Bula Vakaidewadewa Se Buli?

Na Qele ni Ika

● Era mate e veiyabaki e sivia e dua na milioni na lewenivanua ena coqa vakacalaka e gaunisala, ra qai mavoa kina e rauta ni 50 na milioni. Ia e tutu yadua sara mera qai veicoqacoqa e vica vata na milioni na qele ni ika era toso vata tu. Era cakava vakacava qori? Ena vukei keda vakacava na ka era cakava me vakalailaitaki kina na coqa e gaunisala?

Vakasamataka mada qo: Era kila na qele ni ika na ka e tu wavokiti ira ena nodra vakayagataka na matadra kei na dua na tikiniyagodra vakasakiti e dau vakila na ka, e vakatokai na lateral line. Na tikiniyago ruarua qori e rawa ni dusimaki ira mera kila na vanua era tu wavoki kina na vo ni ika, sa ra na qai vakatulewataka na ka mera cakava:

1: Kena imatai: Era toso vata tiko. Era na saga me tautauvata na nodra totolo kei na vo ni ika era toso vata tiko, me tautauvata tale ga na kedra veiyawaki.

2: Kena ikarua: Veivolekati. Era na volekati ira na ika era tu vakayawa.

3: Kena ikatolu: Mera kua ni veicoqacoqa. Era veisautaka na vanua mera gole kina mera kua ni coqa kei ira na vo ni ika.

Mai na tolu na ka era dau cakava na ika ena gauna era toso vata kina, a bulia kina e dua na kabani ni buli motoka e Japani e vica na motoka lalai era porokaramutaki tu, ra qai sega ni veicoqacoqa ena gauna era cicivata kina. Na motoka lalai e porokaramutaki qori, e sega ni vakamatana ia e vakayagataka na iyaya vovou e dau vakauitukutuku. E sega tale ga ni vakayagataka na lateral line me vaka na qele ni ika, ia e vakayagataka na misini e vakatokai na laser range finder. Na misini qori e rawa ni kila na yawa ni vanua era tu kina na ka. E vakadeitaka na kabani qori ni iyaya vou qo ena vukei ratou me ratou bulia na motoka ena “sega ni coqa,” “sega ni vakaduka na noda itikotiko, ena sega tale ga ni osooso kina na gaunisala.”

E kaya o Toshiyuki Andou e dua na iliuliu ni idinia ena buli motoka livaliva: “Keimami vakayagataka sara vakavinaka na iyaya vovou vakatekinoloji ni gauna qo ena neimami muria na imoimoi era dau cakava na qele ni ika. Eda sa bula tu qo ena gauna e levu kina na vakayagataki ni motoka, e levu gona na ka eda rawa ni vulica mai na nodra veitosoyaki na qele ni ika.”

Na cava o nanuma? E vakasakiti dina na nodra toso vata na qele ni ika. Vakacava na ka era cakava qori e bula vakaidewadewa se buli?

[iYaloyalo ena tabana e 31]

[Credit Line]

Ika: © Ralf Kiefner/age fotostock