Veivakalougatataki Vakalevu na Daudina
“Baleta na nona bula e dua ena sega ni vakatau ena levu ni ka e tu vua.”—Luke 12:15.
E YAGA ina noda bula na ilavo eda rawata mai na noda cakacaka saumi. E tiko na noda itavi vakalou, oya meda qara na ka meda bula kina kei ira na noda vuvale.—1 Timoci 5:8.
Ia vakacava ke o vinakata me levu tale na ilavo o rawata, me levu tale ga na iyaya o volia kina? Vakacava ke sa ivakarau sara ga ni nomu bula qori? E dau rawarawa mera lawaki o ira e nodra inaki mera vutuniyau. Era na rairai sega ni liaca qori me yacova nira qai kidava nira sa rawai ena ilawaki. E tukuna tale ga na iVolatabu, ni kena lomani vakalevu na ilavo ena vakavuna e levu na rarawa.—1 Timoci 6:9, 10.
Dikeva mada e va na ivakaraitaki qo e vakamacalataki kina ni rawaka e sega ni vakatau wale ga ena levu ni iyau e taukena e dua.
Kua ni Beci Iko
“Ena vica na yabaki sa oti, au intèviutaka e dua e via inisuataka e dua na milioni na dola. A rawa sara ga niu rawata kina e vica vata na udolu na dola na noqu bonisi. E mani tukuna keu vinakata me inisua nona bisinisi ena vinakati meu solia vua na veimama ni ilavo au na rawata mai na noqu bonisi. Au tukuna sara ga vua ni cala na ka e vinakata, e cala tale ga vakalawa.
“Au tarogi koya se rawa ni solia na kena itukutuku matailalai kei na nona ituvatuva vakailavo vua e dua e dau veidabui. Au vakamatatataka tale vua na noqu rai, qai tukuna vua ni rawa ni qiriti au ke vinakata meu qarava na nona inisua. Keirau sega ni qai veitaratara tale.
“Keu vakadonuya na ka e vinakata, au na sega ni yalodina, au na rogorogo ca sara ga kina me vaka niu lotu vaKarisito. A rawa sara ga ni rawai au na turaga oya meu vakaitavi ena caka bisinisi vakailawaki.”—Don, Merika.
Vakacegui na Vakasama
Me vaka a vakamacalataki taumada ena itekitekivu ni ulutaga qo ni a via vaqumi o Danny ena dua na ilavo levu me lasutaka kina na ka e rawa ni cakava e dua e dauvakarautaka na iyaya ni nodratou kabani. Cava a cakava kina?
“Au vakavinavinakataki koya na manidia ena nona veikauaitaki me vakarautaka na ivakayakavi, au qai vakasuka na waqanivola e tiko kina na ilavo. E usuraka tiko ga na ka e vinakata qai tukuna ke rawata na nona kabani na ivakatagedegede keitou vinakata yani, ena vakalevutaka na ilavo e tiko ena waqanivola oya. Au sega ni via ciqoma.
“Keu a ciqoma na ilavo, au na lomaleqa tu ga e veigauna deu na qai tobo. E muri, a mani rogoca o noqu boso na ka a caka oya. Au marau, au lomavakacegu niu a dina tiko ga. Au lai nanuma sara kina na Vosa Vakaibalebale 15:27: ‘E dauvakararawataka na nona vale ko koya na daukocokoco; Ia ko koya sa cata nai solisoli [veivaqumi] ena bula.’”—Danny, Hong Kong.
Marau na Vuvale
“Au cicivaka tiko noqu bisinisi ni tara vale. E levu na sala eda rawa ni lawaki kina se meda lawakitaka na saumi ni ivakacavacava. Ia e yaga sara vakalevu ina noqu vuvale na noqu dau sasaga meu daudina.
“Na yalodina e okati ena ivakarau ni nomu bula kece, sega ni gauna ga o lai cakacaka kina se ni o caka bisinisi. Nomu kila ni na sega ni butusevata o kemu isa na ivakatagedegede ni Kalou me daudina, ena qai dei na nomudrau veinuitaki ena loma ni vuvale. Ena lomavakacegu o kemu isa ena nona kila ni o na yalodina tiko ga ena veigauna kece.
“Ke o mani taukena sara e dua na kabani levu duadua e vuravura, o na sega ga ni volia rawa na vakacegu, me vakacegui iko mai na leqa vakavuvale o sotava tiko. Niu dua na iVakadinadina i Jiova, au raica kina ni kena muri na ivakavuvuli vakaivolatabu e maravu kina na bula. E tiko na gauna meu marautaka kei ratou noqu vuvale, au sega kina ni lomaleqataka na vuravura e qarai vakasivia kina na ilavo kei na kocokoco.”—Durwin, Merika.
Veiwekani Vinaka kei na Kalou
“Noqu cakacaka e okati tiko kina na noqu dau volia na iyaya e gadrevi ena kabani au cakacaka tiko kina. So na gauna era dau tukuna na dauvolivolitaki mera kua ni musuka na isau ni yaya e volia na kabani au cakacaka tiko kina, ia era na solia vei au e dua na pasede mai na levu ni iyaya e volia na kabani au cakacaka kina. Ia qo e vaka meu sa butako tale tiko mai na kabani au cakacaka kina.
“E lailai ga na kequ isau, au rawa sara ga ni vakayagataka na ikuri ni ilavo e dau soli vei au. Ia e bibi duadua ga me vinaka na noqu lewaeloma, me vakadonui au tale ga na Kalou o Jiova. Koya gona, ena gauna kece au dau cakacakataka kina na ka vakailavo, au na muria ga na ivakavuvuli vakaivolatabu ena Iperiu 13:18: ‘Keitou vinakata me keitou dina ena ka kece.’”—Raquel, Yatu Filipaini.
[Kato/iYaloyalo ena tabana e 19]
iVakasala Yaga ni Caka Bisinisi Vakadodonu
E duidui na ivakavuvuli se na lawa ni caka bisinisi ena levu na vanua. Ia e rawa ni vakayagataki na ivakavuvuli ena iVolatabu me yavu ni vakatulewa ni caka bisinisi vakadodonu. Qo e ono na ivakasala yaga ni caka bisinisi vakadodonu:
Daudina
Kena iVakavuvuli: “Ni kua ni veilasutaki.”—Kolosa 3:9.
Mo Vakabauti
Kena iVakavuvuli: “Me Io ga na Io, me Sega na Sega.” —Maciu 5:37.
Nuitaki
Kena iVakavuvuli: “Mo kakua ni vakavotuya na ka vuni vua e dua tani.”—Vosa Vakaibalebale 25:9.
Cakacaka Vakadodonu
Kena iVakavuvuli: ‘Kua ni ciqoma na veivaqumi. Na veivaqumi ena vakacalai ira na dau vakataulewa vuku.’—Lako Yani 23:8.
Kua ni Veivakaduiduitaki
Kena iVakavuvuli: “Na ka kece oni vinakata mera cakava vei kemuni na tamata, moni cakava tale ga vei ira.”—Maciu 7:12.
Me Donu Vakalawa
Kena iVakavuvuli: “Solia na ka vei koya e dodonu me soli vua, na ivakacavacava vei koya e lavaka na ivakacavacava.”—Roma 13:7.
[Kato/iYaloyalo ena tabana e 19]
Sala mo Dina Tiko ga Kina ena Caka Bisinisi
● Cava o Dau Vakabibitaka. Kena ivakaraitaki, na cava e bibi duadua vei iko, me levu na iyau o rawata se me vinaka tiko ga na nomu veiwekani kei na Kalou?
● Vakatulewa Rawa. Kila rawa eso na ituvaki ena vakadredretaka mo daudina, qai vakasamataka na ka mo cakava ena ituvaki qori.
● Tukuna Nomu iVakarau ni Cakacaka. Ni tekivu nomu caka bisinisi kei na dua, vakamacalataka vakavinaka vua na ivakatagedegede o na muria.
● Kere iVakasala. Ni o temaki se veisaqasaqa na rai me baleta na ka dodonu, mo kere ivakasala vua e dua e tautauvata na nomudrau ivakatagedegede ni cakacaka.
[iYaloyalo ena tabana 18]
Ke o daudina, o na lomavakacegu