A Liu Duadua na Veika Bula
“Taroga mada, . . . na manumanu vuka, ka ra na tukuna vei iko: . . . Ni sa cakava na ka oqo na liga i Jiova.”—Jope 12:7-9.
NA VEIKA kece e kune vua na manumanu vuka, e buli vakatabakidua sara ga me baleta na vuka. Me kena ivakaraitaki, ena vinakati na sui ni vutidra me taura na kedra bi ena gauna era vuka tiko kina. E sega sara ni bi na taba ni manumanu vuka, ia e kaukaua vakacava? O na qai kila na vuna ena gauna o musuka kina na sui ni vutidra. Qo e tautauvata kei na ka era vakatoka na idinia me foam-sandwich beam. E malumu vaka na sipazi e loma qai corocoroa e tuba. Ena nodra vakadikeva na idinia na sui ni vuti ni manumanu vuka, era vakayagataka kina na foam-sandwich beam ena waqavuka.
E vakasakiti tale ga na ibulibuli ni nodra sui na manumanu vuka. E levu era kikilo qai so tale e tauri ira vata eso na ka mera kaukaua kina, ra qai dau vakatoka qo na idinia me Warren girder. E veivakurabuitaki ni vakayagataki tale ga e dua na ka va qo ena taba ni waqavuka ni maliwalala.
Era lewa vinaka na pailate na waqavuka ni gauna qo ena nodra veimoiyaka na tutu ni taba ni waqavuka kei na buina. E vakayagataka na manumanu vuka e rauta ni 48 na masela ena tabana, me veimoiyaka kina, qai veitosoyaka na tabana kei na vutina yadua, e cakava vakavica qo ena dua ga na sekodi. Sa rauta mera diva o ira na dau buli waqavuka na iwalewale ni nodra vuka na manumanu vuka!
E vinakati vakalevu na igu ena gauna e tekivu kina na vuka. Qo na vuna era gadreva kina na manumanu vuka na igu, me vaka e dua na “idini” e katakata totolo. E dau totolo na tavatukituki ni nodra uto na manumanu vuka, e levu cake qai kaukaua tale ga nodra uto ni vakatauvatani kei ira na manumanu tale eso, ke mani tautauvata mada ga na kedra levu. E duidui tale ga na nodra yatevuso na manumanu vuka, e tukuni ni one-way flow, kena ibalebale ni dua ga na sala e lakova na cagi bulabula ena nodra yatevuso, qai vinaka vakaoti ni vakatauvatani kei ira na manumanu tale eso.
E levu na manumanu vuka era buli me veirauti na kedra bi me rawa kina nira vuka vakabalavu. Na manumanu vuka e vakatokai na Swainson’s trushes e voleka ni veimama na bi ni kena uro e vakalutuma ena nona vuka me tini na aua. Ia na batikaciwa se bar-tailed godwit e dau biubiu mai Alaska me vuka e Niu Siladi, e sivia e veimama ni kena bi na uro. E veivakurabuitaki ni vuka tiko rauta e 190 na aua (walu na siga) qai sega ni cegu. E sega ni cakava rawa qo e dua na waqavuka.