Na “Mata” ni Bakui

NA SASALU ni cakau qo e dau vakayagataka na dakuna me nona itataqomaki qai vakasakiti dina na ka e rawa ni cakava. E dau vakayagataka tale ga me raica na rarama, ni robota na dakuna na lens somidi.

Vakasamataka mada: Nira dikeva na saenitisi na daku ni bakui, era raica “ni vuvuce qai veiosoosoti na kedra ituvatuva, e makare vinaka qai mamare mai na drauniuluda,” e kaya na mekesini Natural History. Sa vakadinadinataki ni veika vuvuce qori e dua na lens somidi kaukaua qai tiko kina na calcium carbonate (calcite), e dau vakadewataka na rarama ina dua na nave e tiko e rukuna, e vakatokai na photosensitive nerve. Na nave qori e dau vakila na rarama. E yaga tale ga na lens qori me rawa ni kila na bakui na vanua me gole kina.

E kaya o Joanna Aizenberg, e dau dikeva na kemisitiri, mai na rua na ka e cakava na daku ni bakui, eda “vulica kina e dua na lesoni bibi: ena baioloji, e dau buli na iyaya me rawa ni cakava e levu na ka.”

Nira dikeva na ka e rawa ni cakava na daku ni bakui, era bulia kina na dauvakadidike e dua na iwalewale rawarawa ni kena tuvani na lens somidi e caka mai na calcium carbonate, e sega ni saulevu. E levu na sala e yaga kina na ituvatuva qori, me vaka na vakauitukutuku ena talevoni, e dau vakayagataki kina na optical fiber me vakadewataka na sikinala ni rarama.

Na cava o nanuma? E bula vakaidewadewa se buli na “mata” ni bakui?