iTuvaki Dredre: Rai Cala

VAKACAVA o dau rarawa, cudru, se leva? Ke dau yaco qori, macala ga ni o na vakalusia e dua na iwase ni nomu gauna kei na kaukaua, o qai vakawalena na veika e bibi cake. Na cava gona mo cakava kina?a

IVAKARAITAKI VAKAIVOLATABU: TEVITA

E levu na ka a vakila o Tui Tevita—okati kina na lomaocaoca kei na lomabibi. Na cava e vukei koya me kua ni soro? E nuitaka ga na Kalou. (1 Samuela 24:12, 15) E vakavola tale ga na veika e kauai kina. Ni turaga dau vakabauta, e sega ni cegu ena masu.b

KA E CAKAVA O GREGORY

Me vaka sa tukuni oti mai o Gregory e dau lomaocaoca vakasivia, sa lai nuiqawaqawa tale kina vakalevu. E kaya: “Sa rui sivia tale noqu dau lomaocaoca.” E qai lewa vinaka ga vakacava nona bula? E kaya: “Meu rawa ni bula vinaka tale, e vukei au o watiqu kei ira noqu itokani, au vakavinavinaka kina vakalevu. Au lai raica e dua na vuniwai, au qai kila vinaka na kequ mate. Au veisautaka tale ga eso na ivakarau ni noqu bula, au qai vakila niu lewa vinaka, sega ni vaka me lewai au tu na kequ mate. Au se dau lomaocaoca tiko ga ena so na gauna, ia au sa kila vinaka na veika e vakavuna, au kila tale ga na veika meu cakava me vinaka kina na kequ ituvaki.”

KA O RAWA NI CAKAVA

Ke o dau rai cala, muria mada eso na vakatutu qo:

• Vola na veika o dau kauai kina.

• Talaucaka na lomamu vua e dua na wekamu se itokani voleka.

• Saga mo biuta tani na rai cala. Kena ivakaraitaki, e vinaka mo taroga: ‘E donu na mataqali rai cala qo me baleti au?’

• Kua ni lomaocaoca, cudru se leva tiko ga. De vinaka mo vakayagataka nomu gauna kei na kaukaua ena veika e vinaka cake.c

Bibi me Nanumi: E sega ni dau yaco na rai cala ena vuku ni keda ituvaki, ia na ivakarau ga ni noda rai.