Ena Uqeta Dina na Duavata o Lotu?

“MEDA vakavinakataka na bula e vuravura. Meda kauta laivi na lotu.” Qori na vakatutu nei Floris van den Berg e dua na vuku mai Necaladi ena nona vosa a tabaki e kena ulutaga “How to Get Rid of Religion, and Why,” (Sala me Kau Laivi Kina o Lotu, kei na Vuna). O ira na kenadau ena so na tabana ni vuku e veiyasai vuravura era tukuna tale tiko ga me kau laivi o lotu.

E tukuna o Steven Weinberg e saenitisi qai taura na icovi ni Nobel: “E vinakati me vakayadrati o vuravura mai na tadra ca me baleta na vakabauta vakalotu e sa dede sara na kena muri voli mai.” Na vakasama ni na lailai sara na ca e vuravura ke kau laivi o lotu e sa qai tukuni ga vakalevu ena veiyabaki sa sivi. E levu na ivola e tu nikua e saqati kina o lotu qai taleitaki vakalevu.

Era soqoni vata na saenitisi rogo mera veivosakitaka na ka era tukuna ni gadrevi vakatotolo me caka, oya me kau laivi o lotu. E levu tale ga era sega ni vakabauta na Kalou era vakaraitaka sara ga vakadodonu ena tabana ni itukutuku na nodra sevaka na lotu ra qai sega ni veivutunitaka na ka era tukuna. E donu beka na nodra nanuma na tamata vuku qori?

E Tiko na Lotu Dina?

Ke lasu kece na lotu qai sega na Kalou, ena rairai ka vakayalomatua me kau laivi o lotu. Ia vakacava ke bula tiko na Kalou? Vakacava ke tiko e dua na ilawalawa e vuravura era matataka na Kalou​​—⁠era lewena na lotu dina?

Ni dikevi vinaka na ivolatukutuku me baleta na lotu, ena laurai kina ni dua na ivakarau ni sokalou e duatani sara vei ira na kena vo. E le lailai ga era muria tiko na ivakarau ni sokalou qori nikua. A tauyavutaka na lotu qori o Jisu Karisito kei na nona yapositolo. Ia e sega ni tautauvata kei na ivalavala e muria tu o lotu ni veivanua vaKarisito me vica vata na senitiuri.

Erau duidui vakacava o lotu ni veivanua vaKarisito kei na lotu dina a tauyavutaka o Jisu Karisito? E levu na sala erau duidui kina, meda raica mada ga e dua.

“Sega ni Vakavuravura”

Era tawaveitovaki na lotu vaKarisito taumada ena veika vakapolitiki. Nira cakava qori, era vakatotomuria kina na nona tawaveitovaki o Jisu. E tukuni ena iVolatabu e rua mada ga na ituvaki a vakaraitaka kina vakadodonu o Jisu ni sega ni via ciqoma na itutu vakapolitiki. (Maciu 4:​8-​10; Joni 6:​15) A cudruvi ratou tale ga na nona tisaipeli ni ratou via cakava na ka voravora me tarovi kina na nona vesu.​​—⁠Maciu 26:​51, 52; Luke 22:​49-​51; Joni 18:​10, 11.

Ni tarogi Jisu na Kovana ni Jutia e cavutu mai Roma se cava na nona sasaga vakapolitiki, a tukuna vakadodonu vua o Jisu: “E sega ni vakavuravura na noqu matanitu. Ke vakavuravura na noqu matanitu, era na vala na noqu tamata meu kua ni soli yani vei ira na Jiu. Ia e sega sara ga ni vu eke na noqu matanitu.” (Joni 18:⁠36) E matata e keri ni a sega ni via vakaitavi ena politiki o Jisu, sega tale ga ni tokona na sasaga ni mataivalu ena nona gauna.

Era muria tale ga na imuri i Jisu na ivakarau qori. Ena vakadidike sa cavuti oti mai ena dua na ulutaga e liu, qo na ka era tukuna na timi ni dauvakadidike me baleta na itavi ni lotu ena ivalu: “Era vakabauta na lotu vaKarisito taumada ni sega ni dodonu na ivalavala voravora. . . . E levu na lotu vaKarisito era sega ni via curu ena mataivalu se ra vala.” E vakabibitaki ena ivakavuvuli i Jisu kei na nona yapositolo meda lomani ira na kainoda, wili kina o ira eda sega ni veikilai, o ira era cavutu mai na duidui vanua kei na matatamata. (Cakacaka 10:​34, 35; Jemesa 3:⁠17) A uqeta dina na duavata na lotu qori.

Ni toso na gauna, na ivakavuvuli era muria taumada na lotu vaKarisito sa vakadukadukalitaki ena ka e vakavu veisei me vaka na ivakavuvuli vakatamata, itovo vakavanua, kei na yalo ni boletaki vanua. E vakamacalataki ena vakadidike sa tukuni oti mai na itavi nei lotu ena ivalu ena gauna makawa: “Ni tavuki me lotu vaKarisito o Constantine na Empara ni Roma, sa muria na isoqosoqo vaKarisito na ituvatuva vakamataivalu​​—⁠sa sega ni muri na ivakavuvuli i Karisito e yavutaki ena loloma, ia sa vakaliuci na sasaga vakapolitiki ni Empara kei na nona via vakavuai ira na matanitu tale eso me kovea na nodra vanua. O ira na lotu vaKarisito kei na Empara era vaqara iulubale vakalotu me caka kina na ivalu.” A tauyavutaki kina na lotu vaKarisito lasu.

iLawalawa e “Duatani”

Sa kawaboko beka na lotu vaKarisito a tauyavutaki taumada? Sega. E tiko nikua e dua na ilawalawa e duatani sara. E sega tale ni dua na lotu e vakataki ira na iVakadinadina i Jiova ena nodra vakatotomuri ira na lotu vaKarisito taumada. E sega na kedra isema ena lotu ni veivanua vaKarisito. Na Encyclopedia of Religion e tukuna nira “duatani” baleta na nodra ivakavuvuli kece e yavutaki “ena iVolatabu, era sega sara ga ni muria na ivakavuvuli vakatamata.”

Me vakataki ira na lotu vaKarisito taumada, era tawaveitovaki tale ga na iVakadinadina i Jiova ena veika vakapolitiki. E tukuni ena dua na niusiveva e tabaka na National Academy of Sciences e Ukraine ni o ira na iVakadinadina i Jiova era saga mera ulabaleta “na duidui vakamatatamata, vakavanua, vakalotu, vakaitikotiko, kei na kena e vauca na veika vakailavo.” A tukuni tale ga kina nira sega ni dau cakava na ka e “saqati kina na matanitu,” ra qai dau “muria na lawa ni nodra vanua.”

Ena nona ivola na Pacifism and Vicinity, a vola kina o Parofesa Wojciech Modzelewski mai na Warsaw University e Poladi: “Na iwiliwili levu duadua ni lewenivanua era sega ni dau vakaitavi ena ivalu era iVakadinadina i Jiova.” Nira muria vinaka na ivakarau era tekivuna na lotu vaKarisito ena imatai ni senitiuri, e rawa gona ni tukuni nira sa vakalesuya tale mai na iVakadinadina i Jiova na ivalavala ni sokalou a tauyavutaka o Karisito kei na nona yapositolo. Qori na ivalavala ni sokalou vaKarisito ena uqeta dina na duavata.​​—⁠Raica na kato ena tabana tarava.

Gauna Totoka se Bera Mai

E macala ga ni levu e vu mai lomadra na nodra qaravi Kalou​​—⁠eso mada ga na iliuliu ni lotu era kidroataka na levu ni veivakaisini ena nodra lotu. E veiganiti mera vakavinavinakataki e levu na daulotu era dau sasagataka dina na veiyaloni kei na duavata e vuravura.

Ia se mani vakacava na vinaka ni nodra inaki, e vakaiyalayala ga na ka eda rawa ni cakava me wali kina na leqa e vuravura. A vola na parofita makawa o Jeremaia: “Sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.”​​—⁠Jeremaia 10:⁠23.

Ia e dua na gauna totoka sa tu qo e matada. E tukuna na iVolatabu nira na bula e vuravura e dua na matatamata vou era na duavata. Era na veitacini dina o ira qori. Eda na vakaduavatataki na matatamata kece, eda na sega ni wasei ena iyalayala ni vanua, veicati vakayavusa, se ivakavuvuli vakalotu. Na ka ga ena veivakaduavatataki, na sokalou savasava vua na Kalou o Jiova.

E tukuna tale ga na iVolatabu na ka era na sotava na lotu era beca na Kalou. A kaya o Jisu: “Na matanitu e tawase e sega ni rawa ni tudei, na koro tale ga se vale e tawase ena bale.” (Maciu 12:25) Ena nona gauna lokuci na Kalou, ena vakayacora dina na vosa qori vei ira kece na lotu lasu.

A sa tukuna makawa tu mai na Kalou ena iVolatabu ni na “ia na veilewai e na vuku ni veimatanitu, ka na vunauci ira.” E tukuna tale ga na parofisai qori, na tamata era na “tukitukia na nodrai seleiwau mei bati ni siviyara, kei na nodra moto mei sele ni samaki: ena sega ni lavei seleiwau e dua na matanitu ki na dua na matanitu, a ra na sega ni vulica tale nai valu.” (Aisea 2:⁠4) Sa vakayacori tiko nikua na parofisai qori. Na lotu dina era lewena na iVakadinadina i Jiova e sa uqeta sara tiko ga qo na duavata.

[Tikina bibi ena tabana e 8]

Era vakaduavatataki ena loloma na iVakadinadina i Jiova

[Kato ena tabana e 9]

Era Duidui Vakacava na iVakadinadina i Jiova?

Era dau kurabui e levu nira kila na nodra duidui na iVakadinadina i Jiova vei ira na vo ni lotu era tukuna nira imuri i Karisito. Qo eso na ka e vakavuna na nodra duatani na iVakadinadina i Jiova:

ITUVATUVA

● E sega na iliuliu ni lotu.

● Era sega ni saumi o ira na liutaka na cakacaka, o ira na veivakavulici, kei ira na daukaulotu.

● Era sega ni solia na duanaikatini se veikauyaki na veleti ni soli ena nodra vanua ni sokalou, e vakatokai na Kingdom Hall.

● Na nodra cakacaka kece e tokoni ena cau, qai sega ni kilai o cei e cau se vica e solia.

● Era tawaveitovaki tu ga ena veika vakapolitiki.

● Era sasagataka na duavata ra qai sega ni vakaitavi ena ivalu.

● E vakaduavatataki ira e vuravura raraba na nodra vakabauta e yavutaki ena iVolatabu.

● Era sega ni veivakaduiduitaki, se mani vakaitikotiko, vakayavusa, vakamatatamata, se ivakatagedegede ni bula.

● E sega na kedra isema ena dua tale na lotu, se mani Katolika, Orthodox, se Lotu Tawase.

IVAKAVUVULI

● Era vakabauta ni dua ga na Kalou dina, na yacana o Jiova.

● Era sega ni vakabauta ni o Jisu Karisito e Kalou Cecere duadua, era sega tale ga ni vakabauta na ivakavuvuli ni Letoluvakalou.

● Era muria na ivakavuvuli i Jisu ra qai rokovi koya ni Luve ni Kalou.

● Era sega ni sokaloutaka na kauveilatai, se vakayagataka na matakau ena nodra sokalou.

● Era sega ni vakabauta ni o ira kece na tamata ca era mate, era na lai biu ena bukawaqa i eli.

● Era vakabauta ni na vakalougatataki ira na talairawarawa na Kalou mera bula uasivi ra qai bula tawamudu ena vuravura parataisi.

Era vakabauta tale ga na iVakadinadina i Jiova nira sa vakalesuya tale mai na sokalou vaKarisito a tauyavutaki ena imatai ni senitiuri, na kena eratou muria na yapositolo i Jisu.

[iYaloyalo ena tabana e 8]

Dua na iVakadinadina i Jiova mai Serbia, mai Bosnia, kei Croatia