O “Kana Magiti Tikoga”?
“Sa ka ca na nodra siga kecega era rarawa tiko: Ia ko koya sa reki na lomana, sa kana magiti tikoga.” —Vosa Vakaibalebale 15:15.
NA VOSA kana magiti tiko ga e vakaibalebaletaka na ivakarau ni lomana e dua kei na ka e vakasamataka. O koya e “rarawa tiko” ena cala tu ga na ivakarau ni nona rai qai vakavuna me “ca” na nona bula. Ia o koya e “reki na lomana” ena saga me donu na nona rai, qori ena vakamarautaki koya qai vakavuna me “kana magiti tikoga.”
E duidui na leqa e tarai keda qai vakavuna meda rarawa. Ia ni yaco eso na ituvaki e vakararawataki keda eda rawa ni cakava eso na ka meda marau tiko ga kina. Raica mada na ka e tukuna na iVolatabu.
Me kua ni vakanuiqawaqawataki iko na veika ena yaco nimataka. E kaya o Jisu: “Mo dou . . . kakua . . . ni lomaocaoca me baleta na mataka, ka ni na qai lomaocaocataka ga na mataka na ka e baleta. Sa rauta ga na dui siga na kena leqa.”—Maciu 6:34, Veiyalayalati Vou.
Tovolea mo dau vakasamataka ga na veika vinaka e yaco ena nomu bula. Vakacava mo dau vakavola qori qai taleva ena gauna o rarawa kina? Mo kua tale ga ni dau vakasamataka na cala o cakava ena veigauna sa oti, mo vuli ga kina qai saga tiko ga mo cakava na ka e dodonu. Kena ivakaraitaki, ena yaga na iloilo e tiko e yasai draiva me raica kina na ka e yaco tiko e dakuna, ia ena sega ni rai tiko ga kina, ena rai ga e gaunisala. Mo nanuma tale ga ni “sa tiko vei kemuni [Kalou] na loloma [“veivosoti dina,” NW].”—Same 130:4.
Ni o yalolailai, mo talaucaka na lomamu vua e dua ena vakayaloqaqataki iko. E kaya na Vosa Vakaibalebale 12:25 ke “bibi” na loma ni tamata ena “vakacuva: Ia na vosa vinaka sa vakamarautaka.” Na “vosa vinaka” eda na rogoca vua e dua na lewe ni noda vuvale se itokani nuitaki, e dua e sega ni dauveivakalewai, ia e “loloma tiko e na veigauna.” —Vosa Vakaibalebale17:17.
E levu era marautaka nodra bula nira muria na ivakasala vuku ena iVolatabu ena gauna mada ga era rarawa kina. Ena yaga tale ga vei iko na ivakasala vuku qori.