E Yaga na Daudina

“Sa kamikamica vua na tamata na kakana ni lasu; ia emuri ena sinai na gusuna e na laqere.”—Vosa Vakaibalebale 20:17.

VAKACAVA e bibi na lawaki me rawa ni toso vinaka na bisinisi? Sega. Na kena dina ga ni dau yaco vakalevu kina na leqa. Na cava na vuna? Baleta na daudina e rawa kina na veinuitaki, na itovo e bibi duadua me toso vinaka kina na bisinisi, me dede tale ga.

Na Yaga ni Veinuitaki

Ke o mani kila se sega, ena yaga na nomu daudina. A vakadinadinataka qori o Franz, sa cavuti mai ena ulutaga sa oti, e tukuna: “Ena imatai ni gauna au cakacaka kina, au sega ni kidava nira via kila na noqu boso se au daudina se sega, era mani vakatovolei au kina. Toso na gauna era sa qai kila niu dau cakacaka vakadodonu. Au mani qarava e levu na itavi, soli tale ga vei au na lewa, ratou solia kina vei au na itaukei ni cakacaka e levu na ka vinaka ena noqu daudina. Eso tale era rawa ni cakava sara vakavinaka na cakacaka qo qai levu cake na ka era kila vei au. Ia au kila niu na dei ena noqu cakacaka baleta ni nuitaki au o noqu boso.”

Mo Kua ni Rawai

O David, e dua na turaga e vakabisinisi sa cavuti mai ena ulutaga sa oti, e tukuna: “O ira na cakacaka vakailawaki mera rawaka kina vakalekaleka era na sotava ga na leqa. Keitou sega kina ni vakaitavi ena caka bisinisi e vakavulomatarotaro. E levu na kabani era qai lusi nira cakacaka vakailawaki, ra qai veilewaitaki kina eso. E sega ni yaco na ituvaki va qori ena noqu bisinisi.”

A tara o Ken e dua na bai ni bulumakau ena cevaicake kei Aferika, a rawa sara ga ni vaqumi ira na vakailesilesi me vakatotolotaki na ka e vakau mai, me kua tale ga ni sauma na ivakacavacava. E tukuna: “E levu vei ira na dau susu manumanu era dau cakava qori. Me vaka ni keitou cakacaka vakadodonu, e taura e tini na yabaki me qai rawa na ka kece e vinakati ena bai qori. E yaga na neitou cakacaka vakadodonu. Ia o ira na dau susu manumanu dau veivaqumi, era dau vakasaurarataki vakalevu vei ira na vakailesilesi daulawaki mera sauma tale e levu na ilavo.”

Vosota na Drakidrakita ni Bula Vakailavo

E rawarawa sara na cakacaka vakailawaki ena gauna e sega ni toso vinaka kina na bisinisi. Ia ena ituvaki va qori ena qai laurai kina na yaga ni daudina.

Dikeva mada na ivakaraitaki i Bill, a lusi nona bisinisi ni taravale ena gauna e sega ni toso vinaka kina na bisinisi ni veivakavaletaki e Merika. E tukuna: “Era sa lusi eso na bisinisi lelevu keitou dau konitaraki kina, ra qai dinautaka tu vei keitou e vica vata na drau na udolu na dola. Au kila ni sa sega ni caka rawa kina e dua na ka, keirau mani veivosaki kei na dua tale na iliuliu ni kabani ni taravale ke rawa ni vakacakacakataki eso vei keitou. Ena loma ga ni 48 na aua, eratou vakadonuya me keitou cakacaka. Eratou tukuna niu kilai ena noqu dau cakacaka vinaka kei na noqu daudina.”

O ira kece era talanoataki qori era iVakadinadina i Jiova. Era yavutaka mai na iVolatabu na ka era vakatulewataka me baleta nodra bisinisi, me vaka ga era dau cakava ena nodra bula e veisiga. Koya gona, e levu sara na ka vinaka era sotava nira daudina, e toso vinaka tale ga na nodra bisinisi.

Ena so na ituvaki ena rawa ni levu na ka o rawata ni o cakacaka vakailawaki. Ia vakacava e bibi me levu na nomu iyau mo tamata yaco kina?

[Tikina bibi ena tabana e 16]

Ke o mani kila se sega, ena yaga na nomu daudina

[iYaloyalo ena tabana 17]

“Eratou tukuna niu kilai ena noqu dau cakacaka vinaka kei na noqu daudina.”—Bill, Merika