Na Cava ena Veisau?

“Ena sega ni lavei seleiwau e dua na matanitu ki na dua na matanitu.”

“Na lewe ni koro ena sega ni kaya, Ka’u sa tauvi mate.”

“Sa na sega tale na mate.”

DE DUA ena lomatarotarotaki na kena vakayacori na veivosa qori. Ia eda rawa ni vakadeitaka nira sega ni tatadra wale ga qori. Na vuna? Baleta qori e sega ni nodra vosa ni yalayala na daunipolitiki, ni sega vei ira na kaukaua mera veisautaka na noda vuravura. Ia na yalayala era cavuti e cake era kune ena iVolatabu.a

Era nanuma e levu ni iVolatabu e dua ga na ivola makawa qai sega ni yaga nikua. Vakacava e va qori tale ga na nomu rai? Ke vaka kina, vakacava mo dikeva vinaka sara na ka e tukuni ena iVolatabu? Na kena dina oya ni iVolatabu e ivola vakasakiti duadua ga e vakamacalataka na itukutuku makawa ni kawatamata mai na ivakatekivu. Qo eso na ka e vakamacalataka:

● Na vuna e sotava kina na kawatamata na rarawa.​—Roma 5:12.

● Sala e nakita na Kalou me walia na ituvaki qori.​—Joni 3:16.

● Na vuna era sega ni veisautaka rawa kina na noda vuravura na matanitu vakatamata.​—Jeremaia 10:23.

● Na vuna meda nuitaka kina na yalayala ni Kalou me cakava qori.​—Josua 23:14.

Vakacava ena vakaotia dina na Kalou na walokai, ivalu, tauvimate kei na mate? Ena sega ni dredre meda vakadinata qori ke da vakabauta na veika qo:

1. E buli keda na Kalou.

2. E kauaitaki keda o koya.

3. E tu vua na kaukaua me veisautaka na vuravura.

4. E nona inaki sara ga me cakava qori.

E tiko beka na vuna vinaka meda vakabauta kina na va na tikina qori? Era sureti kemuni na iVakadinadina i Jiova​—era tabaka na mekesini qo​—mo kila sara ga vakataki iko ena nomu vulica na iVolatabu.

De dua e tiko na nomu iVolatabu, ia o dau sega ni wilika vakalevu se o sega sara ga ni dau wilika. E levu mada ga vei ira na dau wili iVolatabu era tukuna ni dredre mera kila na ka e tukuni kina. Ke sega ni matata tale ga vei iko na ka o wilika, o sureti mo veitaratara kei ira na iVakadinadina i Jiova mo vulica wale kina na iVolatabu. E vica vata na milioni na tamata e veiyasai vuravura era sa vakila tiko na yaga ni ituvatuva qori. E caka vakacava qori?

Ena gole yani ena nomuni itikotiko se dua tale na vanua veiganiti e dua se rua na iVakadinadina i Jiova e veimacawa mo dou veivosakitaka na iVolatabu, qori e sega ni saumi. Na vuli iVolatabu va qori ena vukei iko mo sauma na taro me vaka, Na cava eda rarawa kina? Na cava era sega ni veisautaka rawa kina na vuravura qo na matanitu vakatamata? Na cava na Matanitu ni Kalou, kei na sala cava ena vakayacora kina na veika e sega ni cakava rawa na matanitu vakatamata?

Ke o via kila e levu tale na sala me yaga kina vei iko na vuli iVolatabu, veitaratara kei ira na iVakadinadina i Jiova ena nomu yasayasa se lako ena neimami Web site www.pr2711.com. O rawa tale ga ni volavola ina dua na itikotiko veiganiti ena tabana e 5 ni mekesini qo.

[iVakamacala e ra]