Digovi Vuravura

Itali

Dua na ka na levu ni basikeli era volitaki mai Itali ena 2011 ni vakatauvatani kei na motoka. E yaco qori baleta na leqa vakailavo, tubu na isau ni waiwai ni motoka, saulevu tale ga na kena ripea. Ia na basikeli e sega ni saulevu, sega ni levu na kena ripea, e sala rawarawa tale ga ni veitosoyaki.

Armenia

E vakatulewataka na mataveilewai na European Court of Human Rights ni beca na matanitu o Armenia na nodratou dodonu e 17 na cauravou eratou iVakadinadina i Jiova. Eratou vesu na cauravou qori ni ratou sega ni via vakaitavi ena tabana ni veiqaravi raraba e veiliutaki kina na mataivalu. E qai totogitaki vakailavo na matanitu ena leqa kece e vakavuna vei ratou na 17 na cauravou.

Japani

Eso era vakayagataka na sala ni veikilai ena internet mera vakamuai ira kina na gone mera lai coko tu ena so na Web site rerevaki. E 63 na pasede vei ira na gone qori era sega ni bau vakasalataki vei ira na nodra itubutubu. Ni dikevi na 599 na kisi me baleti ira na dau veivakamuai, e 74 na pasede era kaya ni nodra inaki mera veiyacovi kei ira na gone.

Jaina

Ena osooso ni gaunisala sa yalani kina na iwiliwili ni motoka vou e rejisitataki ena siti. Kena ivakaraitaki mai Beijing, sa na sega ni sivia e 240,000 na motoka era rejisitataki ena dua na yabaki. Ena Okosita, 2012, e rauta ni 1,050,000 na lewenivanua era vakaitavi ena lotari ena winitaki kina e 19,926 na naba vou ni motoka. Na kena ivakatautauvata, mai na 53 era vakaitavi ena wini ga e dua.