iMatai ni Sala: Ka mo Vakaliuca

‘Vakadeitaka na veika era bibi sara.’​—Filipai 1:10, NW.

Kena ibalebale. Ena vakawati mamarau, era dau vakaliuca na veiwatini na veika e baleti watidra. E bibi nodrau veikauaitaki, qai muri na iyau, cakacaka, itokani, kei ira sara mada ga na wekadrau. Levu na gauna rau na vakayagataka vata vakaveiwatini, rau na tiko wasoma tale ga kei ira na luvedrau. Rau na tu vakarau ni vakuai rau me rau qarava kina nodrau vuvale.​—Filipai 2:4.

Vuna e bibi kina. E dau vakabibitaka na iVolatabu na bula vakavuvale. E vola na yapositolo o Paula, ke sega ni dua e qarava nona vuvale, e “ca vakalevu cake mai vua e dua ka sega ni vakabauta.” (1 Timoci 5:8, VV) De toso na gauna sa na qai veisau na ka e vakaliuca. Kena ivakaraitaki, a vosa ena dua na bose e dua e dau vakasalataki ira na vuvale, qai kaya ni levu era tiko ena bose qori era kauaitaka vakalevu nodra cakacaka mai na nodra vuvale. E kaya nira via kila na “iwalewale totolo” duadua mera “toqa laivi kina na nodra ‘vuvale’ mai na lisi ni veika sa tu mera na ‘cakava,’ qai kauaitaki ga vakabibi nodra cakacaka.” Na cava eda vulica kina? Dau rawarawa tu ga noda kaya nida vakaliuca noda vuvale, ia e dredre toka meda dau vakaraitaka.

Tovolea mada qo. E bibi vakacava vei iko na nomu vuvale ena nomu sauma eso na taro qo.

◼ Ni via vosa vei au o watiqu se o luvequ, au dau vagalalataki au beka vakatotolo?

◼ Niu talanoataka tiko na veika au dau cakava, au dau tukuna na veika au cakava vata kei ratou na lewe ni noqu vuvale?

◼ Au na vakuai au beka mai na so tale na itavi (vakacakacaka se na dua tale na vanua) meu tiko kina kei ratou noqu vuvale?

Ke io nomu isaunitaro, o na nanuma ni o sa vakaliuca tiko na veika e dodonu me liu. Ia na cava ena kaya o watimu kei ira na luvemu? Meda kua sara ni nanuma nida sa vakaliuca tiko na ka e dodonu me liu mai na noda vakalewa ga vakataki keda na ka. Qori tale ga na ka meda nanuma tiko nida veivosakitaka ena vica na ulutaga tarava na sala eso ena rawati kina na marau.

Nakita dei. Vakasamataka e dua se rua na sala o rawa ni vakaraitaka kina ni o vakaliuca nomu vuvale. (Kena ivakaraitaki: Vakalailaitaka na gauna o cakava kina eso na ka e rairai vakalatilati ena nomu tiko kei watimu kei ratou na gone.)

Rawa ni o tukuna vei ratou e vale na veika o sa nakita dei qo. Ni dua na lewe ni vuvale e tu vakarau ni veisau, era na rawa ni muri koya na kena vo.

[iYaloyalo ena tabana e 3]

Na itubutubu e qarava vinaka nona vuvale ena vakaliuci watina kei ira na luvena