Temaki Mera Lawaki

“Na veidabui ena bisinisi sa yaco makawa tu, ia o ira era via cakava na itovo qori era na sotava ga na leqa.” —Stephen, Merika.

O DUAVATA ena ka e tukuni qori? Na veidabui e rawa ni rawati kina eso na ka vinaka ena dua ga na gauna lekaleka. Qori na vuna era temaki kina o ira na daudina mera veidabui ena vica na ituvaki qo.

Temaki ena ka o Vinakata. E macala ga nida vinakata me levu toka na noda ilavo kei na noda iyau, se vakacava? Koya gona, ni basika e dua na ituvaki e rawa kina nida temaki meda rawa ilavo, ena dredre meda vorata.

● “Au cakacaka ena dua na kabani, qai noqu itavi meu digia na kabani me konitarakitaki. E levu era via vaqumi au meu digi ira. Levu gona era rawai ena sala ni rawa ilavo rawarawa va qori.”—Franz, Tokalau e Loma.

Temaki me Levu na Tubu. Ena vica ga na yabaki sa oti, era vakila na bisinisi kece e veiyasai vuravura na leqa ni bula vakailavo. Dua tale ga na ka era vakila tiko oya na totolo ni veiveisau ni iyaya vovou vakalivaliva kei na levu ni veiqati ni caka bisinisi ena veiyasai vuravura. Qori na vuna era lawaki kina na tamata cakacaka me rawati kina na tubu era vinakata na boso ni cakacaka.

● “Keimami nanuma ni dodonu ga me keimami cakava . . . Ke sega, ena lusi na kabani.”—Reinhard Siekaczek, a vesu ni a veivaqumi.—The New York Times.

Temaki Vei Ira Eso Tale. Eso vei ira oni cakacaka vata se o ira na dauvolivoli era na temaki iko mo lawaki tale ga.

● “E tukuna vei au na manidia ni dua na kabani keitou caka bisinisi vata vakalevu, ni na sega ni tomani na caka bisinisi ke sega niu soli ilavo vua.”—Johan, Sauca Aferika.

iTovo Vakavanua. Ena so na itovo vakavanua, e dau kena ivakarau me caka na soli iloloma ena gauna e caka kina na veivoli. Na levu ni iloloma e soli kei na gauna e soli kina, e sega ni matata kina se caka vakadodonu na veivoli se sega. Ena levu na vanua, era vinakata na vakailesilesi daulawaki mera saumi rawa ni bera nira cakacaka, era vinakata tale ga me soli vei ira na ilavo me isau ni nodra veiqaravi.

● “E dredre me kilai na duidui ni veivaqumi kei na soli iloloma.”—William, Colombia.

iVakarau ni Bula. E rawarawa sara nira dabuitaki o ira era dravudravua ena kena ivakatagedegede ca sara se o ira era bula ena vanua e sega ni muri tu kina na lawa ni matanitu. Ena ivakarau ni bula qori, era dau raici tu o ira era sega ni lawaki se sega ni butako mera na sega ni qaravi ira rawa nodra vuvale.

● “E sa ivakarau tu ni bula na veidabui, e sega ni cala, e bibi ga mo kua ni tobo.”—Tomasi, Congo Kinshasa.

Vuna e Levu Tiko ga Kina na Veidabui

Na noda temaki meda lawaki ena tarai keda vakalevu. Era vakatarogi na manidia ni bisinisi e Ositerelia, ra qai tukuna ni rauta e 9 mai na 10 era tukuna ni veivaqumi kei na cakacaka vakailawaki e “sega ni dodonu, ia ena sega ni tarovi rawa.” Era tukuna tale ga ni rawarawa mera cakava na ka e sega ni dodonu me rawa ga nira rawata kina nodra konitaraki se me rawaka nodra kabani.

Ia o ira na dau lawaki era okati ira tu mera daudina. E rawa vakacava nira tukuna nira daudina? E tukuna na Journal of Marketing Research: “E levu era lawaki me rawa ni levu na ka era rawata, ia era vakalialiai ira tiko ga nira cakava na ka mera nanuma kina nira daudina se tamata vinaka.” Qori era sa qai vakabauta kina e levu nira tamata daudina.

Kena ivakaraitaki, ena rairai tukuni ni veidabui e sega ni ca sara me vaka na ivalavala vakasisila. Na lasu se lawaki e sa sega ni muri kina na ka dodonu se raici tu me ka ni veisisivi. Na veivaqumi e rawa ni kena ibalebale na nona vakalomavinakataki e dua se na kena saumi e dua na veiqaravi me caka vakatotolo.

E laurai mai na nodra ivakamacala eso tale me baleta na daudina, ni sega tu ni dua na ka na veidabui. O Tom e cakacaka ena tabana ni ilavo, e tukuna: “Na nodra rai e levu me baleta na daudina e sega nira yavutaka mai na ka dina era dau cakava, e yavutaki ga ena ka era cakava mera kua kina ni tobo.” E tukuna o David, a dua tu na iliuliu ni bisinisi: “Dina ni rarawataki na kena kilai na cakacaka vakailawaki, ia ke sega ni tobo ena sega ni dua na kena leqa. O ira na cakacaka vakailawaki qai sega ni tobo era raici mera qaseqase.”

E levu era tukuna ni bibi na veidabui me rawati kina e levu na ka vinaka. E tukuna e dua a dau caka bisinisi ena dua na gauna balavu: “E levu e uqeti ira na yalo ni veisisivi, era lai tukuna kina, ‘E vinaka mo cakava ga na ka e rawa me dua kina na nomu cakacaka.’” E dina qori? Vakacava era ‘dabui ira tiko ga ena nodra nanuma cala’ o ira na daulawaki? (Jemesa 1:22) Dikeva mada na yaga ni daudina ena ulutaga tarava.

[Tikina bibi ena tabana e 15]

“Na nodra rai e levu me baleta na daudina e sega nira yavutaka mai na ka dina era dau cakava, e yavutaki ga ena ka era cakava mera kua kina ni tobo”

[iYaloyalo ena tabana e 15]

E levu era tukuna ni bibi na veidabui me rawati kina e levu na ka vinaka