iKava ni Sala: Veidokai

“Me biu tani kece vei kemudou . . . na veiba, kei na vosavakacaca.”​—Efeso 4:31.

Kena ibalebale. Ena tiko ga na ka era na sega ni duavata kina na lewe ni vuvale kece, se ra mani vuvale mamarau se ra sotava sara tiko ga na leqa. Ia na vuvale mamarau ena veivosakitaka na leqa qori, ra sega ni veivakalewai, veidusi, se ra cavuta na vosa mosimosi. Na ka ga era na vinakata na lewenivuvale me caka vei ira, era na cakava tale ga.​—Maciu 7:12.

Vuna e bibi kina. Na vosa e rawa ni veivakamavoataki me vaka na iyaragi. Tukuna e dua na vosa vakaibalebale: “Sa vinaka ni tiko mai lekutu, ka ca ni tiko kaya na yalewa dauveileti ka daucudru.” (Vosa Vakaibalebale 21:19) Na vosa tale ga qori e rawa ni tukuni vei ira na tagane e dau gaga na gusudra. Ni o susugi ira tiko na luvemu, e kaya na iVolatabu: “Oi kemudou na qase, mo dou kakua ni vakacudrui ira na luvemudou, de ra datuvu kina.” (Kolosa 3:21) O ira na gone era dau vakalewai, era na nanuma nira sega ni vakamarautaki ira rawa nodra itubutubu. Era na rawa ni soro koso.

Tovolea mada qo. E vakacava tu na ivakarau ni veidokai ena nomu vuvale ni o sauma na taro qo.

◼ Ni yaco na duidui ena noqu vuvale, e dau tini beka ga ni sa lako vakacudrucudru e dua e tuba?

◼ Niu vosa vei watiqu kei ratou na gone, au dau cavuta na vosa e vakamosi yalo me vaka na “lialia,” “ulukau” se so na ka va ya?

◼ Au susugi beka ena dua na vanua e cavuti kina vakalevu na vosa gaga qai mosimosi?

Nakita dei. Vakasamataka e dua se rua na lalawa mo vosa kina ena veidokai. (Vakatutu: Nakita dei mo dau tukuna qo “au” mai na nomu dau kaya “o iko.” Kena ivakaraitaki, “Au rarawa ni o . . . ,” kua ga ni tukuna “O sa dau . . . ”)

Vakacava mo vakaraitaka vei watimu na ka o sa lalawataka tiko? Ni oti e tolu na vula, tarogi watimu mo kila kina na veisau cava o sa rawata.

Vakasamataka eso na ka o rawa ni cakava, mo kua kina ni cavuta na vosa mosimosi vei ira na luvemu.

Vakacava mo kere veivosoti vei ira na luvemu ena gauna o rairai tauca kina vei ira na vosa mosimosi se veibeci?

[iYaloyalo ena tabana e 6]

Ni rawa ni yavu na vatu kaukaua ni roba na ua, e rawa tale ga ni vakamalumalumutaka na vuvale na kena dau cavuti na vosa mosimosi