“O sa na Vakacegui Tiko”

ERATOU vakatokai Fred na manidia ena dua na yaca e vakaibalebaletaki ena gugumatua ni nona cakacaka.a Na ivakarau ni nona cakacaka ena ono na yabaki e vakabula kina e levu na ilavo ni kabani. Ena gauna a tukuni kina vua me lai raica e dua na manidia, a nanuma o Fred ni sa na toso cake na kena isau se nona itutu. Kena veibasai ga, a kidacalataka ni tukuni vua, “O sa na vakacegui tiko.”

A sega sara ga ni vakabauta o Fred na ka e rogoca. E tukuna: “E vinaka na kequ isau, au qai taleitaka noqu cakacaka, ia ena dua ga na gauna lekaleka e veisau kina na ka kece qori.” Emuri, a tukutuku o Fred vei watina o Adele ena ka a yaco, a kidacalataka tale ga. “Au vakila sara ga na dredre ni mai yaco na veisau qo,” e nanuma lesu. “Au vakasamataka, ‘Na cava keitou sa na cakava qo?’”

E vica na milioni era vakila tale ga na leqa a sotava o Fred, me vaka ga e vakaraitaki tiko ena ivakatautauvata e toka qo e ra. Ia na iwiliwili qori e sega ni vakaraitaka taucoko na rarawa e vakavuna na leqa ni cakacaka. Vakasamataki Raúl mada mai Peru, a vakacegui mai na nona cakacaka ena dua na otela levu ena siti o Niu Yoka ni oti e 18 na yabaki nona cakacaka tiko ekea. A vaqara cakacaka tiko qai sega ni kunea e dua. E tukuna: “E voleka ni 30 na yabaki noqu qarava voli mai na noqu vuvale. Ia qo e vaka ga au sa sega ni qarava rawa na noqu itavi vakaulunivale.”

Na ka e sotava o Raúl, e macala kina e dua na ka era dau sotava o ira e sega nodra cakacaka​—ni sega wale ga nira sotava na dredre vakailavo. Ia e dau vakamosi yalo dina. “Au nanuma niu tawayaga,” e tukuna o Renée, a sivia na tolu na yabaki nona sega ni cakacaka tu o watina o Matthew. “Ke sega vei iko na ka, era na beci iko na tamata, ni toso na gauna o na nanuma tale ga ni sega na kemu yaga.”

E sega ni vakamosi yalo wale ga na leqa ni cakacaka, o ira kece era vakacegui mai na nodra cakacaka era sotava tale eso na ka dredre ena kena lailai na ilavo mera bula kina. “Na gauna a tiko kina vei keitou na ilavo, keitou sega ni bau vakasamataka me keitou bula rawarawa,” e tukuna o Fred. “Ia ni sa kena gauna me caka kina na sausaumi ena isau vata tiko ga ya​—qai sega tu na cakacaka​—e sega tale ni dua na ka keitou rawa ni cakava, oya me keitou bula rawarawa ga.”

Ni o vaqara cakacaka tiko, ena vinaka mo vosota na mosi ni yalo kei na lomaocaoca e dau vakavuna na leqa ni cakacaka. Ena rairai sega ni levu na ka mo na bula kina. Meda dikeva mada eliu e rua na sala yaga o rawa ni vosota kina na leqa qori.

[iVakamacala e ra]

[Graph ena tabana e 3]

(Raica tale na ivola)

iWiliwili ni lewenivanua era sega ni cakacaka ena 2008 ena tolu mada ga na matanitu

Japani 2,650,000

Sipeni 2,590,000

Merika 8,924,000