iWalewale ni Nona Vuka na Albatross

ESO na manumanu vuka era sega ni yavalata na tabadra nira vakanawanawa tu e maliwalala. Dua na kena ivakaraitaki na albatross. Na balavu ni tabana e 3.4 na mita, 8.5 na kilokaramu na kena bi, e rawa ni vukaca e vica na udolu na maile qai lailai sara na igu e vakayagataka! E rawa vakacava qori? Ena ibulibuli ni tabana kei na iwalewale ni nona vuka.

Vakasamataka mada: Ni tekivu vuka tubu i macawa na albatross, ena lokataka na tabana e dua na ua ni nona masela me vakatetaba tu ga, qori ena cegu kina na nona masela. E dau veivuke tale ga ena nona vuka vakabalavu na nona vakayagataka vinaka na cagi mai wasa.

Ena dua wale ga na gauna qo, era sa qai dikeva na saenitisi na sala era cakava kina qori. Era biuta ena albatross e dua na misini e vakauta lesu ina kompiuta na itukutuku ni ka e cakava, era sa qai kila ni nona vuka voli e wasawasa ena sega ni vuka tu ga vakadodonu, ena vakatubutubu me saqata na cagi, sa qai vakalutulutu me muria na cagi me rawa ni sosomitaka na igu a vakayagataka. Era kaya na saenitisi ni iwalewale qori ena rawa nira vuka tu kina na albatross me vica na aua, ra sega mada ga ni yavalata na tabadra!

Na veika e dikevi qori ena vukei ira na idinia mera bulia na waqavuka porokaramutaki e lailai na waiwai e vakayagataka, e rawa sara ga ni vuka ni boko na idini.

Na cava o nanuma? Na iwalewale ni nona vuka na albatross, kei na ibulibuli ni tabana e bula vakaidewadewa se buli?