iKalima ni Sala: Yalorawarawa

“Me kilai na nomudou yalomalumalumu [“yalorawarawa,” NW] vei ira na tamata kecega.”​—Filipai 4:5

Kena ibalebale. Ena vuvale mamarau, erau na dauveivosoti na veiwatini. (Roma 3:23) Rau na sega ni vakatabuya na ka kece vei ira na gone se vakademeni ira. E veiraurau na lewa rau vinakata me muri e loma ni vuvale. Ni vinakati me vakadodonutaki e dua, ena caka “vakavinaka ga.”​—Jeremaia 30:11.

Vuna e bibi kina. E kaya na iVolatabu ni dau “yalorawarawa” na vuku mai cake. (Jemesa 3:17, NW) Ni sega ni namaka na Kalou me uasivi na ka eda cakava na tamata ivalavala ca, cava me rau namaka kina na veiwatini me na uasivi na ka e cakava e dua vei rau? Ke vakalewai tiko ga na cala lalai ena vakavuna na veicati, ena sega ni vinaka nodrau bula. Meda dau nanuma tiko nida “cala kecega e na ka e vuqa.”​—Jemesa 3:2.

Era dau yalorawarawa na itubutubu mamarau nira vakavulici ira tiko na luvedra. Era na sega ni “yalodredre” se kaukaua sara nodra veivakavulici. (1 Pita 2:18, NW) Era na solia na galala vei ira na luvedra itabagone nira sa vakaraitaka ena ka era cakava nira nuitaki. Rau na sega ni via lewa na ka kece era cakava na luvedrau. E volai ena dua na ivola, ke sagai me lewai na ka kece era cakava na itabagone “ena vaka tiko e dua na meke era cakava eso na itaukei ni vanua mera kere uca kina, e kaukaua, waribariba qai totolo. Era na tini oca mai, ia ena sega ga ni tau na uca.”

Tovolea mada qo. Saga mo kila se vakacava nomu yalorawarawa ni o sauma na taro era toka qo e ra.

◼ Na cava na iotioti ni gauna o vakacaucautaki watimu kina?

◼ Na cava na iotioti ni gauna o vakalewai watimu kina?

Nakita dei. Kaya mada ke dredre mo sauma na imatai ni taro o uqeti mo vakasamataka, ia e rawarawa na kena ikarua. Ke vaka kina, ena vinaka mo cakava e dua na lalawa ena uqeti iko mo dau yalorawarawa.

Vakacava mo drau veivosakitaka vakaveiwatini na veika drau na via cakava?

Vakasamataka eso na galala oni solia vei ira na luvemu era sa itabagone nira vakaraitaka ena ka era cakava nira nuitaki.

Vakacava mo drau veivosakitaka kei ira na luvemudrau itabagone na gauna drau namaka mera lesu mai kina e vale?

[iYaloyalo ena tabana e 7]

Me vaka ga na draiva e dau qaqarauni vinaka, ena tu vakarau na lewenivuvale e yalorawarawa me vakamalumalumu