Na Cava na Lomabibi?

“AU YADRA mai ena dua na mataka niu se qai yabaki 12,” e kaya o James,a “au dabe ena tutu ni noqu idavodavo qai vakasamataka, ‘Qo beka na siga au na mate kina?’” A yacovi James e dua na lomabibi levu. Ni oti e 30 na yabaki, e kaya o James, “Au valuta tiko na mate qo ena veisiga ni noqu bula, e vakaleqa na ivakarau ni yalo kei na vakasama.” Ni se gone o James, e nanuma ni sega na betena mani dresulaka na kena itaba. “Au nanuma ni sega ni yaga meu nanumi,” e kaya.

Nida dau rarawa ena so na gauna, eda na rairai nanuma nida kila na ituvaki ni lomabibi. Ia, vakacava na lomabibi vakabalavu?

Na Leqa Tawanamaki

Na lomabibi vakabalavu e sega ni yalolailai e dau tuburi keda ena so na gauna, na lomabibi va qo e dau vakataotaka sara ga noda cakacaka ena veisiga.

Me kena ivakaraitaki, sa sivia e 40 na yabaki na kena vakaleqai Álvaro na “rere, veilecayaki na vakasama, rarawa kei na lomabibi levu.” E kaya: “Ena vuku ni noqu dau lomabibi, e tarai au vakalevu na ka era tukuna eso me baleti au. Au dau nanuma niu vakavuna na cala kece e yaco.” E kaya ni lomabibi e “vaka tiko e dua na mosi, o qai sega ni kila na vanua e mosi tiko, o rere qai sega ni kila na vuna, qai kena e ca duadua, o sega ni via talanoataka.” Ia, e lomavakacegu ena gauna qo ni sa kila na ka e vakavuna. E kaya, “Au lomavakacegu niu kila ni sega ni tauvi au duadua tiko ga na mate qo.”

E tiko mai Brazil o Maria, e yabaki 49, nona lomabibi e vakavuna me lailai nona moce, momosi na yagona, cudrucudru, e “vaka me sega ni oti rawa na yalobibi.” Ni tukuni vei Maria nona tauvimate, e lomavakacegu sara ga ni sa qai kila na mate e tauvi koya tiko. “Ia, au a lomaleqa vakalevu,” e kaya, “baleta ni vica ga era kila vinaka na ituvaki ni lomabibi qai levu era dau raica ni mate vakamadua.”

Kua ni Yalolailai

E macala ni tiko na ka e vakavuna na lomabibi, ni dau yaco vakasauri ena so na gauna. “Dau vakasauri me bikai iko na rarawa, o qai sega ni kila na vuna,” e kaya o Richard mai Sauca Aferika. “E sega ni mate e dua o kila, e sega tale ga ni yaco na ituvaki leqataki. Ia, o lomabibi qai oca. E sega ni dua na ka o rawa ni cakava me seavu kina na yalo qori. O lomabibi vakalevu, o qai sega ni kila na vuna.”

E sega ni ka me maduataki na lomabibi. Ia, a maduataka o Ana mai Brazil ni tukuni vua ni tauvi koya tiko na lomabibi. A kaya, “Ni oti e walu na yabaki, au se madua tiko ga.” E dau dredre vua me vosota nona rarawa vakasivia. E tomana, “Ena so na gauna e dau momosi na yagoqu ena levu ni rarawa. Dau momosi tale ga na noqu masela.” Ena gauna va qori, e dau dredre dina me duri mai nona idavodavo. Ena so tale na gauna e sega ni oti rawa nona tagi o Ana. “Ena levu ni noqu mamakeukeu au lai wawale tale kina,” e kaya, “e vaka sa sega sara ga ni drodro noqu dra.”

E tukuna na iVolatabu ni rawa nida lomabibi vakasivia. Kena ivakaraitaki, e kaya na yapositolo o Paula ena vuku ni dua na turaga, ni rawa vua me “luvuci koya . . . na nona rarawa levu sara [“tilomi koya nona lomabibi vakalevu,” Jewish New Testament].” (2 Korinica 2:7) Ena levu ni nodra rarawa, eso era vinakata mera sa mate ga. Levu era duavata kei na parofita o Jona: “Sa vinaka me’u mate ka ca me’u bula.”​—Jona 4:3.

Na cava mera cakava o ira na lomabibi mera vosota kina na ituvaki leqataki qori?