Takalevu na Yalo ni Kirisimasi​—Na Cava na Vuna?

O DAU nanamaki ina gauna ni Kirisimasi? Se o dau lomaocaoca ni sa voleka tiko mai? Era dau taroga e milioni vakacaca: ‘Meu voli iloloma vei cei? Na cava meu volia? Au na ceguva rawa na kena isau? Na cava na dede ni noqu saumi dinau?’

Ke mani vakavu kauai mada ga eso na ka va qori, e se takalevu ga na Kirisimasi. Sa bau tete mada ga ena veivanua era sega ni lotu vaKarisito. E levu na vuvale mai Japani era sa solevutaka ena gauna qo na Kirisimasi, sega ni baleta na kena ibalebale vakalotu, ia baleta ga ni gauna ni marau. E tukuni me baleti Jaina ena Wall Street Journal ni “kabi tu ena iloilo ni sitoa ena siti lelevu na itaba kei Santa Claus,” e kuria: “Era sa tekivu solevutaka tale ga na Kirisimasi mai Jaina o ira era sega sara ni dravudravua se vutuniyau, me iulubale ga ni nodra volivoli, kana kei na pati.”

Ena levu na vanua, e vakayagataki na Kirisimasi me toroicake kina na nodra veika vakailavo. E vakadinadinataki vakalevu qori mai Jaina, ena gauna qo “sa volitaka tiko e vanuatani e dua na iwiliwili levu ni vunikau palasitika ni Kirisimasi, veika tatalivaliva era dau lili kina, cina kataremoremo kei na so tale na iukuuku ni Kirisimasi,” e tukuna na Journal.

Ena vanua era levu kina na Musolomani, era solevutaka tale ga eso na soqo e tautauvata kei na Kirisimasi, ia e sega ni tukuni sara me caka ena ika25 ni Tiseba. E Ankara, Taki, kei Beirut mai Lepanoni, e sega ni ka vou na kena dau ukutaki na iloilo ni sitoa ena vunikau era lili tu kina na ka tatalivaliva kei na iloloma era olo vinaka tu. E Idonisia, e levu na ka ni veivakamarautaki e dau tuvanaki ena veiotela kei na vanua ni volivoli, ra qai rawa ni vakayakavi kei Santa na gone se ra taba vata kei koya.

Ena veivanua vakavalagi, e vakalevu ga me sa sega ni sema ena ka vakalotu na Kirisimasi, ia sa bisinisitaki qai levu na itukutuku ni veivoli “era taketetaki kina na gone,” e tukuni ena Royal Bank Letter ni Kenada. E macala ga ni levu era se lakova tiko ga na lotu ni Kirisimasi. Ia e sa raici vakamamada na ibalebale vakalotu ni Kirisimasi, sa vakaliuci na volivoli kei na soli iloloma me solevutaki kina. Na cava e vu ni veisau qori? E rairai sema ina itekitekivu ni Kirisimasi na vuna. A tekivu vakacava na Kirisimasi?

Ni bera ni veivosakitaki na taro qori, e vinaka me wiliki na ivolatukutuku ni iVolatabu e nanumi ni yavutaki kina na ivakatakarakara era cakava e levu me baleta na nona sucu o Jisu.

[Kato/​iYaloyalo ena tabana e 15]

KA ERATOU TUKUNA NA VOLA NA KOSIPELI

Na yapositolo o Maciu: “Ni sa sucu o Jisu mai Peceliema e Jutia ena gauna i Eroti na tui, eratou qai yaco mai Jerusalemi na dauraikalokalo mai na icabecabe ni siga, eratou taroga: “I vei o koya e sucu me nodra tui na Jiu? Keitou raica mai na icabecabe ni siga na nona kalokalo, keitou mani lako mai me keitou cuva vua.” Ni rogoca qo o Tui Eroti, dua na ka nona lomaleqa. A mani taroga o Eroti vei ira na “iliuliu ni bete . . . na vanua ena sucu kina na Karisito.” Ni kila ena sucu “mai Peceliema,” e tukuna o Eroti vei ratou na dauraikalokalo: “Dou lai vaqara na gone lailai, ni dou kunea, dou qai tukuna mai.”

“Ratou sa qai biubiu; ia me cava tale, na kalokalo ga eratou a raica mai na icabecabe ni siga sa liu tale vei iratou, e lai toka donuya sara na vanua e tiko kina na gone. . . . Ni ratou curu i vale eratou raica na gone kei Meri na tinana.” Ni ratou solia oti na nodratou iloloma vei Jisu, “a vakasalataki iratou na Kalou ena tadra, eratou sega ni suka kina vei Eroti, eratou suka ga ina nodratou vanua ena dua tale na sala.”

“Ni ratou sa lesu, e qai rairai ena tadra vei Josefa na agilosi i Jiova, e kaya vua: “Tucake, kauta na gone kei tinana, dro i Ijipita . . . ’ Mani kauti rau na veitinani ena bogi ya, ratou dro . . . E tuburi Eroti na cudru katakata ni sa kila ni ratou lawakitaki koya na dauraikalokalo, mani vakarota mera vakamatei kece na gonetagane lalai era yabaki rua lako sobu e Peceliema kei na veivanua volekata.”​—Maciu 2:​1-​16.

Na tisaipeli o Luke: “E biuti Nasareci mai Kalili o Josefa me gole sara i Jutia ena koro i Tevita o Peceliema, . . . me rau lai volai kei Meri na watina . . . Erau tiko mai kea . . . Mani vakasucuma nona ulumatua, e tagane, e ovici koya ena isulu qai vakadavori koya ena ikanakana ni manumanu ni sa sega tale na vanua me ratou moce kina ena rumu ni vulagi.”

“Ena vanua ya, eratou tu e tautuba ena bogi eso na ivakatawanisipi eratou veisau yadra tiko ena kena vakatawai na nodratou qelenisipi. E qai rairai vakasauri vei iratou na agilosi i Jiova, . . . Dua na ka nodratou rere. E qai kaya vei iratou na agilosi: ‘Dou kua ni rere. Raica! Au kauta mai vei kemudou na itukutuku vinaka era na marautaka vakalevu na tamata kece, ni sa sucu nikua na nomuni iVakabula o Karisito, na Turaga, ena koro i Tevita.’” Ni ratou rogoca qori na ivakatawanisipi, “Eratou kusa yani, ratou mani raici Meri kei Josefa, vaka tale ga kina na gone ni davo koto ena ikanakana ni manumanu.”​—Luke 2:​4-​16.