Savasava

E kauaitaka na Kalou meda savasava vakayago?

“Meda vakasavasavataki keda mai na dukadukali kece vakayago kei na dukadukali vakayalo.”​—2 Korinica 7:1.

KA E KAYA NA IVOLATABU

E lomani keda na Dauveibuli, e vinakata meda bulabula vinaka, bula balavu, me vakainaki tale ga. E kaya kina, “Me muria tiko na noqui vakaro na lomamu: Ni na vakaikuritaki kina vei iko na siga e vuqa, kei na bula dede, kei na sautu.” (Vosa Vakaibalebale 3:1, 2) Na lawa a soli vei Isireli e vakadinadinataka ni lomani keda na Kalou, e okati kina na ivakaro matata me baleta na tiko savasava kei na tiko bulabula. (Vakarua 23:12-14) Nira muria na ivakatagedegede savasava qori na Isireli, era na bulabula vinaka, era na taqomaki tale ga mai na mate rerevaki e takava na veimatanitu e sega nodra lawa me vakataki Ijipita.—Vakarua 7:12, 15.

E vaka tale ga kina nikua, o ira na “vakasavasavataki [ira] mai na dukadukali kece vakayago,” me vaka na vakatavako, gunu sivia, kei na vakayagataki ni wainimategaga, e sega ni tauvi ira na mate rerevaki—era bulabula vinaka, e vinaka nodra ivakarau ni vakasama—sega tale ga nira matedole. Nida maliwai ira na tamata, noda muria tale ga na ivakatagedegede ni Kalou me baleta na savasava e vakaraitaka nida sega ni nanumi keda ga.—Marika 12:30, 31.

E kauaitaka na Kalou meda savasava vakayago, vakayalo tale ga?

“Moni vakamatea na gagadre ni veitikiniyagomuni . . . na veidauci, ivalavala tawasavasava, na garogaro, na gagadre ca, kei na kocokoco ni okati me qaravi matakau. Na ka kece qori ena waqa kina na cudru ni Kalou.”—Kolosa 3:5, 6.

KA E KAYA NA IVOLATABU

Me vaka sa cavuti mai, e uqeti keda na iVolatabu meda “vakasavasavataki keda mai na dukadukali kece vakayago kei na dukadukali vakayalo.” Ena gauna i Jisu Karisito, e levu na tamata me vakataki ira na iliuliu ni lotu Jiu, era sa lai saga sara mera savasava vakayago, ia era beca na ivakatagedegede savasava vakayalo. (Marika 7:1-5) Ia qai vakadodonutaki ira o Jisu ena nona kaya: “Dou lecava ni sega ni vakadukadukalitaka na tamata na ka e tiko e tuba qai lako yani i loma, . . . e curu ga ina noda iwawa, oti e lako tani tale yani me benu?” E tomana: “E vakadukadukalitaka ga na tamata na ka e lako tani mai vua; e vu mai na loma ni tamata na vakanananu ca: na veidauci, na butako, na laba, na veibutakoci, na kocokoco, na ivalavala e ca, na lawaki, na ivalavala vakasisila, na mata e vuvu, . . . kei na veika sesewa. Na ka ca kece qo e . . . vakadukadukalitaki koya.”—Marika 7:18-23.

E vakaibalebaletaka tiko o Jisu, ni o ira na vakabibitaka na savasava vakayago ra qai beca na ivakatagedegede vakayalo ni Kalou, era vaka na bilo e savasava na dagona ia sega na lomana.—Maciu 23:25, 26.

E yaga ke muri na ivakatagedegede vakaivolatabu?

“Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.”​—1 Joni 5:3.

KA E KAYA NA IVOLATABU

E kaya na Maika 6:8, “Cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?” E veiganiti na vakamamasu qori, se vakaevei? Kena ikuri, e vinakata na Dauveibuli meda talairawarawa vua nida lomani koya. Nida cakava qori, sega ni vakabekataki eda na vakila na marau dina. (Same 40:8) Ena gauna eda cala kina, eda rawa ni lomavakacegu ni Kalou ena vosoti keda. “Me vaka sa lomana na luvena e dua na tamata, sa lomani ira vakakina ko Jiova era sa rerevaki koya. Ni sa kila ko koya na nodai bulibuli; Sa nanuma ga ni da sa kuvu-ni-soso” eda valavala ca qai sega ni uasivi.—Same 103:13, 14.

Kena ibalebale, na ivakatagedegede ni Kalou me baleta na savasava vakayago, vakayalo tale ga e vakaraitaka nona yalovinaka kei na nona lomani keda. Noda talairawarawa gona ni muria e vakaraitaka nida yalomatua, eda lomani koya tale ga.