Vuna Era Vakacaca kina Eso
O JOSEBA, e vakaitikotiko e Sipeni, a tarogi se cava e lewena kina na ilawalawa dauvala. E tukuna: “Na veivakalolomataki kei na ka tawadodonu keitou sotava ena gauna oya e sega sara ga ni taqei rawa. Ena siti levu o Bilbao, ena vanua au tiko kina, era dau gole ga mai na ovisa mera mokulaki ira na lewenivanua ra qai vesuki ira.”
E tomana: “Au vesu ena dua na mataka niu tukuna vakadodonu na ka era cakava tiko na ovisa. Na levu ni noqu katakata au via cakava sara ga kina e dua na ka—au via vakacaca sara ga me oti kina na ka era cakava tiko na ovisa.”
Veivakalolomataki kei na Veisausaumi
Na iVolatabu e sega ni vakadonuya na ivalavala voravora, e tukuna ga ni “veivakasaurarataki sa vukica na tamata vuku me tamata lialia,” qori ena nona lai cakava na ka vakalialia. (Dauvunau 7:7) E levu era dau cudru ni caka na veika tawadodonu ena nodra lotu, matatamata, se matanitu.
Kena ivakaraitaki, e tukuna o Hafeni a cavuti ena ulutaga sa oti: “A tauri vakaukaua na neitou vanua. O ira na manumanu era dau valataka na vanua era tiko kina, e dodonu gona me keimami valataka na neimami vanua kei na neimami dodonu.” E rogoci na ka e tukuna e dua na dauvala ni oti na nona vakacabotetaki koya: “Keitou na qai cegu sara ke o ni muduka na vakalutugasaukuro, kasi gaga, na nodra bala e valeniveivesu kei na nodra vakalolomataki na wekaqu.”
Veiuqeti o Lotu
E levu na gauna e dau uqeti ira na dauvala na leqa e tarai ira, ia na nodra cakava qori e vu vakalevu mai na nodra itavi vakalotu . A ciqoma e dua na iliuliu ni matanitu na nona fax na nodra mata na dauvala: “Keimami sega ni lialia, keimami sega tale ga ni vinakata na veiliutaki. Keimami qaravi Kalou, oya na vuna keimami na vala tiko ga kina.”
Me baleta na nona veiuqeti o lotu erau vola kina o Daniel Benjamin kei Steven Simon, ena ivola The Age of Sacred Terror: “Sa qai levu ga na lotu ena vuravura qo, era vakabauta e levu na lotu makawa kei na lotu vou ni bibi ena nodra sokalou na ivalavala voravora.” A biuta vata e dua na daunivakadidike na ivolatukutuku e vakatoka me “sala vakasakiti e vakayacori kina na vakacaca ni batikadi e vuravura.” A tukuna kina: “Era vakabauta kece o ira na dauvakacaca ni ka era cakava e ka vakalou, e nona ivakaro sara ga.”
Ia na nodra rai e levu na dauvala era lotu e sega ni salavata kei na ivakavuvuli dina ni nodra lotu.
Vakadeitaka e Lomana
O Joseba sa vakamacalataki oti, a vakacacani vakalevu ena gauna a vesu kina. E tukuna: “Au vakadeitaka mai na veivakalolomataki oya ni dodonu ga meu cati ira. Keu mani mate me yaco kina na veisau, ena yaga qori.”
Levu na gauna na ka era vakatavulici kina na ilawalawa qo e dau vakavuna na nodra via vakaitavi ena itovo voravora. E tukuna o Hafeni: “Ena gauna oya ena keba ni isenivalu, e dau caka na soqo me keimami vakavulici kina ni o ira na yago vulavula era dau saga tiko na sala mera lewai ira kina na yago loaloa.” Na cava e yaco kina?
E tomana: “Au sa qai cati ira ga vakalevu na yago vulavula. Au sa sega ni nuitaki ira. Lakolako ga au sa sega ni vosota rawa, au nanuma kina me keimami cakava e dua na ka.”
Ia e kurabuitaki ni qai seavu na nodrau cudru kei na nodrau veicati o Joseba kei Hafeni, dina ga ni rau a dei tu ena ka rau a vakabauta. Na cava a uqeti rau me rau veisau? Ena qai vakamacalataki qo ena ulutaga tarava.
[Tikina bibi ena tabana e 6]
“Au vakadeitaka mai na veivakalolomataki oya ni dodonu ga meu cati ira. Keu mani mate me yaco kina na veisau, ena yaga qori.”—Joseba