Ra Taroga na iTabagone

Ena Vakavolekati Rau Beka e Rua na Veiyacovi?

Erau se qai veitau voli ga me rua na vula o Heather kei Mike, ia vaka ga erau sa veikilai tu ena nodrau bula taucoko. Erau dau vakauitukutuku ena mobail, rau veitalanoa tale ga kina me vica vata na aua, qai rawarawa nodrau veivosaki! Ia nirau dabe toka ena loma ni motoka qai cila vinaka tu na vula, e sega ni via veitalanoa wale ga o Mike.

Rau dau veitauriliga tu ga o Mike kei Heather ena rua na vula sa oti, rau qai kisi ga vakalekaleka. E vinakata o Heather me yala toka ga ekea. Ia e sega tale ga ni vinakata me biuti koya o Mike ni dau vakademeni koya. E dau tukuna tale ga o Heather, ‘Keirau veivinakati kei Mike, . . . cava kena leqa ya?’

O NA rairai siqema na vanua e sa mua tiko kina na ituvaki qori. Ia o rairai sega ni kila ni rawa ni veisau vakasauri na kedrau ituvaki o Mike kei Heather ke rau veiyacovi​—na veisau qori e sega ni vinaka. Vakasamataka mada:

Ke o vorata na lawa me baleta na vuravura, me vaka na lawa e vauca na idre ni vuravura, o na sotava na kena ca. Qori tale ga na ka ena yaco ke o beca na lawa e vauca na itovo kilikili, dua qo: “Vakatabui kemuni mai na veidauci.”a (1 Cesalonaika 4:3) Na cava ena yaco ke o beca na lawa qori? E kaya na iVolatabu: “O koya e dau veidauci e sa valavala ca sara tiko ga e yagona.” (1 Korinica 6:18) E dina vakacava qori? Vola mada e tolu na leqa era na sotava o ira era veiyacovi ni bera na vakamau.

1. ․․․․․

2. ․․․․․

3. ․․․․․

Raica mada na ka o vola. O vola tale ga na matedewa ni veiyacovi, buketeisala, kei na nona sega ni veivakadonui na Kalou? Qori na itinitini ca ena sotava o koya e beca na lawa ni Kalou me baleta na veidauci.

Ia o se rawa tiko ga ni temaki. O na rairai nanuma: ‘Ena sega ni yaco vei au e dua na ka.’ Sega li nira sa veiyacovi kece tiko na kena vo? Era dokadokataka nomu icaba e koronivuli nodra veiyacovi, qai kena irairai ni sega ni vakaleqai ira. Me vakataki Heather e tukuni ena itekivu ni ulutaga, de o nanuma ni drau na qai veivolekati sara kei nomu itau ke drau veiyacovi. E sega ni dua e via vakalialiai ni se sega ni veiyacovi, o na rairai nanuma kina ni vinaka cake mo sa veiyacovi ga.

Kua ni vakatulewa vakariri, vakasamataka mada qo! Kena imatai, sega ni tamata kece era veiyacovi. O na rairai wilika ena kena itukutuku ni dua na iwiliwili levu ni itabagone era sa veiyacovi. Kena ivakaraitaki, e laurai ena dua na vakadidike e caka mai Merika ni 2 mai na 3 na itabagone era sa veiyacovi ni oti na sekeneri. Ia kena ibalebale tale ga ni 1 mai na 3​—iwiliwili levu toka ya​—era se sega ni veiyacovi. Vakacava o ira era sa veiyacovi? Era raica na dauvakadidike ni levu vei ira na itabagone era veiyacovi era sotava na itinitini ca era toka qo.

#1: NUIQAWAQAWA. Era kaya e levu na itabagone era veiyacovi nira veivutunitaka na ka era cakava.

#2: SEGA NA VEINUITAKI. Nirau veiyacovi oti e rua, erau sa na tekivu taroga tale ga, ‘O cei tale sa veiyacovi oti kei noqu itau?’

#3: TAWAYALODINA. Ni oti ga na veiyacovi, e rawa ni biuti goneyalewa o cauravou, lai qara tale e dua.

#4: RARAWA. Ena rairai vinakata dina o goneyalewa me taqomaki, sega ni vakayagataki ga.

Kuria qori, nanuma tiko: Era tukuna e levu na tagane nira na sega ni vakawatitaka na goneyalewa era sa veiyacovi oti. Cava na vuna? Baleta era vinakata e dua na goneyalewa e sega ni se taratagane!

O kurabuitaka qori​—rairai vakacudrui iko sara? Ke vaka kina, qo na ka mo nanuma tiko se mani o tagane se yalewa: Na ka e dau vakaraitaki ena iyaloyalo se tivi me baleta na veiyacovi ni bera na vakamau e duidui sara mai na ka e dau yaco dina. E vakarairaivinakataki ena buturara ni veivakamarautaki nodra veiyacovi na itabagone me vaka sara ga e dodomo dina. Ia kua sara ni lialia mo vakabauta! Era nanumi ira tiko ga o ira na uqeti iko mo veiyacovi ni bera na vakamau. (1 Korinica 13:4, 5) O koya e domoni iko dina ena sega ni cakava e dua na ka ena vakaleqai iko. (Vosa Vakaibalebale 5:3, 4) Ena sega ni temaki iko tale ga e dua e kauaitaki iko dina, mo cakava na ka ena vakacacana nomu veiwekani kei na Kalou.​—Iperiu 13:4.

Ke o veiyacovi ni bera na vakamau, o sa vakalolovirataki iko ena nomu solia e dua na ka vakamareqeti. (Roma 1:24) Sa rauta mera nanuma e levu ni sega ni vakainaki nodra bula ra qai tawayaga, e vaka sara ga e butakoci vakasakasaka vei ira e dua na tiki ni nodra bula! Kua sara ni laiva me yaco qori vei iko. Ke temaki iko e dua mo veiyacovi ena nona kaya, “Ke o domoni au, o na cakava qo,” tukuna vakadodonu vua, “Ke o domoni au, o na sega ni kerea meu cakava qori!”

Na yagomu e ka vakamareqeti, kua gona ni solia vakailoa. Vakaraitaka ni o na muria dei na ivakaro ni Kalou mo kua ni veidauci. Ke o vakawati ena dua na gauna, o rawa ni qai veiyacovi. O na qai marautaka sara vakalevu ena gauna qori, ni sega ni dua na ka o na leqataka se veivutunitaka, o na sega tale ga ni veilecayaki me vaka era dau vakila o ira na veiyacovi ni bera na vakamau.​—Vosa Vakaibalebale 7:22, 23; 1 Korinica 7:3.

O na raica e levu tale na ulutaga “Young People Ask” ena Web site www.jw.org/ype

[iVakamacala e ra]

VAKASAMATAKA MADA

● Na veiyacovi ni bera na vakamau e idre ni yago ivalavala ca, ia na cava e cala kina mo cakava?

● Na cava o na cakava ke kerei iko e dua mo drau veiyacovi?

[Kato/​iYaloyalo ena tabana e 27]

KA ERA KAYA NA ITABAGONE

“Nomu vakasega wale ga vua e dua ena sega ni tarova nona sasaga ena dua tale na gauna. Ia ena tarovi koya na ivalavala ni nomu vakasega. Ena kilai levu ke o vakasega vakavinaka, ia e lomalomarua na irorogo ni domomu. E bibi mo dei ni o vosa!”

“Ena sega ni mana tu ga nomu vakasega. Ena rairai sega mada ga ni rogoci nomu ivakamacala me baleta na ka o vakabuta. Au kilai ira eso era dokadokataka nodra rawa e dua na lotu vaKarisito me ‘tawayalodina.’ Ena vinakati ena so na gauna mo gole tani ga. E sega ni dau rawarawa qori, ia e dau mana vakalevu.”

“Ni o lotu vaKarisito, era na taleitaki iko eso ena nomu itovo. E bibi gona mo yadra tiko, mo cata tale ga na ka tawakilikili o temaki kina. Vakamareqeta na itovo e kemu idivi. Kua ni cakava e dua na ka e rairai rawarawa qai maleka, ia o na vakayalia kina e dua na ka talei!”

[iYaloyalo]

Diana

James

Joshua

[Kato ena tabana e 17]

MO NONA ISAKISAKI!

Ke o veibuku tiko, o kauaitaka dina nomu daulomani? Ke vaka kina, vakaraitaka vua ni . . .

● o doka na lawa ni Kalou

● o vuku ena nomu yawaka na ituvaki o rawa ni temaki kina

● o lomani koya, o kauaitaka na veika e gadreva

Ke o cakava qori, ena rairai tautauvata nodrau rai o nomu daulomani kei na goneyalewa ni Sulamaiti a kaya: “Sa noqu ko koya ka’u sa lomana, koi au talega au sa nona ga.” (Sere i Solomoni 2:16) Io, ena sakitaki iko dina o nomu daulomani!

Raica na Vosa Vakaibalebale 22:3; 1 Korinica 6:18; 13:4-8.

[Kato ena tabana e 28]

VAKATUTU

E vinaka mo muria na lawa qo me baleta nomu ivalavala vei tagane ke o yalewa se vei yalewa ke o tagane: Kua ni cakava e dua na ka o sega ni vinakata merau raica nomu itubutubu.

[iYaloyalo ena tabana e 17]

O vakatanitaka na isolisoli ni Kalou ke o veiyacovi ni bera na vakamau. E vaka ga nomu taura na droini totoka a solia vei iko e dua o qai vakayagataka me ibutubutu