15, NW.

[Kato/​iYaloyalo ena tabana e 31]

IKURI NI IVAKAMACALA

Ena nodra veitokoni e levu na kenadau, a vakarautaki kina na DVD Transfusion Alternatives, e vakamacalataki kina na veiqaravi vakavuniwai, na veika vakalawa, kei na vakabauta ni kena sega ni tauri na dra. O rawa ni kerea na DVD qo vei ira na iVakadinadina i Jiova.