Ra Taroga na iTabagone

E Cala Ke o Vinakata mo Lewai iKo ga Ena so na Gauna?

Tikitaka na ka o na rairai tukuna ke yaco vei iko eso na ituvaki qo.

1. O tiko e loma ni nomu rumu qai sogo tu na katuba, e curu botolaki yani e loma o tacimu, e sega ni bau tukituki.

◯ ‘Sega ni dua na kena leqa ya . . . Au dau cakava tale ga ya vei taciqu.’

◯ ‘Sega nomu itovo! Vakacava keu a vakaisulu tiko?’

2. O vosa tiko vua e dua nomu itokani ena talevoni, e toka e yasamu o tinamu, kena irairai ni rogoca tu na ka o tukuna.

◯ ‘Sega ni dua na kena leqa ya . . . Sega ni dua na ka meu vunia.’

◯ ‘Sa vakamadua dina! E vaka ga au sipai taki!’

3. O se qai yaco ga e vale, sa veitaravi yani nodrau taro nomu itubutubu. “O a tu mai vei? Na cava o lai cakava? O cei drau lako vata?”

◯ ‘Sega ni dua na kena leqa ya . . . Au dau tukuna kece vei rau na ka.’

◯ ‘Sa vakasevaki dina! Erau sega ni nuitaki au noqu itubutubu!’

NI O se gone, a rairai sega sara ni dua na ka vei iko nomu vakasosataki se na kena kilai na ka kece me baleti iko. Ke curu botolaki yani ena nomu rumu o tacimu, o sega ni kauaitaka. Nirau tarogi iko nomu itubutubu, sega ni bera nomu sauma. E levu era kila na ka kece me baleti iko ena gauna ya. Ia qo o sa rairai vinakata mo kila se cakava duadua mada ga eso na ka. “Au dau vinakata me tiko lo mada ga vei au eso na ka,” e kaya o Samu e yabaki 14.a

Na cava e veisau vakasauri kina va ya na rai? Dua na vuna ni o sa tubucake tiko. Kena ivakaraitaki, ni yaco na veiveisau e yagomu ena gauna vakaitabagone, o sa na rairai dau kauaitaka na kemu irairai ke o tiko mada ga kei ratou nomu vuvale. Ni o tubucake tiko, o na vinakata tale ga mo tiko duadua ena so na gauna mo vakasamataka kina eso na ka. Qori e vakaraitaka ni o saga tiko mo “lomavuku”​—na itovo e vakacaucautaki kina ena iVolatabu e dua na itabagone. (Vosa Vakaibalebale 1:1, 4; Vakarua 32:29) O Jisu mada ga a “gole ina dua na vanua lala” me vakasama vakatitobu.​—Maciu 14:13.

Ni o se tiko ena ruku ni nodrau lewa nomu itubutubu, e dodonu ga merau kila na ka o dau cakava. (Efeso 6:1) Ia ena rairai tiko eso na duidui ena ka o via cakava ni o tubucake tiko, kei na nodrau via kila na nomu itubutubu na ka o cakava. Na cava mo cakava ena ituvaki va qori? Meda raica mada e rua na ituvaki e rawa ni basika kina na leqa.

Ni o Via Tiko Taudua

E tiko eso na vuna vinaka mo tiko taudua kina. De o vinakata mo “vakacegu mada vakalailai.” (Marika 6:31) Dua tale, me vaka a vakasalataki ratou kina nona tisaipeli o Jisu, ni o via masu “curu ina nomu rumu, sogota na katuba, qai masu vua na Tamamu.” (Maciu 6:6; Marika 1:35) Ia qo na leqa, ni o sogota na katuba ni nomu rumu (ke dua ga nomu rumu), erau na rairai nanuma nomu itubutubu ni o sega ni masu tiko! Eratou na rairai sega tale ga ni kila na tacimu nomu via tiko taudua.

Ka o rawa ni cakava. Kua ni vakavu veiba, muria na vakatutu qo.

● Biuta eso na lawa vei ratou na tacimu mo tiko taudua kina ena so na gauna, ia me kua ni kaukaua tale nomu lewa. Kerea nodrau veivuke nomu itubutubu ke gadrevi.

● Saga mo kila nodrau rai nomu itubutubu. E kaya o Rebekah e yabaki 16, “Erau dau via kila ena so na gauna noqu itubutubu na ka au cakava. Ia keu itubutubu au na cakava tale ga qori vua na luvequ itabagone—ni levu na ka era temaki kina ena gauna qo!” Me vakataki Rebekah, o raica rawa na vuna erau dau kauai kina nomu itubutubu?​—Vosa Vakaibalebale 19:11.

● Tarogi iko: ‘Au cakava tiko beka eso na ka merau kasamitaka kina noqu itubutubu niu cakava tiko na ka ca ke sogo tu noqu katuba? Au sa dau cakacaka lo tiko beka, rau nanuma kina merau vakaraica lo na ka au cakava?’ Ke o sega ni dau vunivuni, erau na sega tale ga ni dau kasami nomu itubutubu.b

Ka me caka. Vola era na ka o na tukuna ni o veivosaki kei rau nomu itubutubu ena leqa o kauai kina.

․․․․․

Ni o Vakaitokani

E dau kena ivakarau ga ena gauna vakaitabagone mo via vakaitokani e taudaku ni vuvale. E sega tale ga ni cala nodrau via kila nomu itubutubu o cei era nomu itokani, se cava oni dau cakava vata. Ena nodrau rai nomu itubutubu, qori e nodrau itavi. Ia vei iko, sa sivia tale na nodrau kauai. E kaya o Amy e yabaki 16: “Niu vosa ena noqu mobail se vakau e-mail, au sega ni vinakata merau vuki taroga tiko ga mai noqu itubutubu ena veiya tini na miniti se o cei keirau veivosaki tiko.”

Ka o rawa ni cakava. Me kua ni vakavuna nomu yawaki rau nomu itubutubu na nomu vakaitokani, ia tovolea mada qo.

● Tukuna vei rau o cei era nomu itokani, merau kilai ira vinaka. O sega ni vinakata merau vaqaqai ira lo nomu itokani, ia qori sara ga na ka ena yaco ke o sega ni vakamacalataki ira vei rau. Nanuma tiko, erau kila nomu itubutubu ni ilala o digia ena yaga se vakaleqai iko. (1 Korinica 15:33) Ke rau kilai ira vinaka nomu itokani, erau na lomavakacegu tale ga ena ilala o digia.

● Veitalanoa ena veidokai kei rau nomu itubutubu. Kua ni beitaki rau nirau dau siova na ka me baleti iko. Ia o rawa ni tukuna, “Au raica ni vaka ga e vaqaqai qai vakalewai na ka kece au tukuna vei ira noqu itokani. E dredre sara ga kina meu veitalanoa kei ira ena so mada ga na ka lalai.” De dua erau na sega soti ni vakasosani iko nomu itubutubu ena ka e baleti ira nomu itokani.​—Vosa Vakaibalebale 16:23.

● Kua ni vakaisini iko: Na cava mada e vakavu kauai dina tiko vei iko? Nomu vakasosataki se nomu cakava lo tiko e dua na ka? E kaya o Brittany e yabaki 22: “Ke o tiko e vale rau qai kauai ena dua na ka nomu itubutubu, na ka me lako mai nomu vakasama qo, ‘E sega ni ca na ka au cakava tiko, na cava meu vunia kina?’ Ia ke o vinakata mo vunia, sa na macala ga ni duatani na ka sa caka tiko.”

Ka me caka. Vola e ra na ka o na tukuna ni o veitalanoa kei rau nomu itubutubu.

․․․․․

Ka o Kauai Kina

Vakasamataka eso na iwali ni leqa e vakavu kauai tiko vei iko.

iKalawa 1: Me kilai mada eliu na cava e vakavu kauai tiko.

Na gauna cava o sega ni vinakata kina na veivakasosani?

․․․․․

iKalawa 2: Kauaitaka nodrau rai nomu itubutubu.

Na cava e vakavu kauai tiko vei rau?

․․․․․

iKalawa 3: Qara na kena iwali.

(a) Vakasamataka qai vola e ra e dua na sala o rairai sega ni liaca ni o vakavuna tiko kina na leqa.

․․․․․

(b) Na veisau cava o na cakava me baleta nomu isaunitaro e cake?

․․․․․

(c) Na cava o vinakata merau cakava nomu itubutubu ena ka e vakavu kauai tiko vei iko?

․․․․․

iKalawa 4: Veitalanoataka.

Veitalanoataka kei rau nomu itubutubu ena dua na gauna veiganiti na ka o vola e cake.

O rawa ni raica e levu tale na ulutaga ni “Young People Ask” ena Web site www.watchtower.org/​ype

[iVakamacala e ra]

ME VAKASAMATAKI

● Na cava e dodonu kina me rau kila nomu itubutubu na ka o dau cakava?

● Nomu maqosa ni veivosaki kei rau nomu itubutubu ena yaga vakacava ena nomu veivosaki kei ira na uabula ena gauna mai muri?

[Kato/​iYaloyalo ena tabana e 30]

KA ERA TUKUNA NA ITABAGONE

“Ke ra sega ni dau vunivuni na itabagone vei ira nodra itubutubu, era na sega tale ga ni wilika na itubutubu na nodra e-mail se na itukutuku era vakauta ena talevoni mera kila kina na ka era cakava tiko.”

“Au na sega ni cudru ke rau wilika noqu itubutubu noqu e-mail. Ke tiko mada ga vei boso ni cakacaka na dodonu me wilika nona e-mail e dua e cakacaka vua, na cava me qai sega ni rawa kina ni cakava qori o itubutubu vei luvena?”

“E sega ni vinakata nomu itubutubu me yaco vei iko e dua na leqa, ena rairai siova kina ena so na gauna na ka me baleti iko. E sega ni donu qori. Ia keu dua na itubutubu, au na rairai cakava tale ga ya.”

[iTaba]

Eden

Kevin

Alana

[Kato ena tabana e 31]

MERA NANUMA NA ITUBUTUBU

● E tiko e loma ni nona rumu o luvemu tagane, e sogo tu na katuba. E dodonu mo curu botolaki ga yani e loma o sega ni bau tukituki?

● E vakatotolo i koronivuli o luvemu yalewa qai guilecava tu mai e vale nona talevoni. E dodonu mo wilika na itukutuku e dau vakauta?

E sega ni rawarawa me saumi na taro qori. Ena yasana adua, e tiko vei iko na dodonu mo kila na ka e cakava tiko o luvemu, e nomu itavi tale ga mo taqomaki koya. Ia ena sega ni rawa mo vuka wavokiti luvemu tu ga me vaka na “elikopta,” mo wanonova matua na ka kece e cakava. Ena veiraurau gona vakacava na ka o cakava?

Kena imatai, ni vinakata o luvemu me kua ni vakasosani se me bau kila duadua mada ga eso na ka, kua ni o sa nanuma tu ga ni cakava tiko e dua na ka ca. E vakalevu me tiki ga ni nona tubucake qori. Nodra vinakata na itabagone mera lewai ira ena so na gauna e rawa ni ‘vakatovolei kina na tabadra,’ ena laurai nodra “yalomatua” nira digia nodra itokani ra qai vakasamataka na leqa e dau basika. (Roma 12:1, 2) Ena yaga qori ena nodra sasaga mera biuta na vakasama vagone, mera vakasama me vaka na matua​—e bibi qori me rawa nira nuitaki kina nira sa uabula. (1 Korinica 13:11) E gauna vinaka tale ga mera dau vakasama kina vakatitobu ni bera nira sauma na taro dredre.​—Vosa Vakaibalebale 15:28.

Kena ikarua, nanuma tiko ni rawa ni be o luvemu se sevaki iko ke o via lewa vua na ka kece. (Efeso 6:4; Kolosa 3:21) Kena ibalebale beka qori mo sa biuti koya tu ga? Sega, o se itubutubu tiko ga. Ia e vinakati me vakavulica o luvemu na nona lewaeloma. (Vakarua 6:6, 7; Vosa Vakaibalebale 22:6) E dau laulau cake me dusimaki, sega soti na kena wanonovi matua na ka kece e cakava.

Kena ikatolu, veitalanoa kei luvemu. Rogoca na ka e kauai kina. E rawa beka ni o yalorawarawa ena so na ka? (Filipai 4:5) Tukuna vei luvemu itabagone ni o na vakadonuya me lewai koya ena so na gauna, ia me kua ga ni dabui iko. Vakamacalataka vua na ca ni talaidredre, cakava vakavica qori ke gadrevi. Mo nuidei ni o se itubutubu dauloloma tiko ga ke o mani vakadonuya mada ga me lewai koya o luvemu ena so na gauna.

[iYaloyalo ena tabana e 30]

Na veinuitaki e vaka na jeke​—e cakacakataki