“Kua Sara ni Lomaocaocataka na Siga Nimataka”

A sega ni vosota rawa o Renée nona lomaocaoca. E sivia e tolu na yabaki a sega ni dua nona cakacaka tudei na watina o Matthew. “Au sa rui lomaleqa,” e nanuma lesu o Renée. “E kuria ga noqu yalolailai noqu sega ni kila na ka ena yaco!” A saga o Matthew me vakacegui watina mai na nona lomaocaoca ena nona tukuna ni ka kece rau gadreva sa tiko. “E sega tiko mada ga nomu cakacaka!” e sauma o Renée. “Daru gadreva na ilavo!”

E DAU vakavu lomaocaoca ni sega na cakacaka. ‘Ena vakacava na dede ni noqu sega ni cakacaka?’ qo na ka e dau vakasamataka tu o koya e vakacegui mai na cakacaka. ‘Eda na qarava rawa vakacava na ka era gadreva na vuvale?’

E ivakarau sara ga ni bula na kauai va qori, a veivakasalataki o Jisu ena sala e rawa ni vakalailaitaki kina na lomaocaoca. E tukuna: “Kua sara ni lomaocaocataka na siga nimataka, ni veisiga yadua ena tu vata kei na kena lomaocaoca.”​—Maciu 6:34.

Kila na Ka o Leqataka

E sega ni tukuna tiko o Jisu meda vakalecalecava noda leqa. Ia noda lomaocaocataka na ka ena rairai yaco ena siga ni mataka, ena kuria ga na tarabi ni icolacola ena dua na siga. Kena dina ga, e sega nida lewa rawa na ka ena yaco ena siga ni mataka, e vinaka se ca. Ia eda rawa ni lewa vinaka na ka meda cakava ena siga yadua.

E rawarawa beka qo? Sega sara! A tukuna o Rebekah, a sega ni cakacaka tu me 12 na yabaki o watina: “Ni vusolo na lomamu, ena dredre mo na vakasamataka vakavinaka eso na ka. Ia e dodonu mo cakava kina e dua na ka, au qai saga meu lewai au vakavinaka. Ena gauna e sega kina ni yaco na ka au leqataka tiko, au qai kila ni sega ni vinaka meu dau lomaleqataka. Nida kauaitaka mada ga na icolacola ni siga yadua eda na sega kina ni lomaocaoca vakasivia.”

Tarogi iko: ‘Na cava au dau leqataka vakalevu? E vakacava sara mada na dina ni ka au leqataka tiko qo? E vakacava sara mada na levu ni gauna e taura niu leqataka tiko na ka ena rairai yaco se sega ni yaco?’

Vulica mo Lomavakacegu

E tara na lomada na ivakarau ni noda rai. Ia e veiuqeti na iVolatabu ena rai qo: “Ke sa tiko rawa na ka meda kania, na isulu meda tokara, kei na vanua meda tiko kina, meda lomavakacegu.” (1 Timoci 6:8) Na lomavakacegu e kena ibalebale noda yalana na ka eda sega ni vinakata, da qai lomavakacegu ni sa tiko na ka eda gadreva e veisiga. Ena vakadredretaka nomu sasaga mo bula rawarawa ke o sasagataka me levu tale na ka o taukena.​—Marika 4:19.

A qai vulica o Renée me lomavakacegu ni oti nona dikeva nona ituvaki ni bula. E tukuna: “E sega vakadua ni boko na neitou livaliva se maca na gas, sega tale ga ni keitou moce ena salatu. Na leqa ga ya, ni sega ni matau vei keitou na bula qo, qai vakalevutaka noqu lomaocaoca noqu saga me keitou lesu tale ina ivakarau ni bula makawa.”

A qai kila emuri o Renée ni vakavuna tiko na nona leqa na ivakarau ni nona rai​—sega ni ituvaki e sotava tiko. E tukuna: “Au sa qai ciqoma na ituvaki ni bula keitou sa tu kina, qai sega niu saga tale meu lesu ina ivakarau ni bula au vinakata. Au marau sara vakalevu niu vulica meu lomavakacegu ena ka e vakarautaka na Kalou ena veisiga.”

Tarogi iko: ‘Sa tiko na ka au gadreva nikua? Ke sa tiko, au nuidei ni na vakarautaki tale ga na ka au gadreva nimataka?’

Ni lailai na ka e tu vei keda, na rai donu e imatai ni kalawa eda na vosota kina na ituvaki ya.a Ni o sa sega ni cakacaka, na ikalawa yaga cava o rawa ni cakava ni lailai na ilavo?

[iVakamacala e ra]

[Kato ena tabana e 5]

Yaga na Vosota!

Ni oti e vica na macawa nona sega ni kunea rawa e dua na cakacaka, a nanuma o Fred ni na dredre me kunei e dua. E tukuna: “E vaka ga ni o wawa toka ena ikelekele ni basi me vakavodoki iko e dua, qai sega ni dua e gole mai.” A mani nanuma o Fred me cakava mada ga na ka a rawa ni cakava. A vakauta na kena ivola itukutuku ena kabani mada ga ena rairai sega ni gadrevi kece kina nona kila vakacakacaka. E vakamuria voleka na macala kece ni ivola e vakauta ya, qai vakavakarau vinaka me lai intaviu (interview) ena nona kila ni “nanuma ni lomana na dautara ka sa vakauta ga ki na sautu.” (Vosa Vakaibalebale 21:5) E tukuna o Fred, “Ena dua na kabani, e wasei vakarua na intaviu, qai intaviutaki au e vica na manidia levu ni kabani ya.” Ia a yaga dina na vosota i Fred. E tukuna: “A qai soli vei au na cakacaka!”

[Kato/​iYaloyalo ena tabana e 6]

Dua Tale na Ka e Bibi Cake Mai na iSau ni Cakacaka

Na cava e bibi duadua​—nomu itovo vinaka se isau ni nomu cakacaka? Dikeva mada e rua na vosa vakaibalebale.

“Sa vinaka na dravudravua sa muria na nona yalododonu, ka ca ko koya sai valavala vakaveve, io kevaka sa vutuniyau.”​—Vosa Vakaibalebale 28:6.

“Sa vinaka me da kana rourou ka veilomani ga, ka ca me da kana pulumokau uro ka veicati tiko.”​—Vosa Vakaibalebale 15:17.

Macala gona ni nona vakacegui mai na nona cakacaka e dua, e sega ni kena ibalebale ni sa tawayalodina. A tukuna vei ira na luvena o Renée ena gauna sa sega ni cakacaka kina o watina: “Levu na tama era sa biuta nodra vuvale. O tamamudou e sega ni biuti kemudou. Dou kila ni lomani kemudou vakalevu qai vukei kemudou ena dredre dou sotava mai. Dou kalougata dina!”