Dikevi o Esia

Taqomaki na Gone Nira Vakavulici

E kaya e dua e kenadau ena lawa mai Jaina, ni rawarawa sara nodra vaqaseni na gone nira sega ni veivakavulici na itubutubu ena ka me baleta na veiyacovi. Ena va ga na yabaki sa oti era valataka kina na dauveibeitaki e Jaina e rauta ni 8 na udolu na kisi ni nodra vaqaseni na gonelalai. E kaya e dua na parofesa ni lawa ena Beijing Normal University nira dau “rawai rawarawa” na gone “ra qai vakasagai vakalevu. Na nodra vakavulici gona e itataqomaki vinaka mera kua kina ni dau vaqaseni.”

KA E KAYA NA IVOLATABU: O ira na itubutubu yalomatua era na vakavulici luvedra mera taqomaki kina vei ira “na tamata e[ra] tukuna na ka ca.”—Vosa Vakaibalebale 2:1, 10-12.

Mate ni Oti na Cagilaba

Tukuni ena dua na vakadidike ni kedra iwiliwili na gonedramidrami yalewa era mate ni oti ga e dua na yabaki na cagilaba ena Yatu Filipaini, e vakatinikalimataki ni vakatauvatani kei na dua e mate ena gauna sara ga ni cagilaba. E rawa ni vu mai na sega ni cakacaka ni oti na cagilaba, na isau ni kena vakavinakataki tale nodra bula, veivuke e soli vei ira na gonedramidrami yalewa, okati tiko kina na kakana kei na nodra qaravi vakavuniwai.

KA E KAYA NA IVOLATABU: “Mo wasea na kemu madrai vei ira na viakana, mo kauti ira na dravudravua kei ira na sega na nodra vale ina nomu vale, mo vakaisulutaki koya o raica ni luvaiwale tu.”—Aisea 58:7.

Nodra Vakamatei Ira ga na iTabaqase ena Ceva kei Korea

Ena 2011, e sivia na dua na ikava ni kedra iwiliwili era vakamatei ira ga ena Ceva kei Korea era yabaki 65 se sivia. So na dau vakadidike era kaya ni vakavuna na veisau ni ivakarau ni nodra qaravi na itabaqase kei na veika vakailavo—voleka ni 50 na pasede na itabaqase era bula dravudravua. E vica ga ena Ceva kei Korea ena gauna qo era nanuma ni nodra itavi sara ga na gone mera qaravi ira na nodra itubutubu itabaqase.

KA E KAYA NA IVOLATABU: “Mo rokovi tamamu kei tinamu.”—Efeso 6:2.