iKaono ni Sala: Dauveivosoti

“Dou veivosoti vakai kemudou, ka kakua ni veicudruvi.”​—Kolosa 3:13.

Kena ibalebale. Era dau vuli ena veika sa yaco oti na veiwatini mamarau; ia era na sega ni nanuma tiko ga na veileti sa sivi, mera tukuna tiko kina eso na vosa va qo “O sa dau bera tu ga” se “O sega ni dau vakarorogo.” Rau kila na veiwatini ni ‘rogorogo vinaka ni sega ni cudruvaki na cala.’​—Vosa Vakaibalebale 19:11.

Vuna e bibi kina. E “tu vakarau” na Kalou “me veivosoti” ia eda sega ni dau loloma va qori na kawatamata. (Same 86:5, NW) Ni sega ni wali totolo na leqa sa yaco, ena kumukumuni vata tiko ga, yaco na gauna sa na dredre kina me rau na veivosoti. Rau na rairai kubuta lo tu ga na ka rau via vakaraitaka, rau sega kina ni veikauaitaki. Vaka ga rau vesuki tu ena dua na vakawati e sega sara ga kina na veilomani.

Tovolea mada qo. Sarava na kemudrau itaba makawa vakaveiwatini, na kemudrau itaba ni drau se qai vakawati oti ga, se gauna drau veibuku tiko kina. Vakananuma na gauna drau veilomani vinaka tu kina, ni bera ni veisautaka nomu rai na leqa a yaco. Oti vakasamataka na itovo o taleitaka baleti watimu ena gauna drau se qai sota kina.

◼ Na itovo cava o dau taleitaki koya kina ena gauna qo?

◼ Vakasamataka se na yaga vakacava vei ratou na luvemu na nomu dau veivosoti.

Nakita dei. Vakasamataka e dua se rua na sala o na nakita dei kina mo guilecava na veileti sa sivi, me kua ni okati tale tiko ena ka drau rairai sega ni duavata kina ena gauna qo kei watimu.

Vakacava mo vakacaucautaki watimu ena itovo o taleitaka me baleti koya?​—Vosa Vakaibalebale 31:28, 29.

Vakasamataka eso na sala mo vosoti luvemu kina.

Vakacava mo dau veitalanoataka kei ira na luvemu na ka mo dou cakava mo dou veivosoti kina kei na kena yaga ena vuvale.

[iYaloyalo ena tabana e 8]

Ni o vosota e dua, o na sega ni kauta cake tale tiko mai na nona cala