Wase e 7

Jisu kei Ira na Dauraimatani Lomalagi

ESO na tagane era lako mai Natuicake. O ira oqo na dauraimata ni lomalagi​—na tamata era kaya ni rawa me ra vakamacalataka na i balebale ni i tutu era dui koto kina na veikalokalo. Nodra tiko voli mai Natuicake na nodra vanua, era a raica e dua na kalokalo vou, ka ra vakamuria me vica vata na drau na kilomita ki Jerusalemi.

Ni ra yaco yani na dauraimata ni lomalagi ki Jerusalemi, era taroga: “Evei ko koya sa sucu me nodra tui na kai Jutia? ni keitou a raica na nona kalokalo mai na tu i cake, ka keitou lako mai me cuva vua.”

Ni sa rogoca na veika oqo ko Tui Eroti mai Jerusalemi, sa cudru vakalevu sara. Sa qai soqoni ira vata mai na bete i liuliu ka vaqaqa na vanua ena sucu kina na Karisito. E vakayavutaki na i sau ni nodra vosa mai na i Vola Tabu, era sa qai sauma: “Mai Peceliema.” Sa qai kacivi ira mai na dauraimata ni lomalagi ko Eroti ka tukuna vei ira: “Dou laki vakasaqara matua sara na gone lailai; ia ni dou sa kunea, tukuna mai vei au, me’u laki cuva talega vua.” Ia, e via kunea na gone ko Eroti me vakamatea!

Ni ra lako yani, sa qai yaco e dua na ka veivakurabuitaki. Na kalokalo era a raica ena nodra tiko voli mai Natuicake e sa mai liutaki ira. E macala vinaka ni duatani na kalokalo oqo, ia e lavotaki na kena vakarautaki me liutaki ira. Era vakamuria tikoga na dauraimata ni lomalagi me yacova ni sa laki tu vakadua me donuya na delavuvu ni vale e rau tiko kina ko Josefa kei Meri.

Ni ra curu ki vale na dauraimata ni lomalagi, era kunei Meri kei na luvena lailai, ko Jisu. Era cuva sobu ka vakarokoroko vua na gone. Sa ra qai sereka na nodra i solesole i loloma, na koula, na ka boi vinaka e dauvakamai, kei na mura. Ni oti oqori sa ra qai vakarau lesu me ra tukuna vei Eroti na vanua e tiko kina na gone lailai, a qai vakasalataki ira na Kalou ena dua na tadra me kakua ni ra vakayacora. Sa ra qai muria e dua tani tale na sala ki na nodra vanua.

O cei mada o nanuma ni a vakarautaka na kalokalo ka veitosoyaki voli e lomalagi me dusimaki ira na dauraimata ni lomalagi? Nanuma tiko ni sega ni tuberi ira vakadodonu na kalokalo vei Jisu ki Peceliema. Na kena dina ni a liutaki ira yani ki Jerusalemi na vanua era laki veivosaki kina kei Tui Eroti, ka via vakamatei Jisu o koya. Ia a rawa ni vakayacora na tui ke a sega ni curu takoso na Kalou ena nona vakasalataki ira na dauraimata ni lomalagi me ra kakua ni laki tukuna vei Eroti na vanua e tiko kina ko Jisu. Sa i koya na meca ni Kalou, ko Setani na Tevoro, a via vakamatei Jisu, ia a qai vakayagataka na kalokalo oqori me vakayacora na nona i naki. Maciu 2:1-12; Maika 5:2.

▪ Na cava e vakaraitaka ni kalokalo era a raica na dauraimata ni lomalagi e duatani na kalokalo?

▪ E vei na vanua e tiko kina ko Jisu ni ra kunei koya na dauraimata ni lomalagi?

▪ Eda kila vakacava ni a vakarautaka ko Setani na kalokalo me liutaki ira na dauraimata ni lomalagi?